أيام الجامعة، كنت أستفيد من قروبات الكلاس مره بالذات لو كنت غايب وأبغى أعرف أيش صار أو في أختبار أو غيره أو أهمها لو الدكتور يبغى يغيب، فا يفكنا ويرسل في القروب ونعرف إنه غايب. قروب الكلاس مره كان له فوائد كتير.
طيب النقطة إنه مو دائماً كان في ناس تطوع وتسوي قروب للكلاس، وأحياناً كنت أنا أتطوع وأسوي قروب بس الموضوع كان قلق الدكتور يحط ورقة وكل أحد يكتب رقمه ومفروض تضيفهم كلهم في جوالك وبعدين تضيفهم للقروب، من جد هيصة وشيء مو عملي ويأخذ وقت.
فبعد ما طفشت من هذا الوضع جاتني فكرة وقررت أسويها.
كيف أسوي قروب واتس اب لكلاس في الجامعة
- أول شيء أسويه أني أسوي قروب واتس اب، باسم الكلاس وأحط صورة حلوة أو أيقونة تمثل المادة.
- أروح لمعلومات القروب تحديداً مكان الإضافة واضغط على “Invite to group via link” أو “دعوة الى المجموعة بواسطة رابط”.
- كذا بيصير عندي رابط أقدر أعطيه اي شخص عشان يدخل القروب عن طريقه، مشكلة الرابط إنه طويل ومو مرتب، صعب إنه أعطيه لأحد يكتبه.
- أروح لخدمة زي bitly.com وأضيف الرابط الطويل، عشان أسوي رابط مختصر مثلاً: bit.ly/class-mis
- بعدها أطلب من الدكتور أني أطلع على السبورة وأحط الرابط هذا أو مثلاً لو في بروجكتر ممكن الدكتور يحطه في ملف وورد بخط كبير.
- أقول لطلاب بعدها يكتبوا الرابط في المتصفح حق الجوال ويدخلهم تلقائياً في القروب 🎉
النتيجة
زبطت! وفجأة في ثواني أعداد مهولة تنضم للقروب بدون أي مجهود أو تعب زي أول. مره الطريقة مريحة. بعدها كمان أحط كل أحد Admin عشان لو أحد يبغى يضيف أي أحد ثاني ما كان موجود في هذاك اليوم، يقدر يضيفه بدون ما يرجع لي.