قبل لا أبدأ أسوي كمبوتشا بنفسي في البيت، كنت أدور كثير على مصدر أقدر أحصل منه على السكوبي وهو الفطر اللي تقدر تخمر منه الشاي وتنتج الكمبوتشا.

شوف كتبت من فين تشتري كمبوتشا؟ وحطيت لستة بالأماكن اللي حصلت فيها في جدة كمبوتشا وسكوبي.

مصطلحات

• كمبوتشا Kombucha – مشروب الشاي المخمر وهو النتيجة اللي نبغى نوصل لها
• السكوبي Scoby – هو الفطر المستخدم والجندي اللي حيقوم بتخمير الشاهي.
• باتش Patch – كل مره نخمر شاهي حننتج كمية من مشروب الكمبوتشا ونقول عليها باتش.
• ستارتر Starter – بعد ماننتج باتش كمبوتشا جديد نحتفظ بكوب منه نسميه ستارتر أو بادئة ونضيفه في التخميرة القادمة عشان يساعد ويسرع من العملية.

طريقتي في باتش الكمبوتشا

أيش أحتاج؟

• أكياس شاي أسود أي نوع المهم (بدون إضافات). تقريباً 8 – 10 حسب ما تحب.
• 3 لتر ماء شرب.
• كوب من السكر (قصب بني عضوي أو سكر أبيض قصم خام).
• جار Jar علبة قزاز كبير تكفي 3 لتر وأكثر.
• قماش أبيض نظيف ومطاط أو خيط سميك.
• كوب كمبوتشا (ستارتر) جاهز من باتش سابق.

طريقة تخمير الكمبوتشا

1. أول خطوة بالنسبة لي اغلي الموية وبعدها أضيف عليها أكياس الشاهي للكمية اللي استعملها أكثر نسبة عجبتني وريحتني هي: 9 أكياس شاهي أسود مع ثلاثة لتر ماء تقريباً.
2. بعدها أضيف كوب سكر وأقلبه إلى ما يذوب مع الشاهي.
3. أترك الشاهي يبرد، غالباً 5-6 ساعات إلى ما يوصل درجة حرارة الجسم. غالباً احطه فترة في الثلاجة عشان يبرد أسرع.
4. بعدها أضيف الشاهي للجار Jar أو العلبة القزاز اللي بخمر فيها.
5. أضيف كوب كمبوتشا الجاهز مسبقاً(ستارتر). (بيساعد في التخمير)
6. أضيف فطر السكوبي معاهم.
7. أغطيه بالقماش وأربطه بالمطاط وأتركه في مكان مظلم وما فيه تكييف.
8. بعد سبعة أيام أشيك عليه من الرائحة واللون وممكن أذوقه لتأكد. بس الغالب في اليوم الثامن أوقف عملية التخمير وأشيل السكوبي وأبدأ أجهز باتش جديد واحتفظ بهذا في الثلاجة للاستخدام.

إعطاء نكهة للكمبوتشا

هذي خطوة إضافية (تنكيه الكمبوتشا) مو دائماً أسويها بس تقدر تسويها لو تبغى تعطي طعم حلو للكمبوتشا.

1. تأخذ الكمبوتشا اللي صارت جاهزة وتحطها في قنينة زجاجية تقفل مزبوط! وتكون من نوع كويس ما ينكسر من الغازات. يفضل النوع اللي معاه سدادة.
2. أضيف عليه أي نوع من الفواكه مقطع لقطع صغيرة زي الفراولة مثلا
   خلطتي المفضلة: ليمون معصور وزنجبيل.
3. تتركهم لمدة 3 أيام زيادة، عشان يتحلل ويأخذ الطعم.
4. كل يوم بس افتح الغطاء عشان الغازات تخرج من العلبة وما يصير في ضغط عالي وتنفجر عليك العلبة.

ملاحظات

• لا تستخدم أي معدن أو بلاستيك مع السكوبي أو الكمبوتشا لانه يقدر يحلله.
• لا تخمر في مكان فيه تكييف، بارد بزيادة أو حار بزيادة. الجو يأثر على مدة التخمير ممكن يسرعه لو كان الجو حار أو يبطئ لو كان بارد.
• لا تخمر في مكان فيه شمس مباشرة (قدام الشباك مثلاً).
• عشان تتأكد انه الباتش اللي سويته سليم. طعمه بعد نهاية مدة التخمير حيكون مائل لطعم الخل مع حموضة. لو فيه تعفن أو فطريات مفروض حتعرف على طول من الطعم والرائحة.

أسئلة ممكن على بالك

• ينفع أستخدم بدائل سكر في التخمير؟
  لا تستخدم بدائل سكر غريبة! السكوبي يفضل سكر القصب الخام سواء أبيض أو بني. عضوي أو غير عضوي. ولا تشيل هم السكر لانه السكوبي بيخلص عليه! كل ما تتركه أكثر كل مابيحلل السكر أكثر. السكوبي يحب السكر ويعرف أيش يسوي بيه، أعطيه سكر.
• هل ينفع أمسك فطر السكوبي بيدي؟
  ببساطة أيوا بس تأكد أنه يدك نظيفة أنا أروشها قبل بموية وامسكه عادي سويت أكثر من 10 باتشز زي كذا بدون مشاكل. ولو خايف أو متقرف ألبس قفازات.
• ينفع أخزن السكوبي في الثلاجة؟
  السكوبي لاتحطه في موية حارة أو باردة أو ثلاجة. يتأثر ويموت.
• هل في درجة حرارة معينة لحفظ الكمبوتشا؟
  بعد ما يجهز المشروب، يعني بعد أسبوع من التخمير، أفضل شيء تخزنه في الثلاجة، هذا الشيء بيبطئ جداً عملية التخمير وبتقدر تستمع بالكمبوتشا في أي وقت، لو تركتها أشهر في الثلاجة ممكن تتخمر أكثر شوية ويصير طعمها أقوى.
• من فين أجيب فطر سكوبي للكمبوتشا؟
  شوف هنا من فين تشتري كمبوتشا؟ حطيت حسابات توفر سكوبي في جدة. وممكن في مدينتك تبحث عن أي مشاريع صحية صغيرة يبيعوا كمبوتشا أو صاحب يسوي كمبوتشا حتلاقي عندهم سكوبي. لانه بعد كل تخميرة السكوبي حيسوي طبقة جديدة.
• كيف أقدر أسوي فطر سكوبي من كمبوتشا جاهزة؟
  لو كان عندك مصدر لكمبوتشا من متجر صحي يفضل تكون غير تجاربية بمعنى مصنوعة في البيت (نسبة نجاح العملية أكبر)، كل اللي عليك تسويه بدل ما تحط الكمبوتشا في الثلاجة خليها في مكان دافئ بعيد عن الشمس. وسوي نفس الخطوات اللي فوق الشاهي الاسود المحلى وضيفه على الكمبوتشا الجاهزة وخليها فترة. ممكن تاخذ من 2 إلى 4 أسابيع عشان يتكون لك سكوبي عليها. أنا شخصياً أعطيت صاحبي كمبوتشا ونسيها برا فترة طويلة وطلع له طبقة سكوبي صغيرة بدون ما يسوي شيء!
• هل فطر السكوبي أو الكمبوتشا ممكن تعفن؟
  نادر جداً إنه يحصل، بس لو حصل حتعرف من رائحته وممكن كمان تشوف علامات عليه وتقارنها في الانترنت بالسكوبي المتعفن، بس الرائحة حتكون أهم علامة + الناتج اللي بيطلع منه.
  كل عملية تخمير مختلفة عن الثانية، وممكن أحياناً يصير شيء يخلي الكمبوتشا تعفن وقت التخمير لو بالغلط مثلاً ما كانت العلبة نظيفة أو تعرضت لشمس أو ما قفلت عليها بشكل ممتاز. بس من تجربتي ما واجهت مشاكل بالذات لما اتبعت الخطوات.
• كم مدة تخمير الكمبوتشا؟
  تختلف حسب درجة الحرارة بس المتعارف عليه من 7 – 12 يوم. مثلا في الصيف أنا المدة 8 أيام أشوفها كويسة في الشتاء ما جربت بس حزود المدة كم يوم الى ما اوصل لطعم اللي يعجبني. لو ذقت الكمبوتشا ولسه فيها طعم حالي، اصبر عليها شوية. من الرائحة كمان ممكن تعرف قد أيش صارت جاهزة. بس صعب تكون أقل من 7 أيام. الفطر يحتاج وقت عشان يخمر الشاي ويحلل السكر.
• هل فطر السكوبي شيء مقرف؟
  كثير يجيني دا الشيء إنه الناس تقرف من السكوبي عشنه فطر وشكله غريب وجيلي كده. شخصياً أنا كنت أبغى واحد من زمان فصراحة أقدسه مره وأعرف إنه نوع من أنواع الحياة وفائدته عالية! ولو كنت تحسبه مقرف أو ممكن يجب المرض ففطر السكوبي يحارب وبقوة أغلب أنواع البكتيريا السيئة اللي ممكن تحاول تنمو عليه أو في بيئته! لو الامتنان لفوائده ورهابته ما راح يساعدك تتخطى حاجز القرف منه فما أدري ايش ممكن صراحة

كتبت في: كيف أسوي كمبوتشا؟ - كشميري.

لما بسافر بجرب كثير الكمبوتشا، ومره مبسوط بطعمها وكيف كأنها مشروب غازي وكمان مفيدة ألف! ومليانة probiotic.

في السعودية صرت بدور على مكان يبيع كمبوتشا أو شخص عنده Scoby عشان أقدر أبدأ أنا أسوي كمبوتشا. فقررت أسوي هذا الدليل وأجمع جميع المتاجر اللي أحصلها هنا.

كمبوتشا في جدة

• Lava of Kombucha
  كمبوتشا وسكوبي ممتازين جداً (شحن جميع مناطق المملكة)
• متجر طُعمة طَيبة
  كمبوتشا وخيارات أخرى صحية ونباتية.
• كمبوتشا جدة
• Gut Revolution – كمبوتشا، ساوركراوت، ساوردو.
• The flow
  محل عنده كمبوتشا، مخمرات، وكمان خيارات أكل صحية ومتنوعة وأنظمة ديتوكس.

• Health in a Jar
  كمبوتشا، مخبوزات ساوردو، ساوركراوت.
• kombucha_for__healthylife – كمبوتشا وسكوبي (جدة – مكة-الطايف)
• 4Health Probiotics – كمبوتشا وسوركراوت.

كمبوتشا في المدينة المنورة

• كمبوتشا المدينة – المدينة المنورة
• Nnature.369 – المدينة المنورة
• khadija.11195 – سكوبي وكمبوتشا

كمبوتشا في ينبع

• Kambucha Factory
• مزرعة هديل

أخرى

• متجر أرض – سكوبي، مخمرات خضار، خميرة، كيفر.
• BOOCHAI Kombucha – نقاط بيع في جدة، الرياض، الظهران.

روابط مفيدة

• البروبياتك (البكتيريا النافعة) – أماني دغريري
• Which Probiotics are Best

هل في متاجر ثانية في السعودية يبيعوا كمبوتشا؟ ياريت تكتبهم في التعليقات، عشان أضيفهم.

دليل السعودية الصحي

كتبت في: دليل متاجر الكمبوتشا في السعودية - كشميري.