تجارب، حكاوي، وشوية شطحات.

أنولدت من جديد! تجربة صيام عن الأكل لمدة أسبوعين

السنة دي 2017 وأواخر 2016 كانت عجيبة بكل المقاييس من ناحية الصحة وزيادة وعي للأكل، في نوفمبر 2017 حكمل سنة Vegan! من أخر مره أكلت لحمة أو اي منتجات حيوانية! حتكلم في وقت تاني عن دا الموضوع وتجربة أني اكون نباتي وكل دي الأشياء. بس دحين أبغى اتكلم أكثر لايش وصلني لكل دا، وعن تجربة الصيام عن الأكل Solid food vacation.

الديتوكس Detox

كل دا تقريباً بدأ لما أول مره قررت أسوي ديتوكس، الأسباب ما كانت عشان أنقص وزن أو اسوي دايت الي يعرفني كويس يعرف انه Already أنا نحيف، وبالعكس أبغى ازيد وزن صحي. الهدف كان من اول تجربة انه أبغى ارفع طاقتي وتركيزي وأبغى أبدأ عادات جديدة صحية، كان النظام عبارة عن ثلاثة أيام، في النهار أشرب موية وفي الليل اشرب سوائل زي العصيرات، وفعلاً سويته وطاقتي كانت رهيبة وعالية هذا الشي احسه دائماً فيا، كل ما أكل اقل كل ما طاقتي أعلى.

طيب بعد الصيام كان النظام انه أدخل على أكل نباتي حبة حبة هنا بدأت اتحمس وأتحمس مره على فكرة انه احول Vegan لانه من اول الموضوع في راسي بس ما قد قررت، صرت اقرأ زيادة واتفرج فديوهات على اليوتيوب وأتحمست مره وقررت أجرب احول.
هنا السر معايا! كل مره أسوي نوع معين من الديتوكس أخرج منه بقرار أو عادة جديدة!
فائدة الصيام زي كذا او الديتوكس انه يعطي الجهاز الهضمي راحة، بالتالي الجسم يشتغل ويعالج جوانب ثانية ويعطي فرصة للخلايا والنواقل العصبية (neurotransmitters) انها تتوازن بشكل سريع بالتالي أسهل بكثير لمخك أنه يربط عادات جديدة في هذي الفترة ويترك عادات قديمة.


أيش بعد Vegan؟

الآن صرت نباتي🌿 وكملت على هذا الوضع فترة طويلة، بعد ستة شهور قررت اجرب اسوي تنظيف للقولون، نور عزوني حكاني عنه وعن تجربته معاه واتحمست، التنظيف هذا Colon cleanse يتطلب أسبوع كامل صيام على عصير التفاح مع خلطة الأعشاب الي تاخذها معاه، كنت متحمس وجاهز اني اسويه وطلبته أون لاين. تنظيف القولون شي مهم ومفروض يتسوا في السنة مره، كوني نباتي جديد وابغى اتخلص من الرواسب، السموم والأشياء الي ممكن تكون متعفنة جوا القولون من كل عادات الأكل السئ الي كنت فيها عبر السنين، حمسني انه أسويه دحين.

بعد ما سويته حصل السر تاني معاياً، وحسيت انه أبغى أصير Raw vegan.
الى الان ما اعرف ايش المصطلح العربي Raw vegan بس الزبدة أنه اكل Vegan بس بدون ما يكون مطبوخ، طبعاً نفس الي صار معايا لما صرت فيغان، قعدت أبحث كثير واقرأ واتفرج فيديوهات، وأتحمست انه اعمل Switch الي كان مرددني انه الفواكه والخضروات عندنا مو عضوية Organic لاكن في النهاية أستوعبت انه حتى لو مو عضوية ما راح تكون مشكلة كبيرة مره، لو موجود عضوي حناخذه لو مو موجود مو مشكلة. بعدين أبغى أصير أزرع أكلي بنفسي بس دا موضوع تاني. (في وقت تاني حتكلم ليش برضوا قررت ما أكل مطبوخ)
الغلط الكبير الي سويته لما كنت فيغان كنت أكل كتير مطبوخ وقليل فواكه وخضار، الي هوا فيها كل الحياة وكل شئ جسمي يحتاجه. الآن احاول ما أكون متعصب مرة Raw المهم انه اكون 80% Raw في اكلي  ولو مرة قررت اكل شي مطبوخ نباتي ما راح تكون نهاية العالم! بس في اشياء عليها اكس (X) كبير زي العيش والسكر الصناعي وأي شي صناعي ومتحول، كلها أشياء ما راح تفيد جسمي وحتضره.
في يوم تاني لازم حتكلم بالتفصيل عن تجربة التحويل لنباتي و Raw والاكل الي تقدر تاكله وتنوع الأشياء كثير يحسبوا أنه كل الي ناكله هوا خضار وفواكه ترا حتى Raw vegan يقدروا يسوا اكل كتير رهيب وغشاش مره! 😂 في شي اسمه Dehydrator حتكلم عنها بعدين ممكن.


المرحلة الثانية Cleanse of a lifetime

بعد ماسويت تنظيف القولون في July  وأنبسطت بالأشياء الفضائية (mucoid plaque) الي طلعت من جسمي، أتعمقت وقتها بزيادة في الصحة والجسم وانواع التنظيف cleansing وحسيت أنه الجسم يحتاج لسه شغل زيادة، وقتها كنت لسه دوبي طالع من صيام اكتر من اسبوع ومهلوك وخلاص فقررت اوقف غوص في داك العالم، وأكل Raw فترة وانبسط وبعدين أرجع اشوف ايش اسوي في الأشياء الي اكتشفت أني أبغى أنظفها.

طيب الآن جاء الوقت أخر شهر سبتمبر كملت شهرين من أخر Cleanse وقررت انه أبدأ في المرحلة الثانية والاخيرة هذي السنة في التنظيف،
هذي المرة أصعب من أي شي فات.

كل الموضوع بدأ لما اكتشفت عن شي اسمه Parasites يسكنوا جوا جسمنا، ياكلوا من أكلنا، ويمرضونا. يسموهم Garbage men زبالين، ينظفوا جسمنا من الزبالة! ويتغذوا عليها. كل ما يكون أكلي سئ ومليان خرابيط وسكر غير طبيعي، يتكاثروا جوا الجسم وينبسطوا ويسببوا أمراض كثير مجهولة! I KNOW بس الفكرة اول ما عرفت عنهم قرفتني، كيف لو بتتفرجوا على صورهم.

الموضوع انه ما نقدر نهرب منهم موجودين في الهواء في الاسطح الي نلمسها في الأكل، وزي ما قلنا لهم فايدة ياكلوا الزبالة حقتنا! بس لما يزيد الموضوع ويخرجوا عن السيطرة ويصيروا جوا الجسم اقوى من البكتيريا المفيدة هنا تبدأ المشاكل.
طيب الآن أكتشفت عن شخص اسمه Markus Rothkranz الادمي دا رهيب بكل ما تعنيه الكلمة، لازم بعدين أفصل في أيش هوا يسوي في الحياة، او روحوا ابحثوا عنه لو حسيتوا. المهم طلبت كتابه Heal yourself 101 وشوية من منتجاته حقت التنظيف، كلها عبارة عن اعشاب طبيعية في بودرة. المهم واحد من أقوى المنتجات عنده هوا Parasite Free.
في الكتاب عنده الخطة لكيف تحول وتعيد كل شي جوا جسمك وصحتك Reset، أو تعالج اي مرض حتى لو لا سمح الله سرطان! المهم سويت الي في الكتاب منها صيام يومين على موية، وبعدين كملت 5 أيام على عصيرات، وبعدين على Blended drinks لمدة اسبوع. أسوء مرحلة كانت صيام العصيرات هلكتني.
الموضوع انه لما نكون في هذي المرحلة من التنظيف، الجسم يسوي كل شي عشان ينظف نفسه من السموم داخلياً ونفسياً وروحياً، فيكون في Reactions ومشاعر وحاجات غريبة كلها قاعدة تخرج منك!
خلال دي الفترة عزلت نفسي بشكل كبير، وكثير يعرفوا حتى بعدت عن Social Media، أحتجت أفصل وارتب الامور وارجع اشبك الاشياء في مخي.

الهدف من دي المرحلة:

  • راحة للجهاز الهضمي عشان الجسم يركز في التنظيف وعلاج أي شي يحتاج علاج.
  • Liver cleanse
  • Kidney cleanse
  • Parasite cleanse

الولادة الجديدة Am born again


بعد كل هذي المدة أسبوعين كاملة ما كنت أكل فيها شي، رررررجعت للاكل، كان شي رهيب لايوصف الـ gif الي هنا ممكن انها المعبر الوحيد، أكلت موز 🍌 كاول شي اخترته مع اني في اخر اسبوع كنت بخلط الموز في العصير بس أبداً أبداً ما كان بيوصلني نفس الطعم لما أكلته!
أنا ما أعرف هوا انا نسيت الطعم ولا Taste buds أتغيرت عندي! بس حرفياً الطعم لا يقاوم كان والطعم له كذا مستوى، بعدها جربت الافوكادو MY FAVORITE food of all time وكانت Creamy lvl 1000 والرمان نفس الشي مره كان طعمه حلو! كل شي كنت أجربه كاني طفل يجرب أكل للمرة الأولى! شي رهيب رهيب!!

السر دي المرة بما أنه كل ديتوكس اطلع منه بشي جديد، دي المره طلعت بعادة أني ادخل Green smoothies كشي اساسي كل يوم كالوجبة الاولى في الصباح عشان تكون مهضومة وجسمي يأخذ كل الفايدة الي فيها بشكل أسرع وادخل Greens الورقيات الي هوا الشي المفيد، الي حالياً مهو شي أساسي في أكلنا، الفواكه رهيبة واسطورية بس السٌر في Green leafy stuff. لسه بحاول اسوي التغييرات المفيدة في دا الموضوع.
I need more kale seriously!


أيش دحين؟ What’s next

حالياً انا بكمل اني اخذ Parasite free واستمر عليه لمدة 3 شهور يس طويل لانه ياخذ ثلاثة مراحل عشان تقضي عليهم بالكامل وعلى البيوض حقتهم الي يتركوها لما يموتوا، حقدر اكل طبيعي طوال هذي الفترة الشي الوحيد انه الفواكه السكرية مره ما ينصحوا فيها خلال هذي الفترة، عشان لا تغذيهم خلال دي الفترة وتقويهم، بالصيام انا جوعتهم ودحين برمي عليهم الأعشاب المدمرة 😈. ما يحبوا الثوم البصل، الاشياء المرٌة، Spices الاشياء الحارة كمان كلها تساعد انه تقضي عليهم. الأكل المطبوخ يقتل parasites الي فيه بس في نفس الوقت يغذيهم! لو أحد بيسوي cleanse parasite أبعد عن المطبوخ فترة.
دحين ما اقدر اتكلم عن أيش حاس من موضوع ال Parasites وأيش النتائج بعد 3 شهور أحتاج أسوي Update post، وافصل في موضوعها وأيش صار معايا.

الآن انا مره مبسوط اني بأكل تاني، حكتشف زيادة في الاكل حبدأ اتفنن حبة حبة، وزني نقص كثير طبعاً دحين وشي طبيعي، حرجع ازيد واخذ وزن صحي، كل مره اسوي ديتوكس كذا يصير الجسم ما يتخلص الا من أشياء ما نحتاجها.

* كل شي بكتبه هنا، بشارك فيه تجربتي وأوثقها، في تفاصيل كثير لسه أحتاج أغطيها حبة حبة. ما بحاول أقنع احد في شي، عادات اكلي كانت سيئة لأبعد الحدود قبل سنتين، مستحيل كنت اصدق انه ممكن اسوي نص الي بسويه اليوم من قرارات الاكل، كل الموضوع اني الآن جاهز اني امر بدي التجربة واحس اني ابغى اسويها دحين، لما نشارك تجاربناً اكيد في ناس حتكون معانا في نفس الخط وناس تانية لا. الي متحمس لاي شي من الاشياء الي بتكلم فيها وبسويها حكون دائماً موجود لو يحتاج أساعده في شي او يبغى يعرف شي زيادة من تجربتي.

حب وحياة 🙏💜

أشياء وروابط أتكلمت عنها:

قصة الغلاف: الصورة هذي تمثل ركن الصحة، الي سويته في غرفتي بكل حماس قبل لا أبدأ الصيام الثاني عشان يحمسني ويلهمني.


في بالك كلام؟

  1. 16 نوفمبر، 2017

    شيء جميل إنك شاركنا بتجربتك و عاجبتني ثقتك في نفسك جداً جداً.. أنا سويت صيام العصير وكمان جالسة أطبق صيام يوم ويوم.. و من جد طاقتي عالية و الحمد لله حتى وإني مستقر لأنه اصلا من اول ما صرت vegan ما كان الهدف نقص الوزن بس كنت ما ابغى ادعم المصانع و البلاوي اللي يسووها في الحيوانات ياحرام.. بس بعدين لقيت قناة John Rose على اليوتيوب و هو اللي اقنعني اصير raw vegan و اعمل صيام العصير.. سويت 30 يوم و كانت تجربة جميلة رغم الضغط من الاهل و وصحباتي.. هما مهما شرحت لهم ابدا ما كانو مقتنعين.. بس دحين خلاص ما صارو يتناقشو معايا بخصوص اكلي وكدا و الحمد لله صارت ثقتي جدا كبيرة ولا اهتم لكلامهم… كمان قرأت كتب ساعدتني مرة.. كتاب the Detox Miracle source book by Robert Morse و كمان the ethics of diet by howard Williams و في كتاب ماله علاقة في الأكل بس اسمه you are the placebo جدا جميل انصح كل كل شخص يقرأه.. و بس هذه قصتي و اشكرك على المشاركة ترى تساعد كثييير

    1
    1. 16 نوفمبر، 2017

      Thank you 🙏💜
      John rose رههيب مو دايماً يشبك معايا بس يعجبني.
      حشيك الاشياء الثانية الي ذكرتيها
      حشارك زيادة اكيد، شكراً دانيا.

  2. 17 نوفمبر، 2017

    أتمنى ماتوقف تكتب تجاربك مره حابه كل شي تقدمه، بالنسبة لاحساسك لما أكلت الموزه ذكرني بمشهد من فيلم into the wild لما جلس يتغزل بالتفاحه😂 حمستني اعيش تجربة صيام العصير ماكنت سامعه فيها أنا في طريقي اني أصير ڤيقن، صار لي شهرين من قررت أصير فيجيتيريان حسيته أسهل لي كبدايه وكفكرة إني أبدا بالتدريج، بديت أمشي بالطريق لحياة صحية لاني مره صرت أكره الحياه اللي اعيشها بدون تركيز على ايش جالسه ادخل في جسمي كرهت فكرة انو الاكل السيء هو الطبيعي بحياتنا لاننا تعودنا عليه، وهذا كله صار بعد ماشفت فيلم what the health كان نقطه تغيير في حياتي وبدايه في إني أركز على صحتي.

    1
    1. 17 نوفمبر، 2017

      من جد مشهد التفاحة الاورجانيك، معبر مره.
      حلو تقدري تبدأ خطوة خطوة وبالتدريج توصلي للتبغيه، انا كمان بدات vegetarian فترة قبل دا كله فساعدني دا الشي.
      🙏💜

حرسلك الأشياء الجديدة الي بشتغل عليها