قريب سافرنا رحلة طويلة أنا وأصحابي قطعنا فيها السعودية من غربها لشرقها سميناها Cross Saudi 🇸🇦. في هذي الرحلة قررنا إنه بنسافر من الدمام للبحرين ونستخدم الباص كوسيلة لسفر. قبلها أنا ما كنت عارف لو الباصات توصل للبحرين أو لا وكم الأسعار ومن فين محطات التوصيل. فحكيك هنا كل التفاصيل اللي عرفتها من تجربتي.
الباص من السعودية للبحرين
سابتكو SAPTCO
سابتكو هيا “الشركة السعودية للنقل الجماعي” وتوفر عن طريق موقعها حجز التذاكر اون لاين لوجهات كثير داخل السعودية ولدول الخليج.
أسعار التذاكر للبحرين 💵
تذكرة الذهاب وقت ما حجزت كانت 70 ريال. تذكرة العودة لدمام 40 ريال. شيك الأسعار الآن لأنه ممكن تكون أتغيرت.
المحطات
في محطتين تطلع من السعودية للبحرين، الأولى هي المحطة الرئيسية في الدمام والثانية نقطة توقف سريعة في الخبر.
كيف كانت التجربة؟
لو بتكلم عن الباص وراحته فهو مريح وما يفرق عن تجربتي مع باصات أستراليا جودة عالية تقدمها سباتكو صراحة. المقاعد مريحة، وفي كراسي فاضية في الباص رغم إنه إجازة، فمو زحمة في الرحلتين كان.
العيب الوحيد من التجربة واللي كان متعب جداً هو المدة والإجراءات، البحرين قريبة، قريبة مره! بس زحمة الجسر في الإجازة، وإجرائات الجمارك الطويلة تخلي السفر بالباص للبحرين مو أفضل خيار.
إجراءات الجمارك في الباص تطول والشنط تنزل وتتفتش وتوقف في نقطتين جمركية، وكل اللي في الباص لازم ينزلوا عشان يكملوا الإجراءات واحد واحد. فلو حيفرق معاك الوقت والتأخير، والطلعة والنزول فالباص محا يكون خيار جيد لك. لو ما يفرق معاك كثير فتجربتي مع سباتكو ممتازة جداً، وأكيد ممكن أستعملهم في وجهات ثاني جوا السعودية لو أحتجت.
في بالك كلام؟
لم يُذكر مدة الرحلة من الدمام أو الخُبر للمنامة بالبحرين ؟
تقريباً 3 ساعات تزيد وتنقص حسب الزحمة والإجراءات وأتذكر إنه العودة من البحرين لسعودية كانت أقصر وأسهل في الإجراءات من الذهاب للبحرين.
أين موقع محطة في الخبر للباص القادم من المنامة الي الخبر ؟
الرجاء إرسال لوكيشن