أيش أسوي؟

المهم بدأت أفكر في حلول أيش أسوي، أمازون حالياً مقفل التوصيل لأغلب المنتجات بسبب Covid-19 ولا كان طلبت علبة بديلة بسعر كويس من أمازون.

جربت استخدم لصق بس ما فاد واستمر التسريب.

الحل

سوبر قلو ياحبيبي! بحثت أون لاين ولقيت ناس كثير يصلحوا البلاستيك بخليط من Super Glue مع Baking soda.

أيش نحتاج؟

1. Super Glue – سوبر قلو
2. Baking soda – بيكربونات صوديوم
3. Sandpaper – ورقة صنفرة (اختياري)

الطريقة

1. أضيف super glue على المكان المكسور، أو الفراغ اللي أبغى اصلحه.
2. مباشرة أرش فوقه baking soda، وأنفض الباقي منها.
3. أعيد الخطوات رقم (1 و 2) عشان أسوي طبقة ثانية.
4. أنفض كل الباودر الزايد، وأتركه ينشف شوية.
5. الخطوة الأخيرة: تنعيم الطبقة اللي سويناها بورق الصنفرة حسب رغبتك.

النتيجة

سويت أختبار بعدها وحطيت موية في علبة الخلاط، وزبط!! ما نقط ولا نقطة!
الطريقة طبقتها من خارج الخلاط عشان ما يكون في أي غراء جوا الخلاط نفسه.

خليته ينقع تقريباً يوم كامل في موية، جربته حتى لما أخلط أشياء درجة حرارتها عالية أو باردة، كله مشي تمام حمدلله

التجربة ناجحة بكل المقاييس وخلتني أقدر أرجع أستخدم خلاطي في شيء سحري لما تخلط super glue مع baking soda يسوي طبقة قوية ومتماسكة.

فيديو على YouTube لطريقة

نصيحة شخص ندمان: ألبس قفازات عشان تحمي يدك من السوبر قلو.

كتبت في: كيف صلحت بلاستيك مكسور - كشميري.

أيش ميزته؟

الـ Vitamix خلاط سوبر! مهو زي أي خلاط ثاني تعرفه، يساعدك تخلط كل شيء، بالذات لو بتخلط فواكه مع خضار، ما راح تبقى قطع صغيرة فيه مزعجة في النهاية، زي الخلاطات العادية. وهذا الشيء حيساعدك ويعطيك هضم أسهل، لأنه الخلاط سوا أغلب الشغل لك.

كل شيء!

الخلاط يخلط لك حرفياً كل شيء تقريباً، أحيانا أحط فيه أعشاب وأحياناً أشياء سميكة زي مثلاً عيدان القرفة (cinnamon) وأطحنها بودرة. Markus كمان يحط فيه أغصان شجر أظن وصلت الفكرة.

زبدة المكسرات

كمان الفترة الأخيرة صرت أسوي بيه زبدة الفول السوداني Peanut Butter مره ممتاز الخلاط فيها، تاخذ تقريباً 5 دقائق الى ما يطلع الزيوت منها والأفضل دائماً تكون محمصة. العيب الوحيد تنظيفه بعدها صعب شوية، بس حل مثالي لو ما عندك معالج طعام وتبغى تسوي زبدة مكسرات.

فين لقيته؟

لما جيت أدور عليه في جدة أو السعودية ما لقيت أي مكان يبيعه، وحاولت أطلبه من أمازون. كانت الخطة إنه أطلبه من أمازون UK عشان يجي 220 فولت، يناسب أفياش كهرباء السعودية.

بس مع الأسف بعد ماطلبته وجاء رجعته، لإنه طلع في شيء ثاني مهم في الأجهزة الكهربائية، وهوا تردد الـ Hertz. السعودية تقبل 60 هيرتز بس، وبريطانيا أجهزتها 50 هيرتز، وبالتالي ممكن يأثر على الجهاز فما حبيت أخاطر ورجعته.

تخيل معايا انه اجهزة امريكا تقبل 60 هيرتز بس كهربتهم 110! المعضلة اللي احنا فيها حقيقية لا هذا ولا هذا. تأكد دائما لما تشترتي اجهزه كهربائية من برا السعودية انه تكون 220 وكمان الهيرتز تكون تقبل 60.

(في ناس شفتهم اشتروه من أمازون بريطانيا وشغال معاهم في السعودية)

بعدها أكتشفت إنه عندنا وكيل في السعودية رسمي، يبيع النسخة التجارية منه، اللي مخصصة للمحلات والمطاعم، وهيا نفس اللي أنا أبغاها. الجهاز يشتغل على كهربتنا ويقبل 50/60 هيرتز. الوكيل اسمه المحتسب، والنسخة اللي يبيعها اسمها (Vitamix prep 3)

أماكن البيع في السعودية

• شركة فتحي المحتسب للتجارة – عندهم إصدار Vitamix prep 3
• متجر Tavola
• أمازون Amazon
• موقع نون noon
• متجر Soca (متوقف لديهم)

خلاصة تجربتي

الخلاط له معايا تقريباً أكثر من 3 سنوات، وما شاء الله مره ممتاز. واستخدمه يومياً وأكرفه.

اليوم صرت أشوف خلاطات كثيرة ممتازة فمو شرط تجيب Vitamix بالذات إنه سعره غالي شويتين. فابحث كويس وأتأكد أنك تحتاجه، ولو أخذته حيكون إستثمار ممتاز في صحتك أو مشروعك.

كتبت في: خلاط Vitamix فيتامكس في السعودية - كشميري.