من يوم ما دخلت في عالم الأكل الصحي والحي تحديداً Raw Vegan. صرت أعرف أكثر عن أهمية الأنزيمات ونقع المكسرات والبذور.
أكل المكسرات والبذور بدون نقع، يعتبر بالنسبة لي هبل دحين. لإنه مو بس ما بتستفيد منها، كمان عملية هضمها أقرب للمستحيلة.
فكر فيها النباتات لما تنتج البذور أو المكسرات، تشحن معاها أنزيمات تخلي جسمك ما يقدر يهضمها، عشان تعدي من المعدة وتخرجها كفضلات للأرض. زي ما الحيوانات في الطبيعة تسوي!
والخطة إنه بعدين تجي موية تفك الأنزيمات وتطلع النبتة وتنتشر 🌱
أولاد اللذينة النباتات! ما بيمزحوا معانا وما بيعطونا الفواكه ببلاش😁 الفواكه والبذور هيا طريقتهم في الإنتشار والمقايضة اللي يعملوها.
مدة النقع ⏰
تختلف مدة النقع حسب نوع المكسرات والبذور المختلفة. هذا الجدول بيساعدك تعرف المدة لمختلف الأنواع.
| النوع 🌰 | مدة النقع ⏱ |
|---|---|
| لوز | 12 ساعة |
| كاجو | ما يحتاج نقع (بقوليات) |
| بندق | 8 ساعات |
| عين الجمل/Pecan | 8 ساعات |
| مكاداميا | 7 ساعات |
| فستق | 4 ساعات |
| بذور اليقطين | 6 ساعات |
| بذور دوار الشمس | 6 ساعات |
| السمسم | 6 ساعات |
| بذور التشيا | (اختياري) +20 دقيقة |
| بذور الكتان | (اختياري) |
الكاجو والتشيا والكتان، نقعهم اختياري. في الكاجو للحصول على قوام كريمي، وفي التشيا النقع لمدة بسيطة يرفع قيمته ويخلي قوامه جيلي متماسك. لو كنا نبغى نطحنهم نقدر نطحنهم مباشرة بدون نقع.
طريقة النقع
- نغسلها قبل النقع.
- نضيف موية كافية تغطي البذور للمدة المحددة. حجمها حيكبر، فضيف موية زيادة.
- ضيف ملح بحري كمعقم. (اختياري)
- بعد ما تنتهي مدة النقع، أتخلص من الموية لإنها تحتوي على الإنزيمات اللي ما نبغاها.
التجفيف
بعد النقع نحطها في مكان فيه شمس ☀️ عشان تتجفف، أو نستخدم جهاز المجفف تحت حرارة 45°c.
كذا نكون نقعناها وجففناها بدرجة حرارة مناسبة ونحافظ عليها بأعلى قيمة غذائية. وصارت مفعلة Activated ⚡️
📷 صورة الغلاف من: Marta Branco
في بالك كلام؟
لمى انقع اللوز واجففه متى تنتهي مدة صلاحيته،كم يطول معايه ؟؟
ما أعرف بالضبط كم. بس عادة أحطه في الثلاجة بعدها أفضل شيء واتاكد انه مقفل عليه كويس عشان الرطوبة وما تنمو عليه بكتيريا،
قد قعد عندي حول الاسبوعين تقريباً