تجارب، حكاوي، وشوية شطحات.

ليش أنام على الأرض؟

قبل سنة تقريباً من التاريخ الي بكتب فيه، بدأت رسمياً أنام على الأرض وتركت السرير.
بدأت القصة من لما شفت فيديو على اليوتيوب لشخص يتكلم عن النوم على الأرض وفوائده وكيف أنه من طبيعتنا أنه ننام على الأرض، من وقتها صرت أجرب أنام على الأرض كل فترة وأشوف هل هوا شي ممكن وهل له فوائد أو لا.


ولد الطبيعة

الشئ دا معد صار غريب عليا، إنه كل فترة أجرب أشياء جديدة أو اتخلى عن أشياء معينة صرنا نسويها مع إنها مو من طبيعتنا، أيوا! الشعور دا إنه نرجع للحظة الي نزلنا فيها على الأرض وكنا طبيعين نمشي ونأكل من قدامنا نسكن في الغابات والجزر، حياتنا البسيطة، الي صارت غريبة علينا!

كل شي نسويه اليوم صار هوا “الطبيعي” هل من جد طبيعي! الي بنسويه.

على أي حال أنا الشخص الي يبغى يرجع انه يكون ولد الطبيعة.


المنطق

أحب وأقتنع كثير بقد أيش الشئ منطقي بالنسبة لي ولطبيعة، المنطق من أنه ليش مفروض ما ننام على السرير هو أنه لما تنام على السرير، الي بيصير أنه هيكلك العظمي الي وظيفته يشيل جسمك ما يدّخل والي يحصل انه كل الحمل يصير على عضلات الجسم ويصير وظيفتها تشيل جسمك.

بينما المفروض وقت النوم انه عضلات جسمنا ترتاح والهيكل العضمي هو الي يشيل الجسم، بالتالي نصحى ونصبح مرتاحين بدون تشنجات وبطاقة أكبر.

هذا الشئ صقع في مخي وأقنعني، أنه السرير والطراحة مهي من طبيعتنا.
بنسوي أشياء كثيرة حالياً تضر بهيكل جسمنا، ومهي من طبيعتنا زي الجلوس الكثير وطريقة نومنا وغيره! يحمس لما نبدأ حبة حبة نسوي أشياء لمصلحتنا.

I want a super flexible body


التجربة

بدأت بأني أجرب يوم انام على الأرض، الى ما وصلت أنه أجرب أسابيع، وصلت لمرحلة أنه افكر اتخلى عن السرير حقي، وقتها كان القرار يخوف شوية انه أتخلى عن السرير تماماً، كنت أنام اكثر على الارض بينما السرير موجود، الى ما في 2016 نقلنا بيت جديد وقررت أنه أتخلى عن السرير وبالتالي حتى أقدر استغل مساحة الغرفة عندي، وفعلاً سويت دا الشئ.

من الأشياء المثيرة للاهتمام، وقت ما كنت لسه بجرب، زرت المتحف المصري وشدني مره كيف سرير الفراعنة الملوك كان عبارة عن خشبة صلبة وما كان فيه طراحة زي دحين.

اليوم وبعد + سنة بدون سرير، مقتنع تماماً بهذا الشئ وما عندي اي إهتمام أنه يكون عندي سرير.

حلو مره شعور البساطة دا! حالياً اي مكان اروحه سهل أنام فيه، في أوقات أنام على سرير زي السفر في الفنادق.
هذي التجربة، سهلت عليا وفتحت أبواب أنه اتخلى عن عادات كثيرة وأكون “طبيعي” أكثر.

كأني كل مره أوصل لمرحلة جديدة، وكل مره أتخلى عن شئ أكبر.


الفوائد

أشياء كويسة لاحظتها:

  • أحتاج ساعات نوم أقل.

    طبعاً يعتمد على عوامل ثانية قد ايش انا مسترخي وهل بنام بدري او لا.

  • سهل أني أقوم بسرعة في الصباح.

    مو دائماً طبعاً 😂، خلينا نتفق أنه لو ما تبغى تقوم بدري أو عاداتك لسه مو صحية ماراح تقوم بدري، لاكن لو تبغى تقوم بسهولة وبسرعة وحاط النية ما في شي أحسن من النومة على الأرض حيساعدك في دا الشئ.

  • إنتصاب العامود الفقري.

    بدون ما أنتبه الآن عامودي الفقري وأكتافي منتصبة بشكل أفضل، طبعاً هذا الشي ممكن تكون عوامل ثانية تساعد فيه زي اليوغا.

  • مساحة أكبر في الغرفة بدون السرير.

    دا إمكن أرهب شي كل يوم أجهز سريري بنفسي وكل يوم أشيله بنفسي، هذا الشئ أعطاني مساحة اكبر في الغرفة انه تكون اوسع واشرح.

  • إسترخاء عضلات الجسم


مكونات السرير

ببساطة هذي الاشياء الي استخدمها عشان أسوي سريري كل يوم:

  1. Yoga mat
  2. طبقة خفيفة (لحاف، طراحة خفيفة)
  3. شرشف
  4. لحاف نوم
  5. مخدة x2

بفكر مستقبلاً أرتب واطور السرير، أقرب شي ممكن اسوي له هو زي السرير الياباني يكون عندي شوية اشياء جاهزة ومرتبة.

الهدف أنه يكون مكان نومي يساعد ظهري انه يكون منتصب وشايلني، وبنفس الوقت مايكون قاسي لدرجة انه مو مريح.

التجربة دي مو سهلة في بدايتها، راح تحس الموضوع صعب لاتنسى انه جسمنا والهيكل حقنا متأثر من السنين الكثيرة الي تعبناه فيها، لاكن لو كنت من الناس الي يحبوا يجربوا أشياء جديدة، جرب وشوف بنفسك الفرق وهل يستاهل الموضوع او لا.


في بالك كلام؟

  1. 17 نوفمبر، 2017

    لما أتابع مسلسلات كوريه كنت أتفاجا كيف يناموا على الارض يستخدموا مخده صغيره تحت الرقبه وطراحه خفيفه انو مو معقوله كيف مايحسوا بالتعب بالنظر كنت احسها متعبه ومو صحيه بس لما بحثت عنها طلعت هي الطريقه الصحيحه لنوم هالكلام قبل كم سنه ووقتها مافكرت أجربها صراحه أحسها تحتاج شجاعه كبيرة لكن ما أخفي إني تحمست بعد كلامك خاصة إنها تساعد على إنتصاب العامود الفقري محتاجة كذا وحبدا باذن الله أجربها من فترة لفترة، thank you 🙏🏻 ✨




    1
  2. 12 ديسمبر، 2017

    بالفعل جربتها! يوم كنت ابا اقوم من وقت و عندي دراسة كنت افضل النوم على الارض. موضوع يستحق البحث عنه. شكرا لمشاركة تجربتك*thumbsup*




    1
  3. 25 فبراير، 2018

    بدأت أجرب النوم على الأرض قبل شهر وكم يوم
    أول الأيام كان فيه شعور مزعج يمكن من قل التعود او من كتر ماكان جسمي خربان😂
    بعدين اتعودت عليه لدرجة اني سرت لمن أضطر أنام على سرير ما بقدر أنام
    جسمي أتحسن قوة تحملي زادت وفي وقت التمارين حاسة فرق حقيقي
    أتوقع ما يبين كل شي من أول شهر لكن كبداية للتجربة مررة تحمس وأحس أبغى أكمل فيها للأبد
    “عيبها الوحيد انه لمن أكون مرة نعسانة وطافية يتعب شوية موضوع إني أسوي الفراش”
    حقيقي غير الشي دا مالقيت عيب 🌝😂
    شكراً كشميري عشان شاركتنا تجربتك وخليتنا نجرب
    كونو مبسوطين وحبو الحياة✨♥️




    2
  4. 5 مارس، 2018

    انا صرلي ٤ شهور انام بدون مخدة..
    اتحمست اسوي زيك، المفروض اشتري سرير جديد بعد كم شهر بس لو قدرت اتعود قبل ما اشتريه حيكون شي ممتاز 👍 حبيت فكرة انو يصير عندي مساحة في الغرفة! فعلاً السرير ياخد مساحة كبيرة.




    1
  5. 17 أبريل، 2018

    حبيييت ان شاءالله راح اجربها 💙

حرسلك الأشياء الجديدة الي بشتغل عليها