تجارب، حكاوي، وشوية شطحات.

السفر حول أستراليا بالباص

كتب في الورشة

بدخل في الموضوع سريع بما أننا هنا في الورشة، وبحكيك عن وسيلة التنقل اللي استعملتها لما سافرت في أستراليا.
لو تبغى تسمع قصتي وتعرف عن رحلتي، تقدر تسمع هذي الحلقة اللي سجلتها في بودكاستِ شطحة: أستراليا: الادمية الأولى 🇦🇺.

طيب ندخل في الموضوع أستراليا قارة كبيرة وواسعة، والمسافات فيها أكبر من ما تتخيل. لما تجي تسافر فيها وتتنقل أفضل وسيلة تنقل هيا الطيران. مع الأسف القطارات مو عملية في أستراليا، وأسعار الطيران أفضل وأسرع منها.

في حال كنت تبغى تسافر لمدينة أو مدينتين ممكن الطيران يكون وسيلة مناسبة لك، وأنصحك تشيك Tiger Air لطيران الإقتصادي جربتهم وكانوا كويسين.

في حالتي أنا كنت ناوي أسافر لفترة طويلة، لمدة شهر وأكثر! وأبغى أتنقل بين مدن مختلفة وأحتاج مرونة عالية في أني أقدر أغير خطتي في حال احتجت. مثلاً زرت مدينة عجبتني وأبغى أطول فيها أو في حال كنت أبغى أتركها بسرعة😁. عشان كده الطيران ما كان أفضل خيار ليا من ناحية المرونة وكمان من ناحية ميزانية سفرتي لأني أبغى أروح وجهات كثيرة.

بحثت عن الباصات 🚍 وأكتشفت إنه في شبكتين للباصات في أستراليا. أكبر وحدة وهي Greyhound Australia، بحثت وتأكدت إنه هيا الخيار المنشود.
أحلى شيء في greyhound إنه عندهم packages مختلفة تساعد كثير وتخليها مغرية.


أيش أخترت؟

في رحلتي كنت بسافر في الساحل الشرقي لأستراليا East Coast. من البكجات المنوعة واللي تقدر تشوفها في موقعهم أخترت “30 يوم Whimit travel pass

الباكج هذا “Whimit” ميزته إنه مفتوح، تسافر في أي وجهة داخل شبكة Greyhound. أخترت باكج 30 يوم، وفي واحد ثاني لـ 60 يوم, وغيره…

الراحة اللي أعطاني هيا كانت مره عالية! تدفع مره وحدة سعر ثابت، وعن طريق الموقع تدخل وتحجز أي عدد من الرحلات لأي مكان جوا أستراليا في خلال الـ 30 يوم. والحلو في حال قررت مثلاً ما تبغى تاخذ رحلة لمكان معين فبكل بساطة تدخل الموقع وتلغي التذكرة وتحجز وحدة غيرها في موعد مختلف.


كيف الراحة؟

طيب الموضوع المهم واللي كثير يبغوا يعرفوه. هل كانت مريحة التجربة؟

قبل لا أقرر أني أختار أسافر بالباص أنا كنت متحمس للفكرة، ومتخيل أغلب الصعوبات. ما كنت حاط توقعات كثيرة. أنا سهل في السفر وما عندي طلبات كثيرة وأبغى أسافر على راحتي وبميزانية تناسبني. وكنت متحمس لفكرة أني أسافر بالباص.

اللي صار أنه الباص كان قد التوقعات وأكثر شوية. مريح وممتاز وما تضايقت أبداً بالتجربة.

أخذت تقريباً 6 رحلات مختلفة بالباص، بدأت من الجنوب في الساحل الشرقي لأستراليا، جمب Sydney وأنهيتها في Cairns في الشمال. لما بدأت الرحلة كان أواخر الشتاء، وأنهيتها في بداية الربيع. أستراليا الجنوب أبرد من الشمال، وكل ما تطلع الشمال تزيد درجة الحرارة. فمساري كان ممتاز مع الجو والتوقيت.

أخذت كذا رحلة مدتها 5-8 ساعات 🕗 وما حسيتها ثقيلة أبداً. كنت جاهز ذهنياً لطول السفرة، ودائماً معايا كتاب، بودكاست، ميوزك، يوتيوب، مسلسلات ،أفلام، وشباك! عشان ما أطفش في الرحلة وأنبسط بالوقت.


مميزاتهم من تجربتي:

  • الـ Packages مختلفة وممتازة للرحالة Backpackers.
  • شبكات رحلات وخطوط كثيرة جوا أستراليا، ولمناطق ما فيها مطارات.
  • باصات ممتازة: مدخل USB – حمام موجود – جديدة ونظيفة.
  • الباصات غالباً مو زحمة، وفي كل رحلاتي اللي أكثر من ساعة كان عندي مقعد فاضي جمبي. Seat x2 unlocked ✨
  • تقدر تختار مقعدك لما تحجز التذكرة من الموقع.
  • تقدر تتبع باصك اللي جي على الخريطة، عشان تعرف كم باقي له ويوصل. (من الموقع)
  • أسعار كويسة ومعقولة.

نصائح سريعة:

  • أحجز تذاكرك قبل بيومين على الأقل، عشان تضمن تذكرة وتختار مقعدك.
  • شيك الـ packages المختلفة وأختار اللي يناسب رحلتك أكثر.
  • بعض الشركات السياحة عندها خصومات على البكجات وسعرها أرخص من الموقع، حاول تبحث عنهم وتسألهم لو عندهم أي عروض، قروبات backpackers حقت أستراليا في الفيسبوك ممكن تساعدك. مع الأسف ما عرفت عن هذا الشيء الا بعد ما حجزت من الموقع.
  • شيك على خريطة نقل Greyhound وتأكد إنه في رحالات للمناطق اللي تبغى تزورها وأنه أوقاتها تناسبك. (خريطة Greyhound)
  • كون في المحطة بدري، قبل وصول الباص بفترة. تفادياً لتوتر والإحراج 😊. تقدر تشيك موقع الباص اللي جيك زي ما قلت، عشان تعرف لو كان حيتأخر، غالباً يتأخر 15-30 دقيقة عن موعده.

 


في بالك كلام؟

  1. 5 فبراير، 2020

    احب اعرف عن رحلتك اكثر؟ ليش رحت؟ مين قابلت؟ ايش في افكار عادات ممكن تشاركها طلعت منها من الرحلة ؟ – احب اسمع صوت مخك الي تكتب به

    1
    1. 6 فبراير، 2020

      قصص الرحلة هذي وثقت جزء منها، في البودكاست. مو دائما بتحمس أكتب عن الرحلات، بس لو صار ليش لا.

حرسلك الأشياء الجديدة قبل أي أحد