لما بدأت ترتفع أسعار البنزين في السعودية، في أواخر 2015. بدأت أشوف ناس نفس سيارتي ويعبوا 91 أخضر، وما كنت عارف بالضبط أيش الفرق وهل يأثر لو غيرت 91 ناس كانت تقول 95 كفاءته عالية، ويمشيك أكثر، وعزمه أفضل، ومدري أيش. بعد بحث أكتشف كذا شيء.

الزبدة:

• راجع كتيب السيارة وأعرف أيش البنزين المناسب لها، اللي الشركة تنصح فيه.
• أتاكد زيادة وشوف موقع أرامكو مسوين أختبار يقول لك أيش البنزين الأنسب لسيارتك.
• 95 الأوكتين فيه عالي، وهو مناسب لسيارات اللي تحتاج طاقة عالية، زي السيارات الرياضية.
• لو سيارتك تقبل 91 و 95، إذاً عبي 91 ولا تحرق فلوس بدون سبب.
• تقدر تحول بين النوعين في أي وقت، ولا تشيل هم الخلط بينهم. (فيديو حسن كتبي)

أيش صار؟

بعد التحويل لـ 91 من 95 أيش لاحظت في سيارتي؟

• وفرت كثيير كثير، بالذات مع استمرار رفع الدعم عن البنزين مع السنوات وزيادة سعره.
• لاحظت شوية عزم السيارة أقل بالذات في الطلعات، ما ادري هذا شيء حقيقي ولا تهيؤات.

فديو من الأسطوري عبدالحق: أيهما أستخدم / بنزين 95 أو 91 ؟

وبس والله، عقبال ما يكون عندكم سيارة كهربائية، أو تشتغل على طاقة بديلة أسطورية وما يحتاج تفكروا في بنزين ولا زيوت. آمين

كتبت في: أيش اعبي بنزين 91 ولا 95؟ - كشميري.

علامات لتأكد من صلاحية الكفرات

شخصياً أنا أتابع هذي العلامات في كفرات سيارتي:

• عمق النقشة: التأكد من أن النقشة على الكفر ما زالت عميقة بما يكفي وليست ممسوحة.
• التشققات والانتفاخات: في حال ظهور تشققات على جوانب الكفر أو وجود بقع منتفخة أشيك عليه عند مختص.
• مدة الاستخدام: إذا استخدمت الكفر لمدة 3 سنوات من تاريخ الاستخدام أو قطعت مسافة 60 ألف كيلومتر (أيهما أسبق). قد تختف مدة صلاحية الكفر حسب الشركة المصنعة وحسب اذا السيارة توقفها تحت الشمس أو لا.

أساسيات اختيار الكفرات

هذي كانت ثاني مره أغير كفرات السيارة، المرة الاولى لما غيرتها كان معايا أحد ساعدني في كل العملية واختار لي الكفرات بنفسه وكل شيء، دي المره أستوعبت إنه كيف أول مره أنا ما ركزت كثير، وأكتشفت إنه عالم الإطارات واسع مره والخيارات كثير، وفي أشياء كثير أساسية مفروض أكون أعرفها قبل ما أختار الكفرات الجديدة. هذي المقالة حتساعدك لو أنت أول مرة بتغير كفرات سيارتك وما عندك المعلومات الكفاية، وكمان بشارك فيها تجربتي وكيف أخترت في النهاية.

أشياء تحتاج تشيك عليها قبل تشتري

1. أبعاد ومقاسات الإطار لسيارتك
2. تاريخ تصنيع الإطار.
3. كفائة التحمل للإطار، والحرارة.
4. بطاقة كفائة الطاقة للإطارات.

1- أبعاد ومقاسات الإطار لسيارتك

كل سيارة لها مقاس محدد للإطارات الخاصة فيها، هذا المقاس هو الانسب لسيارتك ولتحملها وصرفها للوقود، الأبعاد والمقاسات الخاصة بإطار سيارتك تكون موجود في كتاب التعليمات الخاص بالسيارة، وكمان في بطاقة على باب السائق توضح المقاسات.
تكون مكتوبة بالصيغة هذي: P265/70R17

• P265: ترمز إلى عرض الإطار
• 70: نسبة الإرتفاع إلى العرض
• R: ترمز لتصميم الإطار (Radial)
• 17: يرمز لمقاس الجنط بالبوصة (القطر)

نفس هذي المعلومات تقدر تلاقيها محفورة على أي كفر سيارة، لو إنه الكفر قديم مرة، ممكن ما تبان.

قبل ماتشتري أي كفر لسيارتك تأكد إنه المقاسات والأبعاد حقت سيارتك تتطابق مع الكفر الجديد اللي بتشتريه.

معلومات إضافية:

معدل حمولة الإطار والسرعة القصوى للإطار تكون مكتوبة بالشكل هذا 89H

H: يرمز لمعدل السرعة القصوى (210KM)

89: مؤشر الحمولة (الحمولة القصوى لكل إطار)

2- تاريخ تصنيع الإطار

لما كنت بدور على كيف أختار أحسن كفر لسيارة أكثر شيء لاحظت الناس يركزوا عليه هو تاريخ إنتاج أو تصنيع الكفر وأهميته، كل إطار له تاريخ تصنيع محفور على الكفر نفسه، تاريخ التصنيع يساعدك تعرف قد أيش الكفر له، كثير لاحظوا إنه لو أخذوا إطارات جديدة نفس تاريخ السنة، بتعيش معاهم أكثر وما بيلاقوا مشاكل منها، لذلك كنت حريص أنه أختار كفر تاريخه جديد وماله فترة في المستودعات والشمس، من أغلب الورش الصغيرة ومحلات الإطارات اللي لفيت عليها كان تاريخ الإصدار فيها قبل سنة، أتجنبتها تماماً وفضلت أدور على محل يكون عنده كفرات بتاريخ السنة.

كيف أعرف تاريخ التصنيع؟

يكون مكتوب بهذي الطريقة (0218) أول رقمين من اليمين (18) ترمز لسنة 2018، والرقمين من اليسار (02) ترمز لرقم الأسبوع من السنة الأسبوع الثاني من سنة 2018.

3- كفائة التحمل للإطار

من أهم الأشياء لما تختار الكفر تتأكد من هذي الثلاثة عوامل:

1. Traction: ترمز للاحتكاك وكفائة الكفر على الأرض المبتلة، أعلى درجة لها AA، اللي غالباً موجود هوا A ويعتبر ممتاز.
2. Temperature: ترمز لتحمل الإطار للحرارة أعلى درجة هيا A وهيا الدرجة المناسبة لأجواء منطقتنا.
3. Treadweare: ترمز لتآكل الإطار كل ما كان الرقم أعلى كل ما كان أفضل 300 يعتبر ممتاز، ومعناه إنه الكفر تحمله أفضل ثلاثة مرات بالنسبة لكفر قيمته 100 في التحمل.

4- بطاقة كفائة الطاقة للإطارات

من الأشياء الرهيبة اللي سواها المركز السعودي لكفأءة الطاقة في السنوات الأخيرة هو إصدار وإلزام البائعيين ببطاقة كفائة الطاقة، البطاقة تحميك كمستهلك وتوضح لك جودة وكفائة هذا الكفر وتطمنك أكثر.

محتويات البطاقة:

البطاقة فيها المعلومات الأساسية اللي موجودة على الكفر زي المقاسات والأبعاد، تحمل الحرارة والأحتكاك بالإضافة الى:

1. مؤشر التماسك على السطح الرطب
2. كفاءة الوقود للإطار
3. بار كود الخاص بالإطار (للبحث عبر تطبيق تأكد)

الخلاصة وتجربتي

بعد ما تعرف مقاسات الكفر اللي تحتاجه وكل هذي الأمور حتلاقي كمية شركات وعلامات تجارية بالهبل للكفرات، وممكن هذا أكثر شيء يطفش ويوتر في كل دا الموضوع، هو أي شركة تختار لكفر سيارتك؟

حاولت أستشير، وأدور أون لاين، كل أحد يقول لك شيء في ناس تقولك هذي الشركة أحسن شركة وكفراتها ممتازة وتعيش، وناس ثانية تقولك العكس تماما وتوصف تجربتها السيئة مع هذي الشركة وكفراتها وكيف أنفجرت عليهم في الطريق ومدري أيش.

ناس تقولك الفرنسي أحسن وناس تقول الامريكي، وناس تخاف من الصيني. الزبدة إنه كل أحد بيقول لك شيء تجربتك ممكن تكون كويسة وممكن تكون سيئة.

أنا أنتهى الموضوع معايا إني كنت في واحد من المحلات وكنت مرتاح جداً لكفر معين باسم “Double King” أو “Three A”، حدسي كان مع إني أخذه، لي الآن كم شهر عليه ومرتاح جداً. اللي بحاول أوصل له إنه ما يفرق كثير الشركة المنتجة المهم تتأكد من العوامل السابقة مقاس الكفر وإنه مناسب لسيارتك، تاريخ التصنيع، تحمل الكفر للحرارة، وبطاقة الكفأءة. وطبعاً من الأشياء المهمة والي تأثر، سواقتك والطرق اللي تدخلها وإهتمامك بضغط الهواء للكفر كل هذا حيساعد إنه الكفر يعيش معاك.

الإطارات لها إجرائات ومقاييس معينة تتخطاها مدام الإطار في السوق وكفائته عالية هذا أهم شيء.

تحديث:
بعد تقريباً 6 سنوات من كتابة المقالة جربت كذا شركة كفرات صينية. الأولى كانت Double King وهي أفضل نوع أستخدمته وحبيته بس إلى الآن ما حصلته ثاني في السوق بسهولة، عاش معي 3 سنوات.
بعدها استخدمت Three A وعاش معي 3 سنوات بس استخدامه كانت مزعج شوي يطلع صوت في الاحتكاك كان مزعج وفي بطاقة كفائة كان مستواه أقل من Double King في بعض المعايير.
لهذا السبب حالياً أركز على أهم المعايير من بطاقة كفائة وأيضاً أبحث عن أي شركة في الانترنت قبل عشان أشوف لو في ناس استخدمته وكيف تجاربهم معه.

أشياء ساعدتني:

• كل شيء عن الإطارات – العالمية لصيانة السيارات (فيديو)
• موقع بطاقة كفائة الطاقة للإطارات

كتبت في: كيف أخترت كفرات جديدة لسيارة - كشميري.