في هذي الحلقة رحلة في تأمل معاني ولا معاني الحياة.

• كل أحد حيقولك معنى مختلف للحياة
• الحياة اللي باين انها مصممة عشان ما نعرف معناها
• مهما حاولنا
• وكل ما نحاول أكثر كل ما المعنى يبعد أكثر
• وكل ما أعتقدنا اننا وجدنا معناها وسببها الأوحد تغير المعنى
• السؤال في هذي الحالة أهم من إيجاد الجواب

بشار Bashar

• الحياة مفرغة من المعنى، لا يوجد لها معنى.
• وهذي أكبر هدية من خالق هذا الوجود.
• أحنا نختار ونحط المعنى والسبب اللي نبغاه.
• لو كان في معنى حقيقي للحياة حنكون عبيد لهذا المعنى كلنا.
• محا تكون الحياة حرة ونعمة لنا إنه أحنا نختار معناها.
• سببك في الحياة أنك تكون أنت بكاملك قد ما تقدر.

حقائق عن الحياة

• نقدر نقول انه في حقائق أساسية نعرفها عن الحياة:
• الحياة والموت
• السبب والنتيجة
• الازدواجية

المزيد في حلقة المبادئ الهرمسية.

“معنى الحياة هو مجرد أن تكون حي. إنه سهل وواضح وبسيط جدًا. ومع ذلك، يندفع الجميع في ذعر شديد كما لو كان من الضروري تحقيق شيء أبعد من أنفسهم.”
The meaning of life is just to be alive. It is so plain and so obvious and so simple. And yet, everybody rushes around in a great panic as if it were necessary to achieve something beyond themselves
— Alan Watts

الرغبة في المعنى

• أحد أهم مصادر الألم للبشر هو الشعور بعدم وجود معنى في حياة الشخص.
• لما نحس اننا جزء من مجموعة أو مكان نحس أننا بنمشي على خطة.
• ولما يكون في خطة وسبب، بالتالي نحس انه كل شي له معنى في الحياة ونحس بالرضا.
• ممكن نقول اننا هنا نختبر ونعيش الحياة زي ما هي بدون معنى وبالمعاني اللي احنا نختارها.
• لا تضيع وقتك تقنع الناس بمعنى الحياة الخاص فيك.

“الحياة لا تطاق ولا تحتمل ليس بسبب الظروف، ولكن فقط بسبب الافتقار إلى المعنى والغاية.” مثال إيجاد علاج لمرض أو ألم نفسي.“
Life is never made unbearable by circumstances, but only by lack of meaning and purpose
— Victor Frankl

قيمة الحياة والأشياء

• لما نهدأ ونبدأ نراقب الأشياء البسيطة العادية ودماغنا يهدأ حنبدأ نشوف الجمال والقيمة في كل شيء.
• هذي هي موهبة المصوريين والفنانين.
• ما بنشوف جمال وقيمة الحياة، لأننا دائماً بنسعى لـ بعدين.
• العالم زي ما هو حالياً رهيب.

التوتر والهلع

• ناس كثير في توتر وإكتئاب عشان تكتشف معنى للحياة وسبب لتواجدها.
• البحث عن معنى قد يتحول لألم ومعاناة وتعلق في الرغبة لوجود معنى.
• مو لازم يكون في جواب.
• تقدر ترتاح لهذي الفكرة.
• وتبدأ حبة حبة تسوي وتفعل الأشياء اللي تعطي حياتك المعنى اللي أنت تبغاه.
• أفعل ما تريد بدون أن تؤذي أحداً.

“الإنسان لا يسعى لسعادة بل لمعنى يجعله سعيد”
— فيكتور فرانكل

في النهاية

• مو “الحياة مالها معنى فالبتالي ما في معنى لاي شيء” أكثر “الحياة مالها معنى، فأختار المعنى اللي قلبك يبغاه”.
• لو حاس بثقل وصعوبة في الحياة تذكر انها لعبة روحية وبسط احساس التحديات حقتها.
• وأخيراً بسبب إنه الحياة مالها معنى محدد كذا الحياة صارت تحتوي كل المعاني.

أشياء أتكلمت عنها

•  Alan Watts – The Meaning Of Life
•  Happiness is NOT the Meaning of Life – Alan Watts
•  Finding Something to Live and Die For | Viktor Frankl
• Bashar’s Most Profound Speech
• Bashar – Passion Frequency
• كتاب مرآة الذات
• روابط حساباتي وموقعي

كتبت في: أيش معنى الحياة؟ 🎢 - كشميري.

في هذي الحلقة أشارك شوية فلسفات عن نظرتي للوقت والمبالغة في أهميته.

أشياء أتكلمت عنها

• Bashar – You and your time, the relationship
• Alan Watts – Time
• كيف العالم متفق على أيام الأسبوع؟
• روابط حساباتي وموقعي

كتبت في: الوقت المتزحلق ⛷🕐 - كشميري.

في هذي الحلقة أتكلم عن الحماس، واحد من أهم المبادئ اللي أحبها وتفيدني. أيش هو الحماس؟ وكيف ممكن نستفيد منه في حياتنا.

عن الحماس

في عدة نقاط عن الحماس جمعتها من كلام Bashar بترجمها وأشاركها معاك.

• أسأل “أيش أكثر شيء محمسك؟”، وأتبعه.
• الأسباب والتفاصيل ما تهم، بالنسبة للحماس.
• في كل وقت وكل لحظة “أيش أكثر شيء يحمسك؟”
• طل في الخيارات وأختار أكثر شيء محمسك من الخيارات المتاحة.
• الحماس كأنه يقول لك “هذا اللي مفروض تسويه”.
• الأشياء الصغيرة اللي تحمسك هي اللي حتوصلك في النهاية بالأشياء الحماسية الكبيرة، وحتختصر لك الطريق في الوصول لها.
• أتبع الحماس، اللي عندك أعلى قدرة على تنفيذه حالياً.
• مع الوقت حتصير تستشعر ويكون عندك حساسية أعلى لحماسك، وتنتبه له بشكل أوضح وأسرع.
• بالتالي ما راح يصير عندك خيارات كثير تلخبطك وتحتار بينها.
• الحماس حقيبة متكاملة فيها كل اللي ممكن تحتاجه.
• أتبع الحماس بدون توقعات مسبقة لنتيجة.
• ممكن تجيك معيقات، لا تتجاهلها وأتقبلها، حتساعدك تفهم نفسك أكثر وماذا تريد.
• إتباع الحماس، بيخلي حياتك أرهب ومليئة الأشياء المشوقة.

تقدر تقرأ أكثر عن الحماس، كتبت بلوق في الموضوع: كيف يكون الحماس دليلك؟

عند إتباعك لحماسك بشكل مستمر، سوف ينتهي بك المطاف بتحقيق غايتك من الحياة.
― بشار Bashar

أشياء أتكلمت عنها

• البودكاست العربي | دليل برامج البودكاست العربية
• Finding your Highest Excitement
• Some of the Core Concepts of Bashar
• How to Turn Anxiety Into Excitement
• روابط حساباتي وموقعي

كتبت في: بوصلة الحماس 🧭⚡️ - كشميري.

في هذي الحلقة الشاطحة أتكلم عن التشانلينق Channeling. أيش هوا؟ وبعض أنواعه وعلامته، والشخصيات اللي تسوي تشانيل.

---

معنى تشانلينق

طرق من طرق التواصل مع حالات أخرى من الوعي ونقل رسائلها. يكون الشخص شابك على وعي أعلى وينقل منه الحكم والرسائل.
زي التيار يتدفق الكلام لشخص اللي بيسوي تشانل، وينقله بلغته.

• عملية الـ Channel تنقل وعي ومعلومات أعلى.
• تخلينا نشوف مشاكلنا وحلول لها من وعي ونظرة مختلفة. (ما نقدر نحل المشكلة من نفس المنظور)
• تشيل حاجز اللغة – لو أتواصلنا مع كائنات من خارج الكوكب أو ما تتحدث لغتنا وتفهم مفاهيمنا.

---

شخصيات تسوي تشانلينق

بعض أشهر الأشخاص والشخصيات اللي تنقل الرسائل والحكم عن طريق الـ Channeling.

• إبراهام هيكس – Abraham Hicks
  من أشهر التشانلرز في الوقت الحالي، وعندها محاضرات و فيديوهات على اليوتيوب. وإبراهام هو اسم يطلق على مجموعة من الوعي تقوم إستر هيكس بنقل رسائلهم.
• بشار – Bashar
  من التشانلرز المفضلين عندي وبشار ينقل رسائله داريل أنكا وعنده قناة على اليوتيوب.
• RA – The Law of One
  RA مجموعة من الوعي نقلت رسائل كثير للبشر وعلوم مختلفة زي معلومات عن تاريخنا والأهرامات. ونشرت سلسلة من الكتب بعنوان The law of one توثق المعلومات اللي تم نقلها خلال جلسات التشانل.
• نابليون هيل – Napoleon Hill
  كاتب شهير، كتب Think and grow rich و Outwitting the devil وهذا الكتاب مبني على التشانلينق.
• Robert Shapiro
  كاتب، وكتب واحد من الكتب اللي أحبها Animal Souls Speak واللي ينقل فيها رسائل الحيوانات.
• إدغار كايسي – Edgar Cayce
  من أشهر المتنبئين في العصر السابق وعنده الكثير من التوقعات والتنبؤات اللي حصلت بالفعل اليوم! نقل الكثير من المعلومات عن طريق التشانليق.
• Seth Material
  مجموعة من أول الكتابات اللي تنقل رسائل من خلال التشانلينق. مجموعة سيث كان لها أثر كبير في زمنها لتعريف الناس بالتشانلينج.
• Kryon

وغيرهم الكثير.

---

تجربة Darryl Anka

داريل أنكا قام بتجربة، وقت ما كان بيعمل channel لبشار. قام بربط دماغه بجهاز EEG اللي يسجل الموجات الدماغية ويبين النشاط الكهربائي للدماغ. لاحظوا في التجربة أن النقاط المسؤولة عن الشخصية personality في الدماغ تتوقف بشكل كامل خلال عملية التشانل. ويقول “لو انا لست هنا خلال الـ Channel إذاً من يتحدث من خلالي”

من الملاحظات كمان: توجد (حدود محددة set points) في الدماغ، تتحدد في مرحلة الطفولة (خلال أول عشرة سنوات)، ومفروض ما تتغير خلال فترة حياتك. زي سرعة المعالجة Processing Speed، خلال عملية التشانليق هذه الحدود تتغير في خلال ثواني!

التجربة هذي موثقة في الفيلم المنشور First contact.

---

في النهاية

مو الكل راح يؤمن بالتشانلينق وكيف يشتغل. ومو كل شخص يسوي Channel اليوم كلامه حقيقي أو هو صادق. فأنت أسمع منهم واختار مين اللي كلامه فيه رسالة فيها نفع وبيريحك، يفيدك، ويشبك معاك. وباقي التفاصيل مو مهمة كثير.

أشياء أتكلمت عنها

• قناة تلغرام
• First contact – Bashar
• Darryl Anka: Channeling Bashar
• Abraham-Hicks YouTube
• لقاء نادر يتحدث فيه جيري وإستر عن تجربتهم مع أبراهام
• Outwitting the Devil – Napoleon Hill
• Think and Grow Rich – Napoleon Hill
• روابط حساباتي وموقعي

كتبت في: تشانلينق – Channeling 📡 - كشميري.

كتبت في: العوالم الموازية 🌎 - كشميري.

أبغى أحكيك عن الحماس وتأثيره في حياتي، وكيف أستخدمه عشان أوصل لشيء اللي أحب أسويه ومقدر لي.

الحماس أيش هوا؟

الحماس هو البوصلة اللي تقولك من فين الطريق. لما يجيك الحماس لشيء، لا تحاول تفهم كثير ليش الشيء دا محمسك دحين! حاول تركز على إتباع حماسك، حماسك حيدلك على أشياء ثانية تحمسك وطول ما أنت ماشي في هذا الطريق حق “إتباع حماسك” حتطل ورا وحتبدأ تربط الخطوط وتستوعب ليش هذي الأشياء كانت تحمسك وتستوعب كيف هيا مربوطة برغباتك وأهدافك في النهاية.

لا يمكنك توصيل النقاط بالنظر للأمام، فقط بالنظر للوراء يمكنك إتمام تلك المهمة، ولذلك عليك أن تؤمن بأن تلك النقاط ستصبح متصلة يوما ما في المستقبل
― ستيف جوبز

خليني أحكيك عني شخصياً كيف بشوف الحماس مربوط في حياتي، المثال اللي بحكيك هوا دحين هوا اللي حمسني أكتب هذي البلوق. أنا ليا فترة حاس بتقصير في أني أتكلم عن شغلي ومشاريعي وأيش بسوي والتسويق لها. فاليوم بحكيكم عن واحد من مشاريعي، موقع البودكاست العربي.

هرجة البودكاست العربي

في أواخر 2012 كنت على أبواب التخرج من الثانوي وكنت بطور نفسي كثير في صناعة المواقع على الإنترنت، وبحاول الاقي نفسي في المجال. وقتها كنت أحب أسمع بودكاست مرة، وبرامج البودكاست العربية كانت قليلة وصعب تلاقيها، فكرت أنه ليش ما أسوي دليل يوثقها ويسهل أنك تلاقيها وتشوفها حسب التصنيفات، الفكرة بسيطة وكنت مره متحمس أني أشتغل عليها وأسويها، ويكون في شيء يمثل شغلي ومهارتي في تطوير المواقع وتصميمها.

أتحمست مره للفكرة وما فكرت كثير ولا ركزت في كيف هذي الفكرة ممكن ترجع لي بدخل مادي أو تكون مشروع تجاري، بالعكس كنت شايف إنها صعب تكون مشروع يرجع بدخل مادي في أي وقت قريب، ومستبعد الخيار تقريباً. كل اللي فاكره إني كنت متحمس وأبغى أسوي المشروع دا وعندي القدرة والوقت له.

أشتغلت عليه سويته، جهزته، وأطلقته

كان بسيط وبكم بودكاست في هذاك الوقت، ما يتجاوزوا 50 بودكاست. كل فترة شغلي عليه كانت حماسية وأتعلمت منها كثير.

شاركت عنه في تويتر وقتها، وبدأ الموقع ينتشر على خفيف، وينعرف كأهم دليل لبرامج البودكاست العربية ويرشح دائماً لناس الجدد للبودكاست. يبسط

هذا الشيء كان كفاية بالنسبة لي، لكل المجهود. زي ما قلت لكم ما كان عندي توقعات كثيرة له، وكنت أبغى أسوي شيء يساعد الناس يستخدموه ويستفيدوا منه، وفي نفس الوقت يمثلني ويمثل شغلي.

الى هنا القصة عادية وكذا تقريباً أنا في الغالب أشوفها.

الآن مرت تقريباً 7 سنوات من يوم إطلاقة كل فترة أطل لورى وأشبك الخطوط وأستوعب.
اليوم لما أحد يسألني عن البودكاست العربي وإذا يدخل لي فلوس، أرد وأقول: “لا المشروع غير ربحي”، ومو محمسني أوسعه لفكرة تجارية حتى الآن.

بعدين أوقف شوية وأحكي كيف المشروع دا أثر في حياتي اليوم. في أول سنة من إطلاق المشروع جاني أول عميل عن طريق الموقع شافه وعجبه، وأتواصل معايا يسألني مين المصمم عشان يبغى أطور له موقع.

فاكرين لما قلتلكم كنت أبغى شيء يمثلني ويمثل شغلي!

بعدها جاتني أول وظيفة بسبب البودكاست العربي لإنه أحد عرفني عن طريقه ورشحني “كمطور مواقع جيد”، الوظيفة دي طورتني كثير وعلمتني. بعدها صرت أحطه في CV وصار الموقع يتكلم عني لما أقدم على أي وظيفة وأقدر أقول، إنه كان سبب مؤثر في أني أحصل على وظيفتين بعدها وأنا لسه طالب جامعي وبدون شهادة أو مؤهل في المجال.

شغلي كان كفاية إنه يتكلم عني.
فاليوم لما أطل لورا أنا ممتن أني أشتغلت على البودكاست العربي وسويته بكامل حماسي وبدون ما حتى أفكر كيف ممكن يرجع لي بفائدة مادية!

سلسلة الحماس: نفسي أسوي موقع يفيد الناس ويمثلني > أتعلمت كثير > سويته > ناس أكثر عرفت شغلي > وظائف وفرص أكثر جاتني > طلعت فلوس > ونكمل…

أشياء وأمثلة كثيرة ممكن تطبقها على نفس هذا المثال، وتشوف كيف الحماس كان مؤثر في حياتك وحياة ناس ثانيين. الحماس يفتح أبواب.

الحيرة

تعرف لما تكون محتار بين كم شيء ومن جد منتا عارف أيش تختار قلبك يقول لك شيء وعقلك يقول لك شيء، ومنتا عارف تسمع مين أو أصلاً منتا عارف قلبك أو عقلك أي واحد فيهم

هنا يجي دور الحماس في أنه يدلك، لما تكون محتار. وقف وجاوب على سؤال: أيش اللي محمسني أكثر، دحين والآن؟

بعد ما تعرف أيش اللي محمسك، الآن تقدر تاخد برأي عقلك كمان مع حماسك وتوازن بينهم. أنا صار واضح لي إنه حماسي هو لغة قلبي اللي يتواصل فيها معايا!

على طاري العقل، مثلاً أنا لما أشتغلت على البودكاست العربي وقتها، واللي هوا حماسي في هذيك اللحظة، عقلي ما كان في تعارض وقتها، ما كان عندي التزامات مادية أو كنت مثلاً حستثمر مبلغ كبير عشان أشتغل عليه أو حترك مشاريع وأشغال عندي عشان بس أتفرغ له. لا كان في إنسجام بين اللي حماسي بيقولي هوا وبين عقلي اللي كان شايف انه أيوا أستغل وقتك في شيء مفيد حتى لو إني مني شايف كيف حيرجع عليك بمردود كويس.

أعرف متى تسمع عقلك ومتى ما تخليه يأثر. أنت اللي حتقرر.

اليوم أنا أتبع حماسي في كل شيء تقريباً، واحد من أهم الأشخاص اللي انا احبه ويتكلم عن الحماس كثير، ودائما يلهمني هوا Bashar وحترك رابط تحت للفيديو اللي أحبه له، يتكلم فيه عن الحماس.
واحد من الأسباب اللي بدأت فيها هذا الموقع والبلوق هوا الحماس اللي كان عندي في 2017! وهوا نفسه إختفاء الحماس للكتابة الفترة الأخيرة اللي خلاني أبعد.

الحماس أتوجه لشيء ثاني من البلوق بدأت ناس تعرفني أكثر، وأتعرفت على ناس جدد رهيبين! يشاركوني إهتمامات مختلفة، مره يحمس!

الحماس بعدها أتوجه وأتركز على البودكاست الفترة الأخير بدل الكتابة، حماس البودكاست جاء من البلوق في الأساس، في أول تجربة اللي كانت: تجربة يوم بدون كلام.

سلسة الحماس: نفسي أسوي بلوق > سويت بلوق وبدأت اكتب > اوه خليني أجرب أسجل بلوق صوت > بدأت بودكاست شطحة > أتعرفت على ناس رهيبة > ونكمل…

الحماس لما يجيك يفضل يزّن عليك، ما يجي يوم، يومين ويروح طوالي، لو كملت تسحب عليه أكيد بيوقف. والحماس بطبعه متغير ومتجدد.

بس لا تخاف عمره ما يفوتك شيء!

تجديد النية

هدفي من البلوق دا مو إنه أخليك تقدس الحماس أو تتبعه على طول كقانون، الحماس في النهاية ممكن يكون شيء أنا أفضله ويشتغل معايا، بس بالنسبة لك أهميته ممكن تكون غير شوية. نيتي من البلوقه دي إنه أخليك تنتبه له أكثر، وتعطيه إهتمام أكبر.
لما يجيك الحماس، حاول تأخذ خطوة صغيرة في طريقه وشوف هل بتتحمس زيادة وتأخذ خطوة أكبر أو لا. الحماس يجر بعضه فلا تشيل هم أنت أنوي وابدأ في اللي محمسك.

لما تجيني فترات ضياع ولخبطة في الحياة أو شغلي، ومني عارف أرجع أركز من فين. أول شيء اسويه، ابدأ أحاول وأشوف أيش أقرب شيء بيجيب لي حماس حتى لو صغير وأمشي له وأشوف، من بعدها الوضع حيصير كورة ثلج، وكده.

الشغف

يجيني أحياناً سؤال، إنه “أنت كيف تبدأ كذا شيء وبعدين مثلاً ممكن ما تكملها أو تستمر فيها؟”
جواب السؤال: إنه على قد ما الواحد دائماً يحب لما يبدأ شيء يلتزم فيه، فهو في نفس الوقت اهتماماته تتغير وحماسه يتغير. لو الواحد حيفضل قبل كل ما يجي يبغى يبدأ شيء يفكر هل حلتزم فيه أو أكمل، فهو غالباً محا يبدأ شيء. بسبب الحمل والمسؤلية اللي قاعد يحطها.

بالنسبة لي أنا دائماً لما أتحمس لشيء أحب أجرب ابدأ فيه وأشوف أيش يصير. هذا الشيء ساعدني أكتشف شغفي وحبي للكمبيوتر والإنترنت من عمر صغير.
لو أنت من الناس اللي متلخبطة ومهي عارفه أيش شغفها وأيش تحب، فجوابي لك انه حتعرف لما تجرب، جرب كل شيء يحمسك ويناديك، مصيرنا كلنا من كثر التجربة حنلاقي شيء يعجبنا، وحنشبك في خط معاه وحنستمر فيه، وحيكون وقتها هو تركيزنا، وحنكبر فيه.

الشيء اللي يحمسك، حيخليك تمسك القيتار وتقعد تحاول تعزف أيام وأيام، تحاول تزبط النوتة كل خطوة صغيرة بالنسبة لك تجاه المعزوفة حتكون إنجاز، حتكون مستعد تستثمر في القيتار الوقت، الجهد، والفلوس أنك تتعلم، الرسام نفس الشيء، تقدر تشوف المثال في أشياء كثيرة.

الأشياء اللي تحمسك وتستهويك تلاقي نفسك في الغالب علمتها لنفسك! لإنك مستعد تغوص وتنسجم فيها رغم الصعوبات والوقت الكثير إللي تحتاجه عشان تحترفها.

بينما الشخص اللي مو مجاله هذا الشيء حيترك ويوقف من أول كم محاولة، ماراح يقدر يمسك الخط الطويل، حماسه بيدله على شيء ثاني مختلف.

نسيت أقول إنه الحماس مو دائماً طريقه سهل، أحياناً الحماس يصدم فيك في جدار وتلعن أمه من بعدها، بس برضوا شوية وقت، وطل لورا والا ما تعرف إنه الحماس كان نيته طيبة معاك، وكان يبغى يعلمك شيء أو يختصر لك طريق.

نبسّط

من حكم Bashar اللي أحبها، حلخص وأترجم في نقاط:

• الحماس يشتغل زي البوصلة تدلك لشيء اللي مقدر لك تسويه، والطريق اللي روحك تبغاه.
• الشيء اللي يحمسك هو أنت!
• لإنه أنت، حيكون سلس ومنسجم معاك.
• لإنه أنت، الكون حيدعمك تكمل تسويه (مادياً كمان)، وحيخليك تتوسع فيه أكثر.
• لو حماسك بيقول لك تسوي شيء باين إنه تافه أو بسيط مرة، حتى هنا قوم وسويه!
• لإنه سعيك لهذا الشيء البسيط، احتمال يخليك تقابل شخص أو تكتشف شيء، يخليك تتوسع في طريقك.
• كل حماس مع الوقت يدلك لحماس ثاني أكبر منه ومرتبط فيه.
• لا تصر إنه نتيجة سعيك لحماسك تكون زي ما توقعت، حماسك ممكن يعرف شيء أحسن لك.

الحماس هو علامة، على أن ما تنوي القيام به، هو في توافق مع ذاتك العليا، وهذا التوافق هو ما يسبب هذا الحماس.

― بشار Bashar

حماسك وحماسي وصلنا لنهاية هذي البلوق

سؤالي لك، أيش في شيء الحماس كان مؤثر فيه على حياتك، لما تطل لورا دحين؟ وكيف هي سلسلة حماسه؟

فكر مع نفسك وشارك معانا تحت لو أتحمست!

أشياء أتكلمت عنها:

• Finding your Highest Excitement
• Some of the Core Concepts of Bashar
• البودكاست العربي | دليل برامج البودكاست العربي.
• بودكاست شطحة

زر حُب53

كتبت في: كيف يكون الحماس دليلك؟ - كشميري.