بساعدك من تجربتي واللي أعرفه وأحكيك كيف البودكاست يشتغل، وكيف تبدأ بودكاستك وتتعامل مع العوائق اللي ممكن تواجهك. حشارك كمان الأسئلة المختلفة اللي وصلتني وأجاوب عليها.
أيش هو البودكاست؟
برامج صوتية تنشر على الإنترنت، تقدر تحملها وتسمع لها في أي وقت. اللي يميزها انها مفتوحة المصدر مو تحت تحكم أحد.
كيف يشتغل البودكاست؟
خلاصة RSS Feed
الار اس اس RSS هي أهم عامل في البودكاست بدونها ما نقدر نقول عن البودكاست بودكاست.
رابط خلاصة RSS يحتوي على ملفات الحلقات الخاصة بالبودكاست ومعلوماته. هذي الخلاصة تكون مستضافة على سيرفر شخصي أو سيرفر لدى أحد مقدمين خدمة إستضافة البودكاست.
تطبيقات البودكاست تقرأ خلاصة الـ RSS هذي وتحمل الحلقات منها.
عشان يكون عندك بودكاست على الإنترنت وتنشره على كل المنصات لازم يكون عندك رابط خلاصة RSS.
تطبيقات ومنصات البودكاست
أهم المنصات والتطبيقات اللي الناس تسمع عليها بودكاست.
- Apple podcasts
متوفر على أجهزة أبل فقط.
منصة Podcast Connect لإضافة بودكاستك على أبل. - Google podcasts
متوفر على جميع الأجهزة والويب.
إضافة بودكاستك على قوقل بودكاست - Pocket Casts
متوفر على جميع المنصات والويب. هذا التطبيق اللي أسمع فيه وأحبه.
للإضافة على منصتهم. - Overcast
متوفر على أجهزة أبل فقط. - Spotify
- Anghami
استضافات البودكاست
بعض مقدمي خدمات إستضافة البودكاست. ترفع عندهم حلقات البودكاست ويوفروا لك رابط خلاصة RSS والخدمات اللي تحتاجها لنشر وتوفير بودكاستك على الإنترنت.
- Anchor
اللي يميز أنكور إنه مقدم خدمة مجاني. أنصح فيه لأي شخص يبغى يبدأ ومو متأكد يبغى يستمر أو لا.
تقدر دائماً تغير مستضيف البودكاست الخاص فيك. مهم وقت التسجيل مع أنكور إنه أنت تسجل بودكاستك بنفسك مع منصة أبل بودكاست، ولا تخلي أنكور يقوم بهذي المهمة بدل عنك. عشان يصير البودكاست مرتبط بحسابك وايميلك تقدر تشوف إحصائيات أبل وفي حال قررت تترك أنكور. - Pinecast
المستضيف اللي أستخدمه من سنين ومرتاح معاه عنده باقات بأسعار كويسة ومريحة بالنسبة لي.
كود خصم r-e95e7f - SoundCloud
ما أنصح بساوند كلاود أبداً زي ما قلت في الحلقة، لإنه مقدم خدمة غير متخصص في البودكاست، الشيء الوحيد اللي يخليني أنصح فيه في حال كان يهمك جداً يكون بودكاستك موجود عندهم. ساوند كلاود يوفر خلاصة RSS فتقدر تستضيف عنده وتنشر على باقي المنصات. - Buzzsprout
- libsyn
- blubrry
- Podbean
- Spreaker
وغيرهم الكثير…
أنواع مايكات البودكاست
في عدة أنواع للمايكات، مهم تعرف الأنواع الأساسية وتفرق بينها.
- ميكروفون الكوندنسر Condenser
المايك من هذا النوع جودته عالية، ولكن يلقط الأصوات البعيدة.أشهر ماكي من هذا النوع Blue Yeti. اللي يميزه إنه فيه مود يخليك تقدر تسجل مع أكثر من شخص بمايك واحد. من تجربتي الشخصية حالياً ما أنصح في هذا النوع لو كان إستخدامك فقط للبودكاست، وأبغى أجرب أحول لديناميك. - الميكروفون الديناميكي Dynamic
المايك من هذا النوع جودته ممتازة، وهو النوع الكلاسيكي اللي نعرفه يستخدم في إذاعة المدرسة، المسرح، والمساجد. يلقط الصوت فقط من أمام المايك، بالتالي لا يلقط أصوات بعيدة ومزعج. تحتاج مايك لكل شخص في حال التسجيل كمجموعة. - ميكروفون الجوال Mobile
أفضل خيار لشخص يبغى يبدأ وما عنده ميزانية يستثمرها في مايك، أغلب مايكات الجوال الجديدة ممتازة جداً وتقدر تسجل بيها وتعدل على الصوت لاحقاً ببرامج التعديل لتحسن من صفاء الصوت.
النصيحة: نزل برنامج متخصص في التسجيل غير اللي في الجوال وأختار أعلى جودة وقت التسجيل WAV.
أدوات تساعدك
أدوات ممكن تستثمر فيها لتحسين المايك والإنتاج.
- مكسير Mixer
يساعدك تشبك مايكات متعددة وتسجل مقطع لكل شخص في مقاطع Tracks منفصلة. مفيدة جداً وقت التعديل وفي حال التسجيل مع كذا شخص. - Windscreen
الاسفنجة اللي تنحط على المايكرفون وتقلل من صوت الهواء والرياح. - Pop filter
فلتر يقلل من تفرقع الأصوات العالية اللي ممكن تطلع منك وقت الحديث.
برامج الإنتاج والتعديل
عشان تنتج حلقة بودكاست وتعدلها وتقوم بالقص وتصفية الصوت وإضافة مقدمة ومؤثرات وغيره. تحتاج تستخدم أحد برامج تحرير الصوتيات.
- Audacity
أوداستي أشهر برنامج في تحرير الملفات الصوتية ومجاني. كثير من صناع البودكاست يستخدموه. ويوفر كل المميزات اللي تحتاجها لتنتج حلقة بودكاست. هذا البرنامج اللي استخدمه حالياً وأسجل وأعدل عليه. - Adobe Audition
من أشهر البرامج في الفئة الاحترافية، مدفوع وينصح فيه للمحترفين في تعديل الصوتيات.
نصائح لإنتاج ونشر البودكاست
- سجل بصيغة WAV.
- سجل على وضع قناة Mono وليس Stereo.
- طريقة تصفية الأصوات المزعجة Noise Reduction
- إعدادات لتحسين الصوت على Audacity
- أنشر البودكاست على موقع ودليل البودكاست العربي.
- أستخدم أداة Podcast validator لتأكد من صحة خلاصة RSS وأنها مهيئة للبودكاست.
أسئلة شائعة
طلبت منكم على انستقرام ترسلوا لي الأسئلة اللي في بالكم والصعوبات اللي بتواجهكم في بدأ بودكاست خاص فيكم. بشاركها معاكم وأجاوب عليها.
- كيف أرتب المعلومات وأتكلمها بشكل سلس؟
يعتمد عليك وكيف طريقة بودكاستك. أنا أحب أكتب النقاط الأساسية لموضوع الحلقة وأتكلم منها، عشان ما أنسى شيء أبغى أقوله وأفكاري تكون مرتبة. - أشتريت المايكات ومو عارفة كيف أشبكها بالابتوب وأسجل
على حسب نوع المايك لو كان USB سهل شبكه لو منفذه كان XLR ممكن يحتاج الشخص يشتري محول XLR to USB. أو يكون عندك Mixer USB تشبك عليه المايكات. - كيف أختار اسم مناسب للبودكاست؟
صعب توصل لاسم مناسب دائماً، لو مو في بالك اسم مره عاجبك حالياً جرب باقرب اسم ينفع للبودكاست ويشرح فكرته، ولو مستقبلاً تبغى تغيره ولقيت اسم أفضل تقدر تغيره. المهم تبدأ وبعدين تقدر تغيره. - هل التسجيل بمايك الجوال ينفع ولا لازم مايك متخصص؟
ينفع جداً للبدايات مثل ما قلنا، وبعد التسجيل تقوم بتحسينه ببرامج تحرير الصوتيات. - مو عارفة كيف أنزله في ابل بودكاست؟
عن طريق إنشاء حساب في موقع Apple podcast connect وإضافة خلاصة الـ RSS هناك. - التوتر اللي يجي بداية التسجيل.
في البداية طبيعي التوتر، مع الوقت والتعود على المايك والتسجيل يختفي. وممكن يريحك انه تعرف اللي بتسجله مو شرط تنشره، أنت ما بتسجل بشكل مباشر، بعد الحلقة تقدر تقرر بتنشر اللي سجلته أو لا. - سويت شعار بس مني عارفه كيف اسجل وماعندي مواضيع محددة أبغى أسوي حسب الموضوع اللي بيجي براسي.
حلو تقدر تبدأ باللي في بالك حالياً مو لازم تعرف على المدى البعيد وحيبان شكل البودكاست مع الوقت. - أحس صوتي مو مناسب.
أشهر شيء الناس بتحسه ويتكرر عليا، كلنا نستغرب أصواتنا في التسجيل غالباً. بس أحس لما صرت أسمع صوتي أكثر في فويس نوتس واتس أب بدأت أتعود عليه. وفي الحقيقة ما يهم صوتك كيف، في ناس حيعجبها صوتك وأسلوبك وناس لا. - كيف أسوي بودكاست لمنظمة دولية؟
تقدر تذهب لشركة أو هيئة تتواصل معاهم وتطرح فكرتك عليهم وتكون جاهز. وليش لا ممكن يتحمسوا على الفكرة. - أبدا من فين، الادوات، الافكار؟
أبدأ من المكان اللي يحمسك، والفكرة اللي في بالك حالياً، مع الوقت حتتوسع أكثر لو كمل الحماس معاك. وسجل في مكان الأفكار اللي تجي في بالك دائماً للحلقات. - كيف أوصل للمستمعيين اللي يشبهوا اهتماماتي وأبني جمهور؟
في ناس حتكتشف البودكاست بنفسها من أبل بودكاست أو موقع البودكاست العربي، أو من الناس اللي راح تسمعه وتشاركه مع ناس ثانية. تقدر أنت تساهم في مشاركتك بودكاستك ونشره على شبكات التواصل ولناس اللي يهمها. بس الشيء الأساسي بالنسبة ليا هو التركيز على صناعة المحتوى. الناس اللي مهتمة في المحتوى اللي بتشاركه حتلاقيه مع الوقت. - هل لازم تكون مؤثر في السوشيال ميديا قبل لا تبدأ بودكاست لك؟
الجواب بالنسبة لي لا، في ناس كثير بدأوا من قبل شبكات التواصل. وممكن البودكاست نفسه يساعدك تبني جمهور في المستقبل. - المواضيع والالتزام كيف احلها؟ الاستمرارية.
الاستمرارية مو أهم شيء لشخص بيبدأ، المهم في البداية التجربة وتتأكد إنه عاجبك الموضوع وتبغى تكمل. بعد فترة تقدر تحط جدول تستمر عليه وهذا الشيء مع الوقت حيصير أسهل وزي العادة ينبني. برضوا مهم التزامك فيه مع نفسك لو قررت وتأكدت، وتكون واضح مع دوافعك الداخلية. - نظرة المجتمع نفسي اوصل لمرحلة الطز.
مهم موضوع نظرة المجتمع. أحس اللي بيساعدك أنك تعرف إنه في ناس حتسمعك وحتكون مهتمة في اللي أنت مهتم فيه، في نفس الوقت في ناس دائماً ما يهمها اللي بتشاركه ولا يعجبها أسلوبك. “أنت ما راح تعجب كل أحد” ومرحلة الطز أحس تنبني مع الوقت حبة حبة وما في شيء يرسخها قد ما ترمي نفسك وتبدأ، وتعرف إنك ما راح تعجب كل أحد ولا لازم هذا الشيء. - متى اعرف اني مهيأ أتكلم عن موضوع ما وأطرح فكرتي، خصوصاً لو فيه احد يسمعني أحس بمسؤولية.
لما يكون عندك بودكاست وتتكلم في موضوع ومجال معين، هذا الشيء يخليك معروف في مجالك. وناس أكثر تعرفك بسبب هذا الشيء وتستفيد منك وتفيدك. زي مثلاً شخص تقني عنده بودكاست والناس بتسمع له وتثق في آرائه، هذا يخلي الشركات تثق فيه وفي جمهوره لتسويق منتجاتهم، لإنه أعطى الناس من معرفته وعلمه. - كيف أسجل بودكاست ثاني مع شخص عن بعد؟
أحسن طريقة حالياً تطبيق Zoom ويوفر خيار التسجيل، وفيه خيار فصل المقاطع لكل شخص في تراك. وفي خدمات ثانية تقدم نفس الشيء لصناع البودكاست لو تبحث. - عندي مخاوف انه لهجتي ما تكون مفهومة أو لغتي العربية الفصحى ما تكون بالقوة الكافية.
من أجمل الأشياء بالنسبة لي اختلاف اللهجات، وما أواجه أي صعوبات في فهمها بالعكس أستمتع بتعلم كلمات جديدة أفهمها من السياق. إيماني اللهجة ما تهم وأغلب العرب بيسمعوا لبعض وبيفهموا لهجات بعض. ممكن حلو لو تركز ما تستخدم كلمات صعبة في لهجتك أو تشرحها في حال استخدمتها. أنا أسجل بلهجة سعودية حجازية، أغلب السعوديين بيفهمومها، وبيسمعوني أشخاص من دول عربية مختلفة وبيفهموا عليا، فأبداً ما أشوف اللهجة عائق. - اخاف مايكون في مستمعين
بالنسبة لي التركيز والدافع في البداية مو على عدد الاستماعات، وأشجع ما يكون عدد المستمعين عامل أو حافز في البداية. الأكيد إنه حيكون في ناس تسمع مع الوقت سواء كانوا قليلين أو كثيرين بمقياسك. - كيف يدخلوا فلوس أصحاب البودكاست؟
عن طريق الإعلانات ممكن تكلم شركات متخصصة في مجالك، أو هما ممكن يتواصلوا معاك. من الطرق الثانية طلب الدعم من المستمعيين. أو مثلاً تقديم خدمات أو منتجات لها علاقة بمجالك.
زي مثال التقني اللي عنده بودكاست تقني ويتكلم عن التقنية، الشركات حتكون مهتمة تعلن عن منتجاتها عنده لإنه جمهوره من رواد التقنية، وراح يساعدوا في نشر منتجه وشركته. سعر الدخل من إعلانات البودكاست أعلى من المنصات الأخرى! ما زال الموضوع في المنطقة العربية مو قوي، والمعلن مو شرط دائماً فاهم أيش يعني بودكاست وممكن تحتاج تشرح له وتقنعه. - كم نسبة المستمعيين للبودكاست في السعودية وهل الطلب عليه عالي؟
السعودية من أعلى الدول العربية إستماعاً للبودكاست. تقدر تشوف أرقام وإحصائيات أكثر من: إحصائيات البودكاست العربي. - هل لازم نكون شخصين عشان ينجح البودكاست وما يطفشون مني؟
لا مو لازم، كثير برامج بودكاست تعتمد على شخص واحد وناجحة. ويعتمد على نوع البودكاست ولو كان في شخص ملتزم وجاهز يسجل معك. - كيف تعزل اصوات الغرفة؟
ركز أنك ما تسجل على سطح زجاجي تحت المايك. أحسن شيء تسجل في غرفة لها بساط سجاد كامل مفروش في الأرض وستائر تغطي النوافذ الزجاجية. وتقدر تبحث أكثر في الإنترنت عن طرق تقليل الصدى. - ايش تستخدم سماعات؟
- استخدم سماعات رأس نوعها كويس وسعرها معقول: OneOdio Headphones
- هل أفضل نبدأ بنفسنا ولا مع شركة؟
يعتمد عليك، هل تقدر تسوي كل شيء بنفسك وتصرف شوي وقت ومجهود تتعلم كيف تعدل الحلقات وتنتجها أو تحتاج شركة تساعدك في هذي العملية وتجهيز المحتوى بدل عنك. في شركات كثيرة وأفراد يقدموا مثل هذي الخدمات. - إذا ببدأ كيف اعرف انه هذا المجال اللي ابغى اكمل فيه؟
أبدأ وجرب وحتعرف لو هذا مجالك وتبغى تكمل فيه. بدون ما تجرب صعب تعرف وتتأكد. - أيش افضل طريقة أقدم فيها المحتوى بطريقة مختلفة تدخل قلوب الناس؟
طريقتك أنت! لما تكون نفسك حتوصل لناس تحبك وتفهم أسلوبك، اتفرد بأسلوبك. ومهم تعرف إنه في ناس عمرك محا تدخل قلوبهم لا تركز على هذا الشيء. - هل لازم اسوي للبودكاست حسابات في السوشيال ميديا ولا عادي لا؟
عادي لا، تقدر تشارك على حسابك الشخصي أنا كذا بسوي ما أسوي حساب خاص للبودكاست لإنه ما عندي شيء إضافي أبغى أشاركه عن البودكاست لحاله. فيعتمد عليك. - كم أقل مدة للحلقة؟
الأفضل تكون حلقات أكثر من 10 دقائق هذا الأنسب للبودكاست، لكن ما في شيء لازم لو تبغى تسوي بودكاست أقل تقدر. بس المحتوى القصير اللي يكون دقائق أنا أشوفه مناسب أكثر لسوشيال ميديا.
أتمنى لك كل التوفيق في إطلاق وبداية بودكاستك.
كورس البودكاست
لو مهتم تحضر كورس شامل ومبسط ياخذك في كل التفاصيل اللي تحتاجها خطوة بخطوة ويختصر عليك الكثير سجل معايا في كورس البودكاست.
واستخدم هذا الكود للخصم: 8k4nd2k
في بالك كلام؟
في الفترة الاخيرة لي صرت مدمنة على بودكاستك و بعد ليلة الفضائين صرت أتابعك انستقرام الزبدة من قووه الشعور الجميل اللي يجني من البودكاست حقك صرت متهتمه في تفاصيل كاش يعني جوك أصدقائك جنى
سبحان الله كيف كله منسجم مع تفكيري و اهتمامي مش عارفه بس اخاف يكون ادمان
اعتقد زي ما انت قلت بساطه عفوية و حقيقه صادقة من جوا
اهنيك على نجاحك و ممتنة لعطائك