خليني أحيكك من تجربتي، كيف أحسن طريقة تسمع لبرامج البودكاست وتحسن من تجربتك. وأيش ممكن أنت مفوت على نفسك الآن!

أفضل تطبيقات البودكاست

قائمة ببعض أهم وأفضل تطبيقات الإستماع للبودكاست المتوفرة على الأيفون والأندرويد.

• Pocket Casts
  التطبيق المفضل ليا أستخدمه من سنين وأشوف فيه جميع المزايا المهمة والأساسية، وسهل في الاستخدام.
• Castbox
• Acast
• Overcast (iOS)
• Castro (iOS)
• Apple Podcasts
• Google Podcasts
• تطبيقات الموسيقى: أنغامي – Spotify وغيرهم…

مميزات تطبيقات البودكاست

في مميزات مختلفة تخلي تجربة إستماعك للبودكاست مميزة ورهيبة لما تسمع من واحد من هذي التطبيقات المتخصصة. تحديداً زي تطبيق Pocket Casts الشامل لجميع هذي المميزات.

1. تحميل الحلقات Offline
   تقدر تحمل الحلقات اوفلاين، وتسمعها وقت ما تحب بدون الحاجة لوجود إتصال بالإنترنت.
2. تذكر مكان التوقف
   يتذكر التطبيق فين وقفت في الحلقة وترجع تكمل من مكان ما وقفت.
3. الاشتراك والتنبيهات
   تتابع البرامج اللي تحبها وتقدر تفعل التنبيهات بالحلقات الجديدة، عشان تعرف اول ما تنزل.
4. وصف الحلقة Show note
   تقدر تشوف وصف الحلقة ومعلوماتها ووصول سريع لروابط المذكورة في الحلقة.
5. الاقسام Sections
   من المزايا الجديد المدعومة مؤخراً في البودكاست، هي ميزة الأقسام داخل الحلقة وسهولة التنقل بينها حسب مواضيع الحلقة في حال كانت مدعومة من برنامج البودكاست اللي تتابعه.
6. تقديم الحلقة او التأخير
   من المشغل بسهولة تقدر تقدم الحلقة مثلا 15 ثانية أو تعيدها للخلف 15 ثانية في حال شيء فاتك وما انتبهت له.
7. تسريع الحلقة أو التبطيئ
   تقدر تسرع الحلقة أو تبطئها، على درجات مختلفة حسب ما يناسبك. ميزة وفرت علي الكثير من الوقت.
8. مؤقت النوم Sleep timer
   كثير من الناس تحب تسمع البودكاست قبل ما تنام، ميزة مؤقت النوم تساعدك تخلي التطبيق يتوقف بعد مدة زمنية معينة أو عند إنتهاء الحلقة.
9. شغل بعده Play next
   هذي الميزة تخليك تحط حلقات مختلفة للقائمة، وفي حال أنتهت حلقة يشغل الحلقة اللي بعدها. مفيدة وقت قيادة السيارة أو لما ما يكون عندك وصول سهل لتحكم بالجوال.
10. رفع الصوت Boost volume
    بعض برامج وحلقات البودكاست تكون درجة الصوت فيها منخفضة جداً، هذي الميزة تنقذك وتساعدك ترفع الصوت عن الحد الأعلى لتستطيع الاستماع لها.
11. اختصار لحظات الصمت
    هذي الميزة تختصر لحظات الصمت في الحلقة، وتوفر عليك الكثير من الوقت وقت الاستماع.
12. المزامنة
    تطبيقات البودكاست توفر لك المزامنة مع جميع أجهزتك المختلفة، ممكن تكون بتسمع من الجوال وتقدر تروح للكمبيوتر وتكمل استماعك من نفس المكان لو كان التطبيق يدعم المتصفح أو الكمبيوتر.
13. تذكر الحلقات
    التطبيق يتذكر أيش الحلقات اللي انتهيت من سماعها واللي الى الآن لم تسمعها.
14. المفضلة
    تقدر تفضل الحلقات المهمة بالنسبة لك، عشان تقدر ترجع لها ثاني في أي يوم.
15. فلاتر مخصصة
    توفر بعض تطبيقات البودكاست خصائص وفلاتر لتصنيف البرامج والحلقات حسب عدة عوامل مختلفة أنت تقررها.
16. إحصائيات الاستماع
    توفر لك تطبيقات البودكاست إحصائيات بمعدل إستماعك للحلقات والوقت اللي قمت بتوفيره باستخدام مميزات التطبيق المختلفة.

أشياء أتكلمت عنها

• كيف تبدأ بودكاست؟
• روابط حساباتي وموقعي

كتبت في: كيف أسمع بودكاست 🎧 - كشميري.

كورس البودكاست
لو مهتم تحضر كورس شامل ومبسط ياخذك في كل التفاصيل اللي تحتاجها خطوة بخطوة ويختصر عليك الكثير سجل معايا في كورس البودكاست.
واستخدم هذا الكود للخصم: 8k4nd2k

كتبت في: كيف تبدأ بودكاست؟ 🎙 - كشميري.

1- بودكاست عربية تعجبني

• سوالف بزنس
  أحب مشهور الدبيان واللي يقدمه، وهذا بودكاست رهيب وتزبيد عن البزنس.

• عيب
  مختلف ويجيب المواضيع اللي محد يتكلم فيها.

• جسدي
  يتكلم عن الجسم المواضيع متنوعة وتجارب وآراء الأشخاص مختلفة.

• طاقة حب
  أخيراً بودكاست عربي متخصص ويتكلم في مواضيع لها علاقة بالروحانيات، مميز مرة.

2- بودكاست أجنبية تعجبني

• The GaryVee Audio Experience
  بودكاست من مقابلات يسويها (غاري في) سواء في يوتيوب أو ستريم وتحول لبودكاست. تعجبني جرعة جيدة في ريادة الأعمال وصناعة المحتوى.

لو تبغى تكتشف برامج بودكاست عربية زيادة شوف موقع البودكاست العربي فيه دليل لبرامج البودكاست العربية حسب التصنيفات.

كتبت في: برامج بودكاست أحبها - كشميري.

لما بدأت أسوي برامج بودكاست كنت بدور على طريقة عملية أتابع فيها التقييمات “Reviews” على iTunes بالذات إنه في تقييمات ما تظهر لك لو مثلاً كانت في الستور الأمريكي (US).

دورت عن خدمات ومواقع توفر الخدمة هذي ولقيت! أغلبها مدفوعة بس لقيت خدمة مجانية وعجبتني.

مواقع متابعة تقييمات البودكاست:

• PodcastReviews.me – موقع يوفر كذا باقة منها مجانية، ويرسل لك كل فترة التقييمات، بحكم أنه تجربتي مع الباقة المجانية فأحياناً مو كل التقييمات تظهر، ولكن ممتاز بشكل عام وكخدمة مجانية.
• Chartable – الخدمة مخصصة لإحصائيات البودكاست، تقدر تسجل فيها وتتابع التقييمات على بودكاستك، أو تبحث عن بودكاستك بدون ما تسجل.
• My Podcast Reviews – خدمة مدفوعة متخصصة في تقييمات البودكاست.
• Ratings Catcher – خدمة عامة، تخليك تتابع تقييمات بودكاست، تطبيق، أو مطعم.
• Review Bot – خدمة عامة، تخليك تتابع التقييمات للتطبيقات أو البودكاست.
• Podrover – خدمة مدفوعة متخصصة في تقييمات البودكاست.

تحديث:

على موقعي البودكاست العربي أشتغلت على تطويرات جديدة وأضفت قسم جديد لتقييمات ويسوي مزامنة بشكل مستمر لتقييمات المنشورة على متجر آيتونز (Apple Podcasts) ويعرضها لك على الموقع من مختلفة الدول. راح تتفاجئ بتقييمات ما كنت تعرف عنها. ضيف بودكاستك لدليل البودكاست العربي. وحتقدر كمان تتابع التقييمات وترد عليها.

كتبت في: متابعة تقييمات بودكاستك - كشميري.

الي أستوعبته إنه اللي تحتاجه بشكل أساسي هو رابط خلاصة RSS feed تحتوي على حلقاتك ومعلومات عنها، بدون خلاصة RSS أنت ما تعتبر بتقدم بودكاست على الإنترنت.

سجلت حلقة بودكاست بعد ما نشرت هذي المقالة بفترة، أتكلم فيها عن كيف تبدأ بودكاست فيها معلومات وتفاصيل أكثر لو مهتم.

فين البودكاست ينحط؟ (مقدم الخدمة)

طيب الآن نجي لموضوع مقدم الخدمة أو مستضيف البودكاست (Podcast Hosting)، فين حتحط البودكاست حقك والمقاطع الصوتية؟ ممكن حتختار SoundCloud أو ممكن حتروح لواحد من الخدمات الشهيرة والمختصة زي:

• Libsyn
• Blubrry
• PodBean
• buzzsprout
  وغيرهم كثير يحيروك أكثر.

في ناس كمان يحطوا البودكاست حقهم على سيرفر شخصي، وهو خيار ما اخترته ولا أنصح فيه، لما تسوي بودكاست حتحتاج لسيرفر ومقدم خدمة مختص في البودكاست عشان تضمن، إنه حلقاتك تكون متوفرة أغلب الوقت بدون مشاكل لإنك هنا بتتعامل مع ملفات صوتية تستهلك مصادر من السيرفر في كل عملية تحميل، وتبغى السيرفر يكون معد ومختص في معالجة الملفات الصوتية.

الي حتستفيده من مستضيف البودكاست المختص، إنه راح يوفروا لك مميزات إضافية ومختصة بالبودكاست، زي إحصائيات الحلقات، عدد الإستماعات، المناطق الجغرافية، معدل الإستماعات وغيره من المعلومات اللي راح تكون مفيدة لك لو بتأخذ هذا المجال بشكل إحترافي.

طيب مين أختار؟

حرفياً هذا أكثر شيء كان محيرني، مقدمي الخدمات كثار والخدمات اللي يقدموها والباقات مختلفة وكل أحد يقول لك كلام يحيرك أكثر وأكثر، خليني أفصل لك أكثر كيف أنتهيت من صداع كم يوم وأنا محتار لكيف عرفت أيش أبغى.

خلينا أول شيء نقسمهم الى قسمين 1- مقدم الخدمة المختص بإستضافة البودكاست 2- منصة SoundCloud.

1- مقدمي الخدمات المختصة

في هذي الفئة أنا بتكلم عن Blubrry, Libsyn وغيرهم..

ميزتهم: إختصاصهم في تقديم خدمة إستضافة البودكاست، وتوفيرهم لكثير من المزايا المختصة في البودكاست.

بالتالي أنت بتضمن أعلى جودة وأفضل خدمة إحصائيات، وتضمن توفير خلاصة RSS خاصة فيك، تستخدمها ﻷضافة البودكاست حقك على iTunes, Stitcher وغيرها من المنصات.

وطبعاً راح تلاقي فوارق بين كل مقدم خدمة، الباقات تختلف حسب المساحة الشهرية المسموح لك فيها برفع حلقات، المميزات الإضافية وغيره… ولازم بنفسك تراجع كل واحد عشان تلاقي الأنسب لك.

2- منصة SoundCloud

ميزتها: أكبر ميزة لساوند كلاود تشجعك على الإشتراك معهم، هي توفر حلقاتك على منصة تساعد البودكاست في الوصول الى شريحة مستمعين أكبر.

طيب خلينا نتفق إنه ساوند كلاود غير مختص بالبودكاست أبداً، والسنة الأخير بدأ أخيراً يوفر خصائص وخيارات لصناع البودكاست.

مثال: ميزة جدولة الحلقات، لنشرها في وقت معين، هذي الخدمة كانت قبل متوفرة عند مقدمي الخدمات المختصة فقط، الى ما أضافها أخيراً ساوند كلاود، برضوا ساوند كلاود يدعم الآن ميزة توفير رابط خلاصة RSS خاصة بالحلقات اللي تنشرها وتقدر تستخدمها لإضافة البودكاست على iTunes.

أيش أخترت؟

طيب خلينا نبدأ بـ بودكاست Saudi Veggie أول بودكاست بدأته وكنت أحتاج مكان أرفع فيه الحلقات ويوفر لي خلاصة RSS، الخيارات كانت كثيرة زي ما قلت وكنت متلخبط مره، كان عاجبني المميزات اللي توفرها إستضافات البودكاست المختصة، وفي نفس الوقت كنت شايف منصة ساوند كلاود مهمة لتواجد البودكاست فيها كمنصة تساعدك في النشر والوصول. 

المميزات لو اخترت SoundCloud:

• راح أقدر ارفع عدد لانهائي من الملفات والدقائق بدون حدود.
• تواجد ووصول أفضل، بانه البودكاست يكون متوفر على منصة ساوند كلاود.
• راح أوفر دفع باقتين مختلفتين عشان البودكاست يكون متوفر على سيرفر وبعدين على ساوند كلاود.

العيوب:

1. إحصائيات مختصة أقل للبودكاست.
2. رابط خلاصة RSS باسم ساوند كلاود مو موقعي الخاص، أنا ما أشوفها مره مهمة غير لو أنك مختص وتحب تسوي كل شي بشكل مرتب. عيبها الوحيد إني لو أضفت خلاصة ساوند كلاود مثلا على iTunes وفي يوم قررت أغير الخدمة راح أقدم طلب لايتونز بتغيير رابط الخلاصة، بينما لو كان الرابط: “http://saudiveggie.com/podcast/feed” حيكون التحكم بالكامل عندي على نفس الدومين.
3. تطبيق ساوند كلاود مو أفضل تجربة للإستماع للبودكاست، ولكن يفضل هذا خيار شخصي يقرره المستمع بنفسه.

طيب خليني أقولكم إنه ساوند كلاود بدأ يصير الخيار الأنسب لي، رغم إنه مختصين كثير على الإنترنت ما ينصحوا فيه للبودكاست، أنا كل اللي كان موقفني أول عيبين، بس لقيت لهم حلول!

الحلول:

1. عشان أحل مشكلة الإحصائيات، ربطت خلاصة ساوند كلاود بخدمة Podtrac المجانية، اللي تقدم لك إحصائيات مفصلة أكثر للبودكاست حقك، بكذا صار عندي إحصائيات ساوند كلاود، وكمان مدعمة بخدمة زيادة اللي هي Podtrac.
2. بالنسبة لمشكلة رابط الخلاصة، هنا لقيت الحل عن طريق إني أستخدم إضافة Bluburry للبودكاست على ووردبريس PowerPress، الإضافة تساعدك إنه تنتج خلاصة RSS خاصة فيك وبرابط موقعك، فصرت بالتالي أرفع الحلقة على SoundCloud وبعدين أربط رابط الملف mp3 في الموقع باستخدام إضافة PowerPress وبكذا التحكم في خلاصة RSS يصير بالكامل في يدي، يسسس!

تجربتي مع SoundCloud:

من تجربتي مع ساوند كلاود بالطريقة اللي سويتها، مرتاح جداً، فأنا برفع الحلقات على سيرفرهم وبتتوفر على منصتهم، وفي نفس الوقت بستضيفها على خلاصة برابط موقعي، فالتحكم بالكامل عندي أقدر اغير وصف الحلقة أستخدم HTML tags في الوصف، واستفيد من المزايا اللي مهي متوفرة في خلاصة ساوند كلاود.

الزبدة:  لو يهمك البودكاست حقك يكون متواجد على ساوند كلاود كمنصة وفي نفس الوقت ما تبغى تدفع مصاريف إضافية لكذا مقدم خدمة مختلف، فهذا أنسب خيار لك. أحياناً ممكن ما يفرق معاك ترفع البودكاست على ساوند كلاود، وهنا حجي للبودكاست الثاني اللي بدأته وليش هذي المرة ما راح أستخدم ساوند كلاود أبداً.

تجربتي مع Pinecast

وأنا أدور في بدايتي على مقدم خدمة مثالي أشترك معاه، أكتشفت Pinecast وهي منصة جديدة لتوفير خدمات إستضافة البودكاست، والباقات المتوفرة عندهم مثيرة للإهتمام وتوفر كثير من الإحتياجات اللي أبغاها، أكثر شيء عجبني إنه باقتهم الأساسية اللي ب 5$ رهيبة مرة، وتخليك تستضيف أكثر من بودكاست في نفس الباقة.

تفاصيل الباقة (STARTER):

• السعر: 5 دولار لشهر.
• المساحة المتاحة في الشهر: غير محدود.
• الاستخدام العادل: في حد معين 64mb كحد أقصى لمساحة الحلقة الواحدة في كل عملية رفع.
• الإحصائيات: إحصائيات بسيطة عن عدد الإستماعات، الإشتراكات، ومصادر الإستماع.
• عدد البرامج: غير محدود.

فضلت أشترك في Pinecast لما جيت أسوي بودكاست شطحة، وهوا بودكاست شخصي وليا، ومو مهتم أبداً إنه يكون موجود على ساوند كلاود كمنصة، وفي نفس الوقت إحتمال أكون مهتم أبدأ برامج بودكاست ثانية، فميزة الإشتراك في Pinecast إنه في اي وقت لو قررت ابدأ بودكاست ثاني، أقدر بدون ما أحجز باقة ثانية وأدفع مصاريف مالها داعي كل شوية إني أبدأ البودكاست وراح يكون في رابط خلاصة RSS منفصل لكل بودكاست، أظن ما في أي مقدم خدمة بودكاست ثاني يوفر هذي الميزة.

هل في عيوب؟

• خلاصة الـ RSS رابطها حيكون على الدومين حقهم لو هذا يفرق معاك، ويوفروا خيار redirect لو قررت تنقل لمشترك ثاني.
• مساحة الحلقة الوحدة لازم ما تتجاوز 64mb، بس بالنسبة لي مو مشكلة لانه متوقع الحلقات ما تتجاوز هذي المساحة، ولو تجاوزت في النادر فكل شهر حيكون عندي 64mb إضافية لمساحة الحلقة في حال تجاوزتها. فلو مثلا: سجلت حلقة وكان حجمها 90mb حقدر أرفعها ويبقى عندي لسه 26mb إضافية في الشهر.

الزبدة: بالنسبة لي المميزات تغطي كثير على العيوب والحدود البسيطة، خدمتهم جديدة والي شغالين عليها podcasters في الأساس، ومتحمسين يطورا ويحسنوا عليها كثير، عندهم كمان باقة ثانية مثيرة للإهتمام مناسبة لشبكات البودكاست اللي عندها برامج كثيرة، وبينزلوا حلقات بشكل مستمر ويحتاجوا خيارات أكثر وإحصائيات متقدمة.

لو مهتم تشترك معهم هذا كود خصم وفرته، تقدر تستخدمه وقت التسجيل وحيعطيك خصم 40% لأول أربعة أشهر لك.

كود خصم:  r-e95e7f

خلاصة كل دا الكلام، إنه الموضوع يفرق حسب إحتياجك الشخصي، لو كنت مهتم تبدأ برامج بودكاست مختلفة أو لسه تبغى تجرب كذا شيء، أنصحك جداً بـ Pinecast راح يريحك كثير ويخليك تأخذ راحتك في التجارب وإنتاج برامج مختلفة وكمان المشغل حقهم على Web لطيف وشكله مرتب، ولو تحتاج بودكاستك يكون موجود على SoundCloud وهذا يفرق مع مستمعينك والفئة اللي تبغى توصل لها فاشترك مع ساوند كلاود، بس أهم شي فعل خلاصة RSS لانه البودكاست بدون RSS ما يعتبر بودكاست.

لو بدأت بودكاستك الشخصي، لاتنسى تضيفه في دليل البودكاست العربي من صفحة أضف بودكاست.

روابط مفيدة

• موقع وبودكاست بث كاست – يعلمك كل شيء تحتاج تعرفه عشان تبدأ بودكاست.
• طريقة اضافة بودكاست الى ايتونز باستخدام ساوندكلاود (فيديو)

تحديث:

مؤخراً بشوف خدمة Anchor طالعة بشكل جيد وقوي، وباقتها مجانية بالكامل! أنصحكم تشيكوها كبديل مجاني وما عليها أي حدود.

كتبت في: فين تستضيف البودكاست حقك؟ - كشميري.