تجارب، حكاوي، وشوية شطحات.

كيف سافرت المالديف لحالي؟

هذا الموضوع بالتحديد أنا أتحمست أبدأ Blog عشانه لأني أستفدت من تجارب كثير أجنبية، قبل لا أسافر للمالديف وحسيت من جد أبغى أشوف محتوى عربي لأشياء زي كده ممكن تفيد أحد أو تحمسه.

بداية الحكاية كانت في نفس هذي الأشهر تقريباً، من سنة 2016 إنه كشميري يبغى يسافر في الصيف، وكنت حاط في بالي لما يجي شهر سبتمبر حكون سافرت برا البلد لتجربة جديدة ورهيبة. في هذا الوقت ما كنت لسه قد سافرت لحالي كرحلة سياحية، وأغلب الي فات كان غالباً شغل. ما كنت ناوي أسافر لحالي، بس لما محد أكد أو أتحمس كنت لسه ملزم إني حسافر حتى لو لحالي مو فارقة، في هذا الوقت ما كنت حددت الوجهة لسه، بس كان عندي تصور مبدئي للبلد الي أبغى اروحها الجو الطاغي كان، إني أبغى أجرب شيء جديد أبغى أنزل في Hostels وأقابل ناس ما أعرفهم، أمشي في شوارع عجيبة، ومرة كنت شايف أوروبا وقتها.

عدى الوقت ومشيت الشهور وأنا ما خططت ولا جهزت لسفرة مالقيت نفسي الا في شهر August هنا قلت خلاص لازم أسوي شيء أنا مسافر! كان معقدني موضوع الفيزا، كيف حطلعها والإجراءات، وقتها كنت طالب بدرس وموظف Part-time، وكنت شايف الموضوع صعب وحياخذ مني وقت ولخبطة، فقلت خليني أشوف أيش في دول تسمح لسعوديين دخولها بدون فيزا؟ وأنا أقلب في القائمة والا أشوف المالديف شدتني مرة! وأستغربت في نفس الوقت ما كنت ادري إنه المالديف ما تحتاج إستخراج مسبق لفيزا، كل المطلوب تحجز تذكرتك وإقامة وبسم الله من بكرة مداك تنط لهم! حمسني دا الشيء وفي نفس الوقت كنت شفت فيديو أرسله لي أخويا أجواد، لمشهور الدبيان يتكلم عن تجربته في إجازة في المالديف وإنه ترا المالديف مو شرط تكون غالية زي ما كل أحد يحسب! وإنه على حسب المواسم والعروض، حمسني زيادة وزيادة.

أتذكر أول كم ساعة ما كنت جدي مره في الموضوع بس قلبي كان يخفق وكان هو الشعور الي كأنه قلبي بيقولي أيوا هوا دا، بس في نفس الوقت الفكرة مرة مجنونة وعشوائية في ديك اللحظة، أستنيت أتذكر يوم كمان، في هذا اليوم بحثت عن كل التفاصيل والأشياء الي أحتاج أعرفها عن المالديف والسفر لها الأسعار وتجارب ناس قد سافروا لها لحالهم Solo، هنا الموضوع بدأ يقلب جد! ويصير حقيقي.


معلومات سريعة

في شوية معلومات سريعة أبغى أقولها عن المالديف عرفتها قبل لأسافر ما كنت واعي لها قبل التخطيط والبحث عنها:

  1. المالديف دولة مسلمة.
  2. المالديف في عام 2009 سمحت لسياح بالإقامة في الجزر المحلية لسكان، قبل كان مسموح فقط تروح جزر المنتجعات السياحية.
  3. غير إنها دولة مسلمة فهي محافظة أكثر من ما تتوقع، المحلات تقفل وقت الصلاة، الكحول غير مسموحة، في شواطئ منفصلة للبكيني وقوانين للبس. *القوانين هذي ما تنطبق على الجزر السياحية والمنتجعات ومو كل السكان يتبعوها طبعاً.
  4. في الـ 30 سنة الجية يتوقع إنه جزر المالديف تختفي عن سطح البحر، بسبب إرتفاع مستوى المياه.

اللحظة الي أتغير فيها كل شيء

أول ما عرفت عن معلومة الإقامة في الجزر المحلية، تقريباً هنا أتغير كل شيء وبدأت أتحمس ومرة أشبك مع الفكرة أكثر وأكثر، أنا أعشق البحر، وأبغى أسترخي، أبغى اتعرف على شعوب وأحتك بالسكان الأصليين وأقابل ناس جدد، وفي نفس الوقت كان لي فترة أقول أبغى أروح أعيش في جزيرة، كل هذا حسيته شابك وبينقلب حقيقة لما عرفت إنه أقدر أسافر للجزر المحلية وأستكشف فيها، لقيت كم موقع كأنه ويكيبيديا لأغلب جزر المالديف المحلية الموقع مرة حمسني حسيت كأني في لعبة، وقاعد أستعرض معلومات الجزر الي في هذي اللعبة، مساحتها، صور للجزر، معلومات عنها، السكن الموجود فيها، كان شيء مرة يحمس وشابك معايا مليونين! وقررت وقتها رحلتي ما راح تكون بس إستجمام في منتجع أروح أروق فيه وأرجع لا! أنا أبغى أروح أستكشف وأستجم في نفس الوقت.


الخطة

بدأت التخطيط لرحلة عشان أعرف فين حروح، فين حنزل كم يوم ححتاج، ووسائل التنقل الي بستخدمها. أعتبر نفسي مخطط جيد لرحلاتي وأستمتع بالبحث والإستكشاف عن المكان الي بسافر له، في نفس الوقت أحب أسيب مكان للعشوائية عشان الأشياء السحرية الي تصير بدون تخطيط! بس خليني أعترف تخطيط هذي الرحلة ما كان سهل أبداً، قعدت أيام أخطط عشان أعرف في أي جزيرة بنزل ومن الجزيرة هذي أي جزيرة بروح وأيش وسيلة التنقل الي حتكون موجودة. الوسيلة المعتمدة عندهم لتنقل بين الجزر المحلية هي Ferry، الفيري عبارة عن قارب صغير بطيء وهو التاكسي حقهم أو الباص، وله مواعيد في أيام وأوقات محددة، فكان لازم ألاقي توافق بين كل هذي العوامل.

المهم بعد كم يوم حددت وعرفت المسار الي أبغى أخذه وبحثت عن الأماكن الي تقريباً أبغى أنزل فيها، وصار عندي خطة سماوية جاهزة.

مسار الرحلة

مسار الرحلة كالتالي: حوصل مالي عاصمة المالديف، وحاخذ قارب ⛵ عشان أروح Hulhumalé جزيرة صناعية جمب المطار عشان أريح فيها يوم وأستكشفها عالسريع، بعدها باخذ الفيري وأروح على Fulidhoo وهي جزيرة محلية صغيرة جداً وغير مشهورة بالسياح حقعد فيها ليلة وبعدين بحرك على Maafushi وهي جزيرة محلية مشهورة جداً بالسياح والكثير يزوروها، بقعد فيها يومين وبرجع على Malé العاصمة أقعد فيها ليلة أزور أي معالم مهمة فيها وبعدها أنهي رحلتي في منتجع سياحي 🏝 على جزيرة Dhoores.

المنتجع السياحي هوا أخر وجهة والي حروق فيه أكثر وأعيش الرفاهية، ومنه أنهي رحلة المالديف العظيمة!


حتسافر المالديف لحالك؟

من يوم ما حجزت تذكرة الطيارة ليوم ما وصلت مطار مالي، ما كان الموضوع سهل، سواء من تخطيط وإستغراب الناس الي حولي، إنه ليش حسافر المالديف لحالي! أو خوف أمي ومعارضتها في البداية اني أسافر لحالي. كل أحد كان مستغرب من الموضوع، حتى لما وصلت مالي موظف الجوازات هناك كان مستعجب إنه أنا أيش بسوي في أرضهم لحالي، وكأنه المالديف كتبت للمتزوجين والحبيبة بس! وكنت مرة متحمس اني أروح عشان أنفي هذا الشيء، المالديف مو بس لشهر العسل! زائد أنا مو أول واحد راح المالديف لحاله ولا آخر واحد، هل كنت الوحيد هناك؟

الوقت الي أخترت أسافر فيه للمالديف كان موسم الأمطار 🌧 في شرق آسيا وأسعار كل شيء في هذا الوقت أرخص، أنقال لي إنه إختيار غير موفق للوقت، وإنه ما بشوف الشمس بس حدسي كان إنه الرحلة هذي حتكون رهيبة ومليانة شمس. المنتجع الي بنزل فيه قبل لأحجز أرسلت لهم أسئلهم عن توقعات الجو في جزيرتهم أرسلوا لي رد الساعة 2:22 ✨، الي يعرفني كويس يعرف إنه هذا الرقم من العلامات الي لما تجيني أعرف إنه من هنا الطريق وأثق زيادة.

*توقعات الطقس تختلف جداً حسب الجزيرة وموقعها، المالديف فيها 1200 جزيرة تقريباً، و300 من هذي الجزر فيها سكان ومنتجعات، أنواع الجزر تختلف تختلف كثير والتنوع بينهم رهيب.

ما أظن إني كنت شايل هم الفكرة كثير إني لحالي رايح المالديف، بس بدأ الشعور والإستيعاب أول ما ركبت باص الطيارة الي رايح لمالي، وقتها حسيت من جد إني غريب كلهم Couples وأنا متحمس في النص، لما طلعت الطيارة شفت واحد لحاله كان نايم، أتحمست قلت إمكن في أمل ما أطلع الوحيد، ومن هذيك اللحظة وأنا أدور على أحد مجنون زيي.


وصلت!

الله عالشعور وأنا أطير فوق المالديف، مني شايف قدامي غير جزر ومحيط، والمطار عبارة عن مدرج وصالة على جزيرة صغيرة جنب العاصمة، المطار من أول ما تنزل فيه شيء عجيب كله كاونترات منتجعات سياحية حرفياً بالـ 100 عددهم. أول شيء سويته إني أستخرجت شريحة بباقة إنترنت من المطار، عشان يكون سهل عليا التنقل في الرحلة وأتابع المواعيد والحجوزات وما أنقطع، هذا شيء الأساسي الي اسويه في السفر دائماً، الانترنت مهم عشان أخذ راحتي تماماً في الإعتماد على نفسي والإستكشاف بـ Google Maps.


الجزيرة الأولى Hulhumalé

هولوهومالي تعتبر جزيرة صناعية جديدة جمب المطار، هذا الجانب يخليها ما تحمس بالنسبة لي، بس لما شفت صورها وشكل المباني الملونة الي فيها شدتني أقعد فيها ليلة أستكشفها، الجزر الي زي Hulhumalé الخيارات في السكن فيها قليلة ومو رفاهية مرة سكنت في Guest House وهو المبدأ الي أخذته في كل الجزر المحلية الي زرتها، كان نظيف ومرتب، عبارة عن فندق صغير ويطل على الشاطئ، فكرة الـ Guest House إنها بيوت أو أملاك تتحول لفنادق صغيرة وإقتصادية.

أول يوم وصلت فيه كان الجو غيم ونزلت مطرة وهنا فكرني بكلام الناس الي قالوا لي إني بسافر في وقت غلط وإنه موسم أمطار وحندم، في نفس الوقت ماهز ثقتي دا الشيء كنت متأكد الشمس بتطلع وأيامي الجية بتكون مشمسة وتحمس. أول ليلة أتمشيت على رجلي شفت السوبرماركت حقهم، وشفتهم كيف يقفلوا وقت الأذان، أستعجبت كيف صوت الموذن كانه سعودي مره من العربي حقه! يغبن شوية إنه حتى لما تسافر لبقعة وسط البحر لسه موضوع المحلات الي تقفل وقت الأذان هذا موجود، لإني كنت لسه أجري الحق السوبرماركت قبل الأذان 😂 بس في النهاية ما فرق كتير أنا جي أنبسط. كان عجيب كيف البقالات الي عندهم الفاكهة يستوردوها من دبي! وفي معلومة قرأتها قبل إنه جزر المالديف مهي مهيئة زراعياً وبيعانوا من هذا الموضوع.

اليوم الثاني الصباح رحت دورت على أحد يأجر دراجة وحققت حلم بإني الف جزيرة كاملة من شرقها الى غربها بالدراجة وكان شعور فخم بالاستكشاف وهوا أكثر شي أحبه في السفر إني أمشي في الشوارع وأستكشف وأعيش جو البلد الي أنا فيه. ما سويت شي كثير هنا والبحر حقها ما كان رهيب كل ما أغطس تراب بالهبل يحجب الرؤية بس ما كنت متوقع منها كتير بما إني عارف إنها جزيرة صناعية.

Hulhumale’ Central Park

خلاصة الجزيرة: أكثر من يوم واحد فيها حتطفش، يوم واحد تلف فيها وتريح قبل لا تنتقل لوجهتك الجية مناسب، الجزيرة فعلاً صناعية وفيها بناء كتير بيحصل، والشاطئ حقها مو رهيب مرة عشان تجي عشانه، ولكن هي مدخل جيد لتدرج في سحر المالديف الي لسه حتشوفه! أكثر شي حبيته فيها المباني الملونة وإستكشافها بالدراجة.


يلا نسافر لـ Fulidhoo

جاء اليوم الموعود إني أتحرك من الجزيرة الصناعية هذي وأروح لأول وجهة حقيقية ليا، وهي جزيرة Fulidhoo، قبل وأنا أقرأ عنها أغلب السياح الي زاروها قالوا إنها صغيرة، وفي الغالب لو أنك زرتها ممكن تكون الأجنبي الوحيد على هذي الجزيرة لإنه مهي مشهورة بين السياح لزيارتها.

وصلت الميناء أو مدري ايش اسميه المحطة الي بأخذ منها الفيري الي حيتوجه لفوليدو الرحلة حتكون عبارة عن ثلاثة ساعات وربع، وفي النص حيكون في توقف في جزيرة Maafushi وهي الجزيرة الي حنزل فيها في الرجعة من فوليدو مو الآن، الرحلة هذي تكلفتها 4$ عبارة عن 15 ريال وأنت تقضي ثلاث ساعات تتجول في بحر المالديف الرهيب متخيل!

وصلت الميناء أشتريت التذكرة وقعدت أستنى يجي الموعد، في نفس الوقت ما زلت أبحث عن أي أحد زيي بشكل عجيب، حتى الأجانب Couples كنت أدور عليهم، ليا من يوم ما وصلت ماشفت أجانب كتير في Hulhumalé، فجاءة لمحت وحدة دخلت تسنى معانا من بعيد، شكلها لحالها! عجيب! معقول أحد تاني زيي؟ لما ركبنا الفيري قعدنا جمب بعض وطبعاً فكيت هرجة أنا على طول، وطلعت مجنونة زيي ومسافرة لحالها للمالديف! Fist bump 👊

شفتها لابسة Harem Pants وعليه نقوش فيل وكده أستعجبت! وسالتها إذا انها تسوي يوغا ولها في الأشياء Spiritual طلع أيوا! ومن هنا فكينا مواضيع بالهبل، الأرهب إنها طلعت لها سنتين تركت وظيفتها وبتلف العالم كانت في جنوب أمريكا لفت فيها دول كتير، وقبل المالديف كانت في سريلانكا وبعد المالديف ناوية تكمل على الهند وبعده ماتدري فين! بتمشي بعشوائية وفين ما قلبها يقولها تروح بتروح! ألهمتني مرة والقصص الي أتكلمنا فيها هو أخر شيء كنت أتوقع أنه حيصير في المالديف.

وأحنا في وسط البحر سألتها عن خطتها، قالتلي أنها رايحة Fulidhoo، قلتلها أوه أنا كمان! كملت تقول: “حقعد هناك يوم وبعدين حروح Maafushi“، قلت: وأنا كمان!!

وأحنا بنمشي في البحر كنت مامل تجي دلافين حولين القارب لانه كثير قالوا صارت لهم، بس مع الأسف ما حصل، وصلنا نقطة التوقف في مافوشي، وحرفياً كل الأجانب الي في القارب نزلوا لمافوشي الجزيرة الأشهر وبقي بس أنا وهيا والسكان المحليين كملنا الرحلة متوجهيين لفوليدو! طبعاً هيا تقريباً ما تعرف أي شيء وماشية بالبركة ولا بحثت قد ما أنا بحثت حتى مكان سكنها ما تعرف إسمه 😂 وهذي طريقتها في السفر حتى بتمشي بدون شريحة إنترنت فاجأتني، فحكيتها كيف أنه فوليدو مو مشهورة وما فيها أجانب كثير، وقعدنا نتسائل لو أحنا الأجانب الوحيدين الي حنكون على هذي الجزيرة.

وصلنا فوليدو! الجزيرة الصغيرة البسيطة، أستقبلنا صاحب Guest House الي حننزل فيه، وطلعنا كمان في نفس المكان! حطينا أشيائنا وقلنا بنروح نلحق البحر ونستكشفه قبل الغروب، رحنا البحر ومطرت وقتها وجربت لأول مره شعور السباحة والغوص مع المطر وكان شيء فخم زي ما كل أحد قلي. الغوص ما كان مره رهيب في هذي الجزيرة من ناحية شعب مرجانية، ولما كلمت كذا أحد من الجزيرة قالوا إنه كله من بعد التسونامي الي جاهم أغلب الشعب المرجانية أدمرت وصار لازم تطلع بعيد بقارب عشان تشوف شيء حلو وحياة جوا البحر.

في نفس الجزيرة مشينا وقابلنا سياح ثانيين زوجين من روسيا وشخص زينا مسافر لحاله! من بريطانيا يعني عددنا كلنا كأجانب 5 على الجزيرة.

شيء يبسط كل مره أقابل أحد جي لحاله Solo ويأكد لي إنه الناس الفاصلة والرهيبة موجودين وحيطلعوا! وأنا قبل كم يوم كنت حاس نفسي لحالي والغريب.

في الليل رحنا كلنا المرسى حق الجزيرة الصغيرة، وكان في زوجين من أهل الجزيرة ورونا Stingrays الي يجو لشاطئ ولمسناهم! بدون ما نموت أو نتسمم، أكلتهم أكل بيدي كمان، تجربة رهيبة مرة ما كنت مخطط لها، في جزر ثاني تدفع عليها عشان تجربها، في نفس الوقت الـ Couples هدول الي من الجزيرة مرة كانو لطاف وطيبين، وجوهم كان بسيط على الآخر وباين حبهم لبعض. أحلى شيء في هذي الجزيرة حسيته هو بساطة سكانها وكيف كل أحد يعرف كل أحد، ومنظر الأطفال وهما يجروا في الشاطئ بدون أجهزة أو تكنولوجيا أو أي شيء الى الآن مخزن في مخي، حتى أظن في البيوت ما عندهم تلفزيون كانوا يطلعوا لمطعم في الجزيرة عشان يتفرجوا مباراة لمنتخبهم. الشيء الوحيد المزعج في الجزر المحلية هوا منظر أبراج الشبكة، وأحياناً النظافة.

السكن الي سكنت فيه في هذي الجزيرة كان أقل شيء جربته في رحلة المالديف كلها كان بسيط مره وماله إطلالة ولا أي شيء يحمس، حتى السرير ما كان مره مريح، بس في نفس الوقت ما فرق معايا كتير لأني كنت متخيل أنا جي لأيش. كلفني تقريباً 200 ريال لليلة الوحدة في دا المكان مع الاكل البسيط. صباح اليوم الثاني في هذي الجزيرة رحت أبغى أشوف الشروق وبالغلط رحت مكان الغروب وقعدت ألف حولين الجزيرة الى ما وصلت لمكان الشروق بعد ما قيدها طلعت الشمس 😂.

وقت الغداء كنا نقعد مع السكان الأصليين للجزيرة غالباً مع العم صاحب البيت وكان يحكينا حكاوي رهيبة زي ذكرياته مع تسونامي 2005 وكيف كانت فجعتهم، القوارب الي خسروها وكان يورينا لأي درجة وقتها مستوى الموية وصل، شي يفجع! في نفس الوقت سألناهم “أيش رأيكم في التوقعات الي تقول المالديف حتختفي في المستقبل؟” الرد كان كالتالي وعلى نيتهم: “أظن أيوا سمعنا يقولوا شيء كده في الفيس بوك”

من جدكم! 😂

خلاصة الجزيرة: Fulidhoo جزيرة بسيطة وهادئة جداً، أهلها طيبين وينبسطوا بالأجانب وكل أحد بيبتسم لك، في الجزيرة في ناحية فيها شاطئ للأجانب خاص عشان ياخذوا راحتهم، وغالباً إنه فاضي ونظيف، هذا الشيء يدي خصوصية زيادة لناس الي يهمهم دا الشيء، السكن أبداً لا تتوقع كثير لانه حالياً في بس خيارين لسكن على هذي الجزيرة وكلها بيوت بسيطة جداً، تعال هنا عشان تجرب شيء مختلف.


حكيني عن Maafushi

جاء موعدنا إنه ناخذ الفيري الي بتطلع من فوليدو إلى مافوشي تحديداً في الساعة 11:00 🕚 صباح، الأوقات بالملي ولو فوت الفيري الله يعينك.

وأنا على القارب لمحت شخص أجنبي ولحاله قاعد يقرأ كتاب، الطبيعي إنه الشخص بيقرأ وقاعد في جوه مفروض أسيبه بس مأدري أشبي في دي الرحلة! رحت لفيت القارب وصلت الى عنده وبدأت أكلمه وأتعرف عليه، الادمي كان رهيب، جي من أستراليا ومسافر لحاله برضوا! بس جوه غير مدري كيف، باين عليه إنه رايق مو الي حق مغامرات وكده لا شخص أروق من كده وعمره أعطيه في منتصف الثلاثين، أحلى شيء لما قلتله أنا من السعودية، قلي “Oh I love Jeddah” كان غريب! اول مرة انه احد أقله انا من السعودية ويطلع يعرف جدة على طول كده، قلتله أنا من جدة! بعدها سالته السؤال الي كل احد يسالني هوا والي أنا اسئله لكل أحد، قلتله أيش جابك هنا؟ جوابه بكل بساطة وأختصار “الآن في أستراليا عندنا شتاء وأبغى أهرب منه فقررت أجي هنا.” الشخص كان لطيف جداً، وما أتضايق إني قاطعته من كتابه، ودعته بدون ما اطول عليه. ما أكذب عليكم حسيته ملاك من لطافته وروحه، في شيء كان عجيب.

وصلنا Maafushi زي ما قلت لكم هي جزيرة محلية بس إنها سياحية جداً تقدر تقول عنها شرم الشيخ فرع المالديف الصغير، ما فيها منتجعات بس فيها فنادق صغيرة وفعاليات مره كثير لسياح، والمثير للإهتمام هذي الجزيرة فيها سجن المالديف! بس الوضع مسالم مره ما قد صارت أشياء غريبة بسبب دا السجن، أصلاً أستغربت إنه بلد زي كده فيها سجن.

من هذي الجزيرة أخذت فعاليات زي إنه أروح زيارة لـ Sand Bank 🏖 وأغوص فيه، وكمان جربت Flyboard وأكلت منه كم طيحة محترمة على وجهي، أسعار الفعاليات هنا أرخص من المنتجعات، وكثيرة مرة الأشياء والفعاليات المائية الي تقدر تسويها، شواطئ الجزيرة مليانة سياح وقابلت هنا كذا أحد مسافر لحاله بس أغلبهم لغتهم الأنجليزية ما كانت تساعد كثير. الفندق الي نزلت فيه هنا كان الأرهب على الإطلاق وححط رابط له تحت، حرفياً كل شيء من ستاف، لمدير الفندق، للأغاني الرهيبة الي أكتشفتها من playlist حقتهم كانوا رهيبين مرة، وكمان كانو حاطين دراجات لسكان الفندق كان شيء خورافي كل يوم أنزل وأخذ الدراجة 🚴 عشان الف فيها الجزيرة.

في نفس هذي الجزيرة ودعت صاحبتي الي قابلتها في بداية الرحلة، وكل واحد أتفرق ومشي في خط رحلة مختلف من بعد Maafushi. كان صعب الفراق، ما تخيلت بيكون صعب كده، الليلة الأخيرة بدلنا كريستالات مع بعض، عوضاً عن أشياء رهيبة كتير صارت، كان شيء مستحيل إني أتخيل أني أروح المالديف أقابل أحد وأتبادل معاه كريستالات 🌠.

*مستقبلاً حتكلم عن الكريستالات والأحجار وقصتها معايا ممكن في بلوق أو بودكاست، ما راح أسحب على دا الموضوع.

كمية الطيحات الي اكلتها هنا مو طبيعية

أرهب جزيرة أستمتعت فيها بالدراجة

خلاصة الجزيرة: Maafushi تجربتها بالنسبة لي خاصة جداً، أنبسطت فيها وعشت مشاعر كثير مختلفة، وفيها حياة بشكل كبير، الفندق الي نزلت فيه كان رهيب حدود سعره كان 420 ريال في الليلة، ويعتبر من الأغلى على هذي الجزيرة في خيارات ثانية كمان أرخص! الجزيرة مناسبة لشباب أكثر والناس الي بيسافروا قروب أو لحالهم، وإقتصادية جداً، يعني تقدر تجرب سحر المالديف فيها، بدون ما يكون عندك ميزانية كبيرة، والي عرفته من الي يشتغلوا هنا إنه في خليجين يجوا ومتعودين عليهم بس أنا ما شفتهم. لو أي احد راح دي الجزيرة في يوم مرة نفسي في تيشيرت “I ❤ Maafushi” ما لحقت أخذه، ومره نفسي فيه من كتر ما حبيتها.


Malé العاصمة

ودعت مافوشي وأخذت قارب سريع Speed Boat لإنه في هذاك اليوم ما كان في فيري وهذي كانت وسيلة التنقل المتاحة، سعره يكون أضعاف سعر الفيري، ويعتبر وسيلة عملية وسريعة لتنقل لسياح.

في مالي قعدت يوم واحد، وصلت يوم الجمعة، سمعت الخطبة وصلاة الجمعة أول ما وصلت وكان كأني في السعودية، مالي عاصمة ومدينة بمعني الكلمة لو أقدر أسحب منها كلمة جزيرة بسحبها، كان كأني في الهند سيارات كثير، بشر، وشوارع مو نظيفة، ما كانت مريحة لي أبداً، والفنادق فيها غالية على الفاضي وصعب تلاقي فندق جيد ويكون إقتصادي في نفس الوقت. لفيت فيها كثير، ورحت أغلب الأماكن المهمة والمعالم السياحية، منها مسجد مبني بصخور المرجان، ومقابر إسلامية قديمة كانت غريبة بالنسبة لي، المتحف حقهم كان قافل يوم الجمعة أنقهرت إنه ما قدرت أزوره.

ملخص المدينة: أيوا مدينة 😊 Malé صراحة ما أنصح فيها، وكثير يوقفوا فيها أول يوم إلا ما ينتقلوا للمنتجع أو وجهتهم الجية، بس الي أشوفه إنه أنزل في Hulhumalé أفضل وأروق كثير، لإنه هنا ما في أشياء تشوفها كثير غير إنها بتطلعك من جو المالديف.


الخاتمة: جزيرة طرزان aaaVeee 🌴🌊

الحمدلله إني خططت وجهتي الأخيرة إنه تكون منتجع سياحي أروق فيه، وكمان يرجعني لجو المالديف بعد الي شفته في مالي، طيب هذي الوجهة الأخيرة وهي المنتجع، قبل لا أختار المنتجع بحثت كثير وكان عندي ميزانية محددة تقريباً وفي نفس الوقت في بالي أشياء معينة، أنا أبغى أنبسط! لو حتجي تبحث عن منتجعات المالديف حتلاقي خيارات كثير كثير مره، وإختلاف في الأسعار كبير برضوا، يعتبر شيء كويس إنه يخلي في خيارات لكل أحد سواء للعوائل أو الأزواج وغيره.. طيب وأنا بأبحث طحت على منتجع أسمه aaaVeee Nature’s Paradise حتى إسمه عجيب، وأنا بابحث فيه وأدور أقتنعت إنه هوا دا! هوا دا! كان مغري صراحة أسعاره كانت رهيبة وفي نفس الوقت شايفه مره نظيف، أتاكدت من Reviews عليه كانت برضوا عالية وتأكد رهابته، واحد من الريفيوز كان كاتب “لو طرزان عنده منتجع aaaVeee حيكون منتجعه” وأنا دا الي كنت بدور عليه، جوه يعطيك جو الغابة من ناحية الأشجار والنخل، الطيور، والتصميم. زائد عندهم إهتمام عجيب وحقيقي بالبيئة غرف الفندق والسرر كلها مصممة يدوياً بالخشب وغيره من الأشياء الطبيعية، فوق هذا كله المنتجع مره جديد قبل كم سنة كانت الجزيرة Dhoores غير مسكونة اصلاً فطبيعية مرة. حمسني! حمسني! حجزت.

aaaVeee يقع في حلقة جزر Dhaalu Atoll وعشان توصل له الطريقة الوحيدة هيا الطيارة المائية، وهذا الحال في كثير من المنتجعات، سعر التذكرة مرتفع شوية لطيارة المائية يوصل 1300 ريال بس مقارنة ببقية العاومل وسعر المنتجع، يسوا مره! غير إنه تجربة الطيارة المائية شيء بحد ذاته رهيب.

ركبت الطيارة وأقلعنا من البحر! خليني أحكيكم عن الكابتن ومساعده الي في الطيارة، الكابتن حق الطيارة المائية، يلبس شورت وشبشب! كان يفطس ورهيب في نفس الوقت. من الطيارة مناظر وعجائب لجزر كثير ومسطحات فوق الموية رهيبة وعجيبة، أغلبها مو مسكونة، تخليك تفكر قد أيش أحنا ما بنستكشف شيء من الأرض.

وصلت الجزيرة، وهبطنا في الموية! إستقبال الجزيرة كان لطيف، كملت الأوراق والإجراءات، ورحت على بيتي أو خليني أسميه كوخي الصغير، كان شيء رهيب وأنا امشي في الجزيرة وأعيشها زي ماشفتها في الصور فعلاً غابة وسط البحر شيء رهيب! وغرفهم بالنسبة لي رهيبة مره، مع إنها لكثير من الناس ما ترتقي لمعايرهم في الرفاهية والفخامة. الرهيب إنه الكوخ حقك عبارة عن الغرفة والحمام، وكمان منطقة خارجية طبيعية خاصة فيك، وبعدها شاطئ بـ Hammock bed حقك، شيء كان من الخيال بالنسبة لي.

جنون الطبيعة في وسط الجزيرة

من كوخي “GOATHI”

سويت فعاليات هنا أكثر زي اني أخذت رحلة القارب لخليج الدلافين عشان اشوفهم وفعلاً شفتهم 🐬 بس ما كان مسموح أنزل معاهم، وكانوا يجروا بسرعة كنت ناوي أسحب على القانون بس الدلافين ما أعطوني مجال، برضوا نزلت غوص Scuba diving وشفت سلحفة 🐢 مرتين شفت سلحفة مره هنا ومره في Sand bank لما كنت في مافوشي، وكان شكلها عظيم وهيا تختفي لأسفل المحيط. جربت أسبح مع سمك القرش الصغير Baby sharks طلعوا رهيبين ومسالمين! والغوص على هذي الجزيرة مره كان عظيم كل يوم كنت أنزل، شعب مرجانية بالهبل وأسماك بكل الألوان والأشكال وتنوع في الشعب المرجانية من حولين الجزيرة. لو بقارن الي شفته في الشعب المرجانية في المالديف وعندنا في البحر الأحمر ففي تنوع كبير بين الأثنين، بس المنافسة قوية والي عندنا بنفس الرهابة!

الـ spa في الجزيرة كان رهيب برضوا! ومفتوح على البحر، دلعت نفسي وأسترخيت مزبوط هنا.

جزر المنتجعات غالباً تكون مملوكة بالكامل من قبل المنتجع، مهم تجي هنا جاهز، لإنه ماراح يكون في أسواق غير متجر المنتجع ولما تحجز في المنتجع أحجز وجبات الأكل Full board، لإنه مطعم المنتجع هو الشئ الوحيد المتوفر.

من هنا ختمت الرحلة، مبسوط اني قررت أسوي تجربة الجزر المحلية لإنها أضافت لي أشياء ما كانت تجربة المنتجع حتضيفها ليا.

أيامي كانت مشمسة جداً هنا ☀ وفي Maafushi الحمدلله. الي في الجزيرة قالوا لي اني محظوظ، أخر عشرة أيام كانت كلها أمطار. توقع الطقس صعب جداً على جزر المالديف، ولكن عموماً ما ينخاف منها لإنها تتميز بأجواء إستوائية ومشمسة على مدار السنة. أخر يوم ودعتنا الجزيرة بالمطر.

خلاصة الجزيرة: منتجع aaaVeee Nature’s Paradise رهيب وجديد وشواطئه رهيبة مرة، وأسعاره خورافية لو حجزت في وقت جيد. aaaVeee فيه أشياء رهيبة أكثر من إني اقدر أغطيها وهوا لناس معينة حتقدر جو الطبيعة الي فيه. المنتجع مصمم إنه يكون على جزيرة طبيعية وبدون تعديلات كثير أو تدخل على طبيعتها، وهو من المنتجعات القليلة الي محافظة على هذا المبدأ. هل أنصح فيه لشهر العسل؟ لو تبغى شي أفخم حتلاقي وحيكون أنسب وأغلب Couples الي شفتهم هنا كانوا يجوا كإجازة لهم أو anniversary مو شهر عسل، فهو أنسب لإجازة، بس برضوا ينفع لشهر العسل وممكن يكون خورافي لو جوه يناسبكم إنتوا الاثنين. أكثر شيء تقعد فيه 4 أيام أكتر من كده بتطفشوا فيه، وهذا قانون تقدر تتبعه لكل المنتجعات السياحة لا تحجز أكثر من أربعة أيام في نفس المكان لإنه غالباً بتطفش وما في شيء تسويه كتير، بحكم إنك في جزيرة منعزلة.


هل أعيدها ثاني؟

يس، أكيد! في شيء أستوعبته في المالديف، إنه كيف أغلب الأجانب يسافروا لها من أقصى الأرض 🌎، وهيا هنا جمب رجلنا! ومو كتير نروحها، المالديف نقطة راحة وإستجمام مثالية ممكن نزورها كل فترة. وأنا هنا أثبت إنه مو لازم تكون المالديف لشهر العسل، أو تكون محوش كنز عشان تقدر تروح، السفر الإقتصادي “Budget traveling” صار الآن معروف عند الأغلب والمراجع على الإنترنت كثيرة، ما أقدر أقول إنه رحلتي كانت مره إقتصادية، أنا دمجت بين كذا شيء وركزت إني أنبسط. من أغلب الأجانب الي كانوا زيي مسافرين لحالهم ما راحوا منتجع في النهاية، فكرتهم إنه يبغوا الرحلة إقتصادية.

السفر للجزر صار الآن شيء في قلبي وأبغى أسوي زيادة منه، الأرض مليانة بأماكن وتجارب ما تخطر على البال، بدري على الكواكب الثانية.

لو وصلت هنا وقرأت الي فات، فأنت وصلت لنهاية أطول بلوق كتبته إلى الآن، شكراً لصبرك وحماسك مع القصة! ما كنت أبغاها لدي الدرجة طويلة، بس عجبني كيف طلعت في النهاية. لسه في حكاوي وتفاصيل ما كتبتها، ممكن أحكيها مستقبلاً في مكان ثاني. أتمنى إني قدرت أحمسك إنه تسوي أشياء مجنونة، وتؤمن بسحر الحياة ✨ وإنه مو لازم نعرف كل شيء أو نخطط كل شيء ، رحلتي للمالديف ما كانت مره واضحة بس في نفس الوقت النية في قلبي كانت واضحة لأيش أنا أبغى.

أشياء أتكلمت عنها:

في بالك كلام؟

  1. 6 أبريل، 2018

    تجنن تجربتك، حمستني مرة،
    الله يجيب اليوم اللي أكتب لك فيه عن تجربتي،
    عيش ❤️

    2
  2. 7 أبريل، 2018

    جدا استمتعت وانا اقرأ 💛 وخيالي كان شغال كل شي توصفه اتخيله في مخي كأني معاك 😹
    وتحمست اسوي شي مجنون زي كذا ماقد جربت اسافر لحالي، لكن رسلت نيه انو حسافر بإذن الله رحله رهيبه ومجنونه زي كذا ولحالي
    على جزيرة ونفسي اعيش في كوخ هذا حلم من احلام طفولتي 😍
    .
    .
    كمل باقي التفاصيل الي ماذكرتها في برودكاست تحمست اعرف اكتر عن تجربتك
    واعطيني السر كيف قدرت تقتنع امك ؟🤔

    1
    1. 7 أبريل، 2018

      فليبارك حلمك ويصير حقيقة.
      بالنسبة لسؤالك، ما كنت متخيل أنها حتعارض أبداً على السفرة دي، حسبتها متعودة على الجنان حقي. حاولت اقنعها وما زبط أبداً. لما تركت الموضوع وسلمته هيا بنفسها رجعت رضيت. ماما رهيبة 💜، وجات على نفسها وخوفها عليا وخلتني أنطلق 🚀

      1
  3. 9 أبريل، 2018

    مرة شيء رهيب ما شاء الله ❤🌟 + ما تعتبر مرة طويلة 🌞✨ بالعكس أحس في كتير حينبسطوا منها يومًا ما و يندهشوا “اوه يا إلهي في أحد كاتب بالعربي عن شي قد كدا!”
    “الأرض مليانة بأماكن وتجارب ما تخطر على البال، بدري على الكواكب الثانية.”
    وااو! دا السطر من جد ينفع يكون سطر لفلم. 👏🏻👏🏻❤❤

    1
  4. 31 مايو، 2018

    واااااوا ماشا ءالله يا بختك يا كشميري انا من زمان أفكر أعما كدا بس متردد
    وعلى فكرة درس مع بعض سوا في UBT 😁

    1
  5. 2 يوليو، 2018

    عمري مااتخيلت انو في تفاصيل صغيرة فحياتي سويتها ممكن تكون انجاز حقيقي استوعبت كل اللي حوليا من التفاصيل زي اول مره غصت مع السلاحف في جزر فماليزيا وكانت كبيرة بشكل مايصدق وكيف اننا هنا فجدة قدرنا نشوف دلافين من اول طلعة صيد وغيرها بس من اللي قلتها في رحلتك وكلامك جا فوقتو لدماغي وزكرتني بكل الزكريات والتفاصيل الصغيرة حقيقي شكراً لانك بتشركنا تفاصيل لطيفة زيك ❤️ووصلت لنهاية البلوق وكني عايشة ومسافرة للمالديف😍

    1

حرسلك الأشياء الجديدة قبل أي أحد