في هذي الحلقة أتكلم عن هرمون الدوبامين، أيش هو وكيف نحقق التوازن اللي يساعدنا نعيش بسعادة بشكل متزن ومستمر.

أيش هو الدوبامين؟

• الدوبامين هو ناقل عصبي يرسل إشارات بين الخلايا العصبية في الدماغ.
• الدوبامين يعمل على المناطق في الدماغ اللي تعطيك شعور التحفيز، المتعة، والرضا.
• كمان الدوبامين له دور في التحكم في الذاكرة، المزاج، التركيز، والاحساس بالوقت، ووظائف الجسم الأخرى.
• الدوبامين ببساطة هو هرمون التحفيز والمكافأة.
• سوي شيء مقابل شيء آخر.
• مثال الأكل.
• لما تكون نسبة الدوبامين عندنا منخفضة ما يكون عندنا حافز كافي انه نسوي أشياء في الحياة بالذات الأشياء اللي تطلب مجهود.

غير نظرتك

• الدوبامين نقدر نشوفه إنه عملة.
• هذي العملة الدماغ يستخدمها عشان يحفزنا ويكافئنا لتحقيق أهدافنا.
• وهذي العملة ينفع نشوفها إنها رصيد عندنا، لازم نستخدمه بحكمة.
• لو أفرطنا في استخدامها حنفلس، ولو استخدمناها بحكمة حيكون دائماً عندنا رصيد كافي نستفيد منه.

أشياء طبيعية تفرز الدوبامين

• أكل طعام مفضل.
• ممارسة الجنس.
• الفوز في لعبة.
• إنجاز المهام.
• ممارسة الرياضة.
• مخالطة الناس.
• السماع للموسيقى.
• التأمل.
• مساعدة الناس.

أشياء تفرز دوبامين عالي

هذي بعض من الأشياء اللي تفرز نسبة عالية من الدوبامين الغير طبيعي، وبمجهود منخفض وبشكل سريع.

• الوجبات السريعة، والطعام العالي بالسكر.
• الأفلام الإباحية.
• إدمان الألعاب.
• المخدرات
• القمار

تعزيز الدوبامين (reinforcement)

• الشعور الجيد اللي تشعر به بعد إفراز كمية كبيرة من الدوامين يخليك تبغى زيادة من هذا الشعور (مكافأة).
• هذا الشيء هو اللي يخلي الدوبامين مرتبط بالإدمان. بالذات لما يكون المجهود مقابل الحصول على الدوبامين سهل وسريع.
• على سبيل المثال: لما نأكل وجبة لذيذة، يفرز دوبامين في دماغنا ونشعر معه بشعور بالرضا، هذا الشعور يتم تعزيزه ليحفزنا أن نأكل نفس الوجبة مرة ثانية في المستقبل.
• هذا التعزيز قد يؤدي لمشاكل في الأشياء المضرة مثل السكر والأفلام الإباحية والمخدرات. (بسبب انه الإضافات والمحفزات فيها غير طبيعية)
• أيضاً ممكن هذا التعزيز يفيدنا لو تم إستخدامه في السعي للأهداف، فلما نحط هدف وننجزه ويفرز الدوبامين، هذا الشيء حيزيد قابلية اننا نحط المزيد من الأهداف ونسعى لها في المستقبل.

إنعدام حساسية الدوبامين (desensitization)

• في كل مره نصرف فيها الدوبامين مع الوقت قد نصل لمرحلة نصبح غير حساسيين كفاية له.
• والأشياء اللي كانت تعطينا شعور جيد توقف تعطينا هو بنفس القدر، وهذا يعود إلي إنخفاض رصيد الدوبامين لدينا.
• بسبب إفراطنا في الحصول على المكافأة من الدوبامين بدون بذل مقدار كافي من الجهد.
• الدوبامين لا يتم إطلاقه فقط إستجابة للتجارب الممتعة. أحياناً يتم إطلاقه استجابة لتجارب الجديدة الغير متوقعة والغريبة. هذا هو السبب في أننا غالبًا ما ننجذب إلى أشياء جديدة ومثيرة، حتى لو لم تكن ممتعة بالضرورة. (الأكلات الغريبة، الأفلام الإباحية الغريبة)
• لما تقل حساسيتنا لدوبامين نصير نحتاج المزيد والمزيد من التنشيط عشان نشعر بنفس مقدار المتعة السابق.
• فمثال لو كان على استهلاك السكر، بدل الملعقة حنحتاج اثنين وثلاثة.
• وفي الأفلام الإباحية حنصير نحتاج أفلام غريبة وغير أخلاقية أكثر وأكثر.
• وفي المخدرات نفس الشيء وغيرها…
• حتلاحظ إنه دائماً كأنك تحتاج جرعة أعلى وأعلى.
• هذا الشيء بالتالي يؤدي للاكتئاب وغيره من الأعراض، بسبب عدم قدرتنا على الشعور بالمتعة من النشاطات البسيطة اليومية، ويخلينا ننسحب وننعزل أكثر.
• أفضل شيء لتجنب إنعدام حساسية الدوبامين هو تجنب الأشياء المسببة للإدمان وهي الأشياء اللي تفرز نسب عالية جداً من الدوبامين مثل: المخدرات، الأفلام الإباحية، الكحوليات، السكر، القمار، الطعام الغير صحي، وغيرها…
• أيضاً التعرض لنسب عالية من التوتر بشكل مستمر يفرز الكورتيزول اللي بدوره يؤثر على افرازات وعمل الدوبامين في الدماغ.

الدوبامين محفز

• استخدم الدوبامين كمحفز.
• السعي هو المكافأة. مو خط النهاية.
• حس بالاستمتاع من السعي.
• العبرة، والغاية، والمتعة تكمن في الرحلة وليست في نقطة الوصول.

.الدوبامين غير مسؤول عن المتعة، بل عن ترقب المتعة. هو المسؤول عن الرغبة والحافز لسعيك نحو السعادة
روبرت سابولسكي –

الدوبامين والألم

• في علاقة طردية بين مقدار الألم اللي نختبره ومستويات الدوبامين اللي حنحصل عليها.
• فمثلاً لو كان عندنا تمرين في النادي، وكنا مستثقلين هذا التمرين وبس نفسنا نقعد في البيت ونتفرج تلفزيون، لو رحنا النادي واتمرنا (اختبرنا الألم) وانجزنا الهدف اللي هو التمرين. بعدها راح يفرز الدوبامين وراح نستمتع أكثر بأكل وجبة قدام التلفزيون. كل هذا بسبب أننا أختبرنا الألم، وأنجزنا الهدف وكانه وسعنا من رصيدنا بالاستمتاع.
• كلما زاد الألم اللي تشعر به، زادت كمية الدوبامين اللي تقدر تحققها في مسار السعي.
• مثل الشاور البارد (cold shower) تختبر الألم عشان تحصل على الدوبامين.
• فلو حاس بتحدي وصعوبة في شيء معين أفضل شيء تسويه تحول هذا الألم لدافع يخليك تنجز اللي محتاج تنجزه عشان تختبر بعدها شعور أكبر بالإنجاز.

الرغبة هي ما تجعلني أشعر بالحياة
Craving is what makes me feel alive
– أندرو هوبرمان

أزمة الدوبامين Dopamine crash

• أحياناً بعد إنجاز وتحقيق شيء كبير في حياتك، ممكن تحس بهبوط كبير يسمى Dopamine crash.
• رغم إنه أنت حققت شيء إيجابي ومفيد لك، بس ليش بعدها نحس بهذا الهبوط؟
• السبب يكمن في المبالغة بالاحتفال والإنجاز، وبالتالي صرف دوبامين كبير، وتوقع إنك الآن وصلت!
• في عدة أمور ممكن تسويها تساعدك تتجنب أزمة الدوبامين هذي.
• أولاً عدم المبالغة بالاحتفال وتضخيم الأشياء.
• خذ الوقت وأعطي كل شيء حقه من الإحتفال المعقول
• ثانياً توقع حصول الهبوط، معرفتك بوجود الهبوط راح يقلل أثره عليك وحيقلل من مقاومتك له.
• شوف الموضوع زي البندول لو راح يمين يحتاج يرجع يوازن شمال.
• خذ وقتك أنك ترجع تتوازن، أنت وصلت القمة، تقبل أنك حتمر ببعض الهبوط في المشاعر وتشعر كأنك لم تحقق شيء.
• خلي مصدرك من الدوبامين في السعي أكثر من النتيجة. أبدأ في السعي مجدداً

أنواع الحصول على الدوبامين

• في نوعيين من الحصول على الدوبامين:
• 1- من الاستهلاك: الأكل، تتفرج شيء، تلعب لعبة، أفلام إباحية، سوشيال ميديا.
• 2- من الإنتاج: تصنع شيء جديد، تنجز مهام، تصنع محتوى، ترتب البيت وتنظفه، تطبخ وجبة، تسوي مشوار، تساعد أحد.
• ركز إنك تحصل عليه أكثر من الإنتاج مو الإستهلاك.
• الإعتماد في الحصول عليه من الاستهلاك يسمى الإدمان، أما الإعتماد في الحصول عليه من الإنتاج يسمى الشغف.

دوبامين ديتوكس Dopamine Detox

أيش هو؟

• ببساطة هو الإقلاع عن أي من أنواع الاستهلاك اللي تفرز نسبة عالية من الدوبامين.
• يسموه أيضاً صيام الدوبامين Dopamine fasting.
• الهدف منه هو إعادة ضبط الدماغ وعمل الدوبامين والنواقل العصبية (إعادة برمجة Reset).
• ويخليك بالتالي أكثر حساسية لمكافئات الدوبامين مستقبلاً.

ايش فوائده؟

ليش تسوي دوبامين ديتوكس؟

• الإحساس بالمتعة والرضا من أبسط الأشياء وبشكل مستمر
• زيادة الحافز والرغبة الداخلية
• تحسين التركيز
• تقليل التوتر والاكتاب
• تحسين جودة النوم
• تحسين الإبداع والإنتاجية

أعراض إنخفاض رصيد الدوبامين

علامات الحاجة لدوبامين ديتوكس.

• الشعور بالتعب وعدم وجود حافز
• الشعور بالحزن وفقدان الأمل
• مشاكل في التركيز
• إنخفاض الرغبة الجنسية
• تقلبات المزاج
• صعوبة اتخاذ القرارات
• مشاكل في الذاكرة

نصائح

كيف تسوي ديتوكس وتنجح فيه.

• في نوعين للديتوكس:
  1- تقلع عن جميع أنواع الإستهلاك اللي تفزز الدوبامين.
  2- تقلع عن بعض منها مثل: السوشيال ميديا، ألعاب الفيديو، السكر، الطعام الغير صحي، الأفلام الإباحية.
• مدة الديتوكس تختلف، كل ما كان أطول كل ما كان أفضل وتعتمد المدة على شدة إدمان الشخص على عادة معينة .
• 90 يوم هي المدة الأطول لأشد أنواع الإدمان مثل الإباحية.

الخطوات

• في البداية حدد أكثر نوع إستهلاك يعطيك مكافأة دوبامين.
• حط خطة كيف حتتفادى التعرض له لفترة معينة أو الإقلاع عنه تماماً.
• أوجد بديل صحي للعادة المضرة اللي بتحاول تقلع عنه. مثال بدل الألعاب، تتمرن، تقضي وقت مع الأصحاب والأهل، تقرأ كتاب.
• كن صبور وخذ الوقت والمحاولات الكافية للإقلاع عن أي عادة أو مصدر معتمد عليه.
• في أشياء تساعدنا في إعادة ضبط الدماغ منها الاهتمام بالأكل الصحي والتغذية والنوم المبكر والكافي، والشاور البارد.

في النهاية

• أعرف متى توقف وتحط حد، عشان بعدين تقدر تستمتع في الشيء اللي نفسك فيه أكثر.
• نفس الشيء لما تبذل مجهود كبير، ريح شوية واستمتع.
• لا تكون قاسي بزيادة وصارم مع نفسك في هذا الموضوع، أسمح لنفسك في أوقات وأعرف أنك حتسهو ومحا تكون مثالي دائماً.
• بس لما تضيع الطريق أرجع ثاني وكمل.

أشياء أتكلمت عنها

•  Dopamine Detox | Andrew Huberman
• علاقة الدوبامين بالشغف | دوباميكافين
• أحسن نوع ستيفيا وكيتو
• جلسة الاستشارة
• روابط حساباتي وموقعي

كتبت في: دوبامين Dopamine 🧪🧠 - كشميري.

في هذي الحلقة أشارك معاك مفهومي عن أهمية الخطوة الأولى.

كل شيء كبير يبدأ من خطوة من حركة بسيطة. حشارك معاك سلسلة من الخطوات تقدر تجربها لو حسيت نفسك تبغى تبدأ أو تحقق شيء بس مو عارف كيف.

الطريقة:

1. التخيل
   أستخدم التخيل عشان تسهل العملية على نفسك، لإنه الدماغ راح ينشط النقاط المسؤلة عن الفعل. مثلاً تبغى تتمرن، أتخيل نفسك وأنت بتقوم، وبتلبس لبس الخروج، وبتنزل من الدرج وبتروح لنادي، أتخيل كل شيء بأبسط التفاصيل.
2. أبدأ بخطوة بسيطة
   مثلا لو في مشكلة بتشتغل عليها في الشغل ، أبدأ بالبحث عنها وفيها كخطوة أولى.
   الخطوات الكبيرة تخوف الدماغ وتوتره، فنقدر نناور الدماغ ونبدأ بخطوات صغيرة.
3. قسمها
   قسم الأشياء الكبيرة لأشياء أصغر.
4. غير المسار/الطريقة
   غير المسار أو الطريقة لما تواجه عوائق وما بتلاقي لها حل، ممكن تأخد بريك وترجع تكمل من منطقة جديدة.
5. الاستمرارية
   أستمر لما تحس أنك ركبت الموجة وصار في إيقاع (Rythem). وأحتفل بالإنجازات الصغيرة. كافئ نفسك بأشياء بسيطة معقولة. زي كلام ومديح، أكلة تحبها، مسلسل، فيلم أو لعبة، خلي المكافئات معقولة تدفعك لإنجازات أكثر. لا تستنى حتى الإنجاز الكبير عشان تكافئ نفسك.

طريقة كايزن The Kaizen Way

“ما هي الخطوة الصغيرة للغاية التي يمكنني اتخاذها لتحسين العملية الحالية أو المنتج؟”

“What extremely small step can I take to improve the process or product?”

“البدء من مكان ما ، في أي مكان ، قد يكون أهم شيء.”
“Starting from somewhere, anywhere, might be the most important thing”

أشياء أتكلمت عنها

• شيء واحد 1⃣
• بوصلة الحماس
• حرك الطاقة
•  Change Your Life – Kurzgesagt
•  The Kaizen Way by Robert Maurer
• أخدع عقلك للإنجاز – إيهاب حمارنة
• روابط حساباتي وموقعي

كتبت في: أهمية الخطوة الأولى 🏌️‍♂️ - كشميري.

في هذي الحلقة أكلمك عن مفهوم تحريك الطاقة بالنسبة لي وكيف تحرك الحياة معاك في وقت الركود.

أيش يعني تحرك الطاقة؟

يعني تمشي أي طاقة عالقة في حياتك، أي مواضيع وأهداف معطلة مو قاعدة تمشي.

تحريك الطاقة بالنسبة لي هو نوع من أنواع لفت إنتباه الكون! عشان يطل فيك ويلحقك.

اليوم أكثر من قبل نعرف قد أيش عالمنا عبارة عن طاقة كل جزء من أي شيء نعرفه في داخله طاقة متحركة وتتذبذب، أتكلمت أكثر في حلقة أبعاد الواقع والحقيقة عن هذا الموضوع.

كيف تحرك الطاقة

• تحط نية
  النية تحرك الأشياء في الكون
• تنجز مهام معلقة
• حرك جسمك
  أرقص، أجري، سوي أي رياضة حركية.
• تحرك الأثاث
• تنظف البيت والممتلكات
• عبر عن أي مشاعر مكبوت
  فضفض، أبكي، عبر.
• تضحك
• أمتن
• سامح
• أخرج عن روتينك
  سوي شيء غير متوقع، ألعب، أرسم، سوي شيء مو من عادتك في الفترة الأخيرة تسويه.
• طبطبة
  مهم تعرف إنه طبيعي بتمر بمرحلة خمول في الطاقة وتحرك الأشياء، أغلب الناس وأرهب الناس في الحياة يمروا بدا الشيء دائماً، أنت مهمتك أتحرك وخلي الحياة تقوم تلحق وراك.

النجاح خجول، لن يأتي وأنت تراقبه.
.Success is shy، it won’t come out while you’re watching
— Tennessee Williams

حرك الطاقة

هذا إقتباس من واحد من كتبي المفضلة The Prosperity Secret للكاتب Markus Rothkranz يقول:

“هل سبق لك أن لاحظت أنه عندما جلست في انتظار وصول المكالمة المهمة، لم يحدث ذلك أبدًا؟
ولكن عندما ذهبت في إجازة أو أخذت رحلة على الطريق أو ببساطة خرجت مع العائلة ،عندها بدأت المكالمات الهاتفية تأتيك؟
عندما لم تكون موجود؟ لماذا؟ حسنًا ، فكر في الأمر. ماذا كنت تفعل عندما كنت جالسًا تنتظر؟
لا شئ. وماذا كنت تفعل عندما خرجت؟
كنت تتحرك. كنت تفعل شيئًا. هذا مهم للغاية يجب أن أملأ الصفحة بأكملها بهذة العبارة.”

Have you ever noticed that when you sat around waiting for the important call to come through, it never did? But when you went on vacation or took a road trip or simply took off to be with family, that’s when the phone calls started coming in? While you were gone? Why is that? OK, think about it. What were you doing when you were sitting around waiting? Nothing. And what were you doing when you took the road trip? You were MOVING. You were doing something. This is so important I should fill the whole page with this statement

أشياء أتكلمت عنها

•  The Prosperity Secret
• روابط حساباتي وموقعي

كتبت في: حرك الطاقة 🚣 - كشميري.

بحكيك عن مفهومي وملخصي لمبدأ وكتاب “الشيء الواحد” وكيف تقدر تستخدمه في حياتك وتستفيد منه، وهل تعدد الشغف والاهتمامات يتعارض معاه؟

الشيء الواحد

مبدأ الشيء الواحد “The one thing” يتركز على أنك تركز الشيء الواحد الأهم في حياتك.

ويشرح أحد كتاب الكتاب Gary Keller كيف حياته كان يصرف فيها طاقة كثير وتركيز عالي على مشاريع مختلفة، الى ما وصل لمرحلة الإحتراق في حياته. يقول هذا الشيء جاب لي النجاح ولكن جاب لي المرض من النجاح في نفس الوقت.

بعدها قرر يجرب يركز على أشياء أقل. ويقول “صرت ناجح أكثر من ما كنت أحلم، وشعرت بأفضل من أي وقت في حياتي” أستوعب إنه الناس تحقق النجاح لإنها تركز على أشياء أقل مو عشانها تسوي أشياء كثيرة.

شركة Apple

نقدر نشوف هذا الشيء على سبيل المثال في شركة أبل وستيف جوبز. ستيف جوبز في فترة من حياته في أبل تم فصله من الشركة، وعندما عاد لها بسنوات، لاحظ تغييرات كثيرة، ومن الأشياء اللي قام بتغييرها هو تقليل الأقسام والمنتجات والتركيز على الأهم.

لما تفكر في شركة أبل أو تسأل أي شخص عن شركة أبل، غالباً أول شيء يجي في بالك هو منتجها “الأيفون”، اليوم أبل سنوياً تحقق 50٪ وأكثر من أرباحها من الأيفون. فنقدر نشوف كيف الشيء الواحد لأبل هو الأيفون، وبعده المنتجات الأخرى.

أسال نفسك

“أيش هو الشيء الواحد اللي أقدر أسويه، ولو سويته كل شيء ثاني حيصير أسهل أو غير مهم؟”

أسئل هذا السؤال لما تحس نفسك متوتر ومتلخبط. أسئله لما تحس إنك تحتاج تركيز أكثر.
أحياناً لما يكون عندنا مهام كثيرة تنتظر نسويها يكون في نوع من الوهم إنه كل هذي المهام تعتبر “عاجلة” ولها نفس الأهمية.

بس لما نوقف ونسأل السؤال “أيش هو الشيء الواحد اللي أقدر أسويه، ولو سويته كل شيء ثاني حيصير أسهل أو غير مهم؟” حيطلع لنا شيء منهم كأهم شيء نسويه الآن.
الكاتب Gary يقول: غايتك في الحياة “هي الشيء الواحد اللي تبغى حياتك تكون عنه، أكثر من أي شيء ثاني.”

في حياتك

خلينا نتكلم عن كيف تستخدم هذا المبدأ في حياتك وتستفيد منه.

تحديد الأولويات

رتب أولوياتك وأعطي الأولوية الأعلى لـ الشيء الواحد The one thing.
هذا الشيء بيحل لك مشكلة “التبديل بين المهام”، اللي تؤثر سلباً على كفائة إنتاجيتك وممكن تسبب أخطاء أكثر في عملك.
التركيز على شيء واحد ومهمة واحدة في وقت واحد، حيحسن سرعة وكفائة إنتاجيتك وتركيزك وبيقلل أخطائك.

حالة الـ Flow

في الفلسفة اليابانية الايكيغاي. يتكلم عن إن “التركيز على شيء واحد راح يساعدك تندمج وتدخل في حالة التدفق (flow)” وتكلمنا أكثر عنه في تدوينة أيش هو الإيكيغاي IKIGAI؟.

في قائمة المهام

في قائمة المهام فرق بين: اللي “ممكن تفعله” واللي “يجب أن تفعله”
قاعدة باريتو تقول: 20٪ من المهام هي اللي تجلب لك 80% من النتائج وهنا نسميها “قائمة النجاح”.
فبدل ما تحارب على كل الجهات وما تشعر بالإنجاز في حال لم تكمل جميع قائمة مهامك. حولها لقائمة نجاح وركز على ما هو الأهم لك وفي حال أنجزته، المهام الأخرى ستصبح أسهل أو غير مهمة.

صغر الأسئلة

أسئل سؤال كبير وصغره، مثلاً:

• “أيش الشيء الواحد اللي أبغى أحققه في يوماً ما؟”
• “بناءً على هدفي في يوماً ما، ما الشيء الواحد الذي أستطيع أن أفعله في الخمسة سنوات القادمة؟”
• “بناءً على هدفي في الخمسة سنوات، ما الشيء الواحد الذي أستطيع أن أفعله في هذي السنة؟”
• “بناءً على هدفي لهذي السنة، ما الشيء الواحد الذي أستطيع أن أفعله في هذا الشهر؟”
• “بناءً على هدفي لهذا الشهر، ما الشيء الواحد الذي أستطيع أن أفعله في هذا اليوم؟”

إلى ما تصل إلى “أيش اللي أقدر أسويه الآن، بناءً على هدفي في يوماً ما” هذا الشيء بيغير منظورك للأهداف ويخليك تشوفها من نظرة “الآن”.

في اكتساب العادات

عند قيامك بإكتساب عادات جديدة تكون هناك مقاومة لإراتدك، وإذا ما كنت حذر وواعي لقوة إرادتك وطاقتها ممكن تقوم بمحاولة تغيير عادات متعددة ومختلفة تسبب بالتالي إستنزاف إرادتك وعدم تحقيقك لأي منها.

لذلك أسأل “أيش أهم عادة أقدر أكتسبها الآن وأنميها لتطوير نفسي، ولو أكتستبتها كل شيء ثاني بيصير أسهل أو غير مهم؟”

بعد ما تكتسب العادة الجديدة وتتعود عليها وتصير سهلة لك، هنا تقدر تسأل السؤال ثاني وتبدأ شيء جديد.

أسئلة

المزيد من الأسئلة تقدر تسألها نفسك في جوانب مختلفة، لتساعدك في التركيز على شيء واحد.

• “في عملي أيش الشيء الواحد اللي أقدر أفعله لتحقيق هدفي لليوم، ولو فعلته كل شيء ثاني بيصير أسهل أو غير مهم؟”
• “في صحتي أيش الشيء الواحد اللي أقدر أفعله لأحقق أهداف نظامي الغذائي، ولو فعلته كل شيء ثاني بيصير أسهل أو غير مهم؟”
• “في علاقاتي أيش الشيء الواحد اللي أقدر أفعله لأحسن من علاقتي مع شريك حياتي في هذا الشهر، ولو فعلته كل شيء ثاني بيصير أسهل أو غير مهم؟”
• “في أموالي أيش الشيء الواحد اللي أقدر أفعله لأرفع من دخلي خلال السنة، ولو فعلته كل شيء ثاني بيصير أسهل أو غير مهم؟”

متعدد القدرات والمواهب

لو كنت شخص تحب أشياء كثير ومختلفة “Multipotentialites”، ممكن ما تحس عندك سبب واحد أو شغف واحد. وممكن تحس بتعارض مع مبدأ “الشيء الواحد”.
هنا نصيحتي لك إنه تستخدم الشيء الواحد عشان يساعدك تركز وتحدد أولوياتك، وليس ليحرمك من فعل ما تحب.
ركز على “الشيء الواحد” الأهم لك وبعدها أكمل عملك في الأشياء الأخرى اللي تحبها.

النهار والليل

ممكن يكون عندك شيء أهم في فترة النهار مثل “الوظيفة” وفي الليل شيء مهم أخر مثل العائلة، النادي، أو العمل الخاص..

التغيير

عادي لو الشيء الواحد تغير مع الوقت وطبيعي جداً، راح تتغير اهتماماتك وتنتقل بينهم حسب ما يناسبك وبعد الإنتهاء منهم.
مهم تعرف أنت ماذا تريد وما يتناسب معاك. خذ من مبدأ الشيء الواحد ما يناسبك.

“أسعى ورا اهتماماتي بالتوالي وليس بالتوازي”
– علي محمد علي (علي وكتاب)

قول “لا”

خصص وقت محدد في يومك مثلاً 4 ساعات على الأقل لتركيز على الشيء الواحد.
قول “لا” لما تحتاج تقول لا.
لناس اللي تاخذ وقتنا، للفرص اللي ليس لها علاقة بالشيء الأهم لنا.

وتذكر:

“حتى أنتهي من الشيء الواحد، كل شيء ثاني يعتبر إلهاء!”
“!Until my one thing is done, Everything else is a distraction”

أشياء أتكلمت عنها

• The ONE Thing
• الشيء الوحيد The One Thing – علي وكتاب
• Why some of us don’t have one true calling
• حساب تبسيط
• روابط حساباتي وموقعي

كتبت في: شيء واحد 1️⃣ - كشميري.

في هذي الحلقة أتكلم عن الحماس، واحد من أهم المبادئ اللي أحبها وتفيدني. أيش هو الحماس؟ وكيف ممكن نستفيد منه في حياتنا.

عن الحماس

في عدة نقاط عن الحماس جمعتها من كلام Bashar بترجمها وأشاركها معاك.

• أسأل “أيش أكثر شيء محمسك؟”، وأتبعه.
• الأسباب والتفاصيل ما تهم، بالنسبة للحماس.
• في كل وقت وكل لحظة “أيش أكثر شيء يحمسك؟”
• طل في الخيارات وأختار أكثر شيء محمسك من الخيارات المتاحة.
• الحماس كأنه يقول لك “هذا اللي مفروض تسويه”.
• الأشياء الصغيرة اللي تحمسك هي اللي حتوصلك في النهاية بالأشياء الحماسية الكبيرة، وحتختصر لك الطريق في الوصول لها.
• أتبع الحماس، اللي عندك أعلى قدرة على تنفيذه حالياً.
• مع الوقت حتصير تستشعر ويكون عندك حساسية أعلى لحماسك، وتنتبه له بشكل أوضح وأسرع.
• بالتالي ما راح يصير عندك خيارات كثير تلخبطك وتحتار بينها.
• الحماس حقيبة متكاملة فيها كل اللي ممكن تحتاجه.
• أتبع الحماس بدون توقعات مسبقة لنتيجة.
• ممكن تجيك معيقات، لا تتجاهلها وأتقبلها، حتساعدك تفهم نفسك أكثر وماذا تريد.
• إتباع الحماس، بيخلي حياتك أرهب ومليئة الأشياء المشوقة.

تقدر تقرأ أكثر عن الحماس، كتبت بلوق في الموضوع: كيف يكون الحماس دليلك؟

عند إتباعك لحماسك بشكل مستمر، سوف ينتهي بك المطاف بتحقيق غايتك من الحياة.
― بشار Bashar

أشياء أتكلمت عنها

• البودكاست العربي | دليل برامج البودكاست العربية
• Finding your Highest Excitement
• Some of the Core Concepts of Bashar
• How to Turn Anxiety Into Excitement
• روابط حساباتي وموقعي

كتبت في: بوصلة الحماس 🧭⚡️ - كشميري.

كتبت في: تقول أهدافك؟ 📣 - كشميري.

كتبت في: قوة النوايا والأهداف 🎯 - كشميري.

كتبت في: فضفضة عن السوشيال ميديا 📱 - كشميري.

الإيكيغاي IKIGAI 生き甲斐 فلسفة يابانية تجاوب على سؤال “أيش الشيء اللي تعيش عشانه؟” أو “أيش يخليك تصحى الصباح كل يوم؟”

يركز على هذي الجوانب:

1. أيش تحب تسوي؟ (هواياتك)
2. أيش تعرف تسوي؟ (مهاراتك وقوتك)
3. أيش يحتاج العالم؟
4. أيش ممكن تسوي ويجيب لك فلوس؟

كيف تطبقه في حياتك؟

عشان تبدأ تطبقه على طول، ممكن تسوي جدول لكل قسم من هذي الأربعة أقسام وتبدأ تجاوب وتحط نقاط تحت كل عامود. حيساعدك تفهم نفسك وتعرف فين قوتك والمهارات اللي يحتاجها منك العالم…

ملخصي لأهم نقاط الكتاب

• مو لازم تؤمن بالتقاعد لو كنت تسوي شيء تحبه.
• المفتاح لطول العمر: نظام أكل صحي، ممارسة الرياضة، معرفة غايتك وسببك، والروابط الإجتماعية.
• “املأ بطنك حتى 80٪ فقط”.
• السعادة تلاقيها في السعي والفعل نفسه، مو في النتيجة.

• خليك في حالة من الاندماج flow.
  .Be in a state of flow
• ابدأ ولا تتلكع، أول ما تبدأ بخطوات صغيرة، حتبدأ تندمج وتدخل في حالة flow من الاندماج.
  Get started don’t dwell, as soon as you start with small steps, you will get in a flow.
• العادات اليومية تساعدك تدخل في حالة الاندماج.
• التركيز على شيء واحد راح يساعدك تندمج وتدخل في حالة flow.
• أكثر الناس سعادة هم الأشخاص اللي يقضوا أغلب الوقت في حالة من الاندماج والتدفق. مو اللي يحققوا أكثر.
• إبتسامك لناس هو من أهم مفاتيح السعادة.
• سلم على الناس اللي تقابلهم في الشارع حتى لو ما تعرفهم.

أشياء عجبتني

• فيديو من ورشة يعلمك كيف تستخدم Ikigai
  How To Find And Do Work That You Love (Ikigai)

كتبت في: أيش هو الإيكيغاي IKIGAI؟ - كشميري.

أبغى أحكيك عن الحماس وتأثيره في حياتي، وكيف أستخدمه عشان أوصل لشيء اللي أحب أسويه ومقدر لي.

الحماس أيش هوا؟

الحماس هو البوصلة اللي تقولك من فين الطريق. لما يجيك الحماس لشيء، لا تحاول تفهم كثير ليش الشيء دا محمسك دحين! حاول تركز على إتباع حماسك، حماسك حيدلك على أشياء ثانية تحمسك وطول ما أنت ماشي في هذا الطريق حق “إتباع حماسك” حتطل ورا وحتبدأ تربط الخطوط وتستوعب ليش هذي الأشياء كانت تحمسك وتستوعب كيف هيا مربوطة برغباتك وأهدافك في النهاية.

لا يمكنك توصيل النقاط بالنظر للأمام، فقط بالنظر للوراء يمكنك إتمام تلك المهمة، ولذلك عليك أن تؤمن بأن تلك النقاط ستصبح متصلة يوما ما في المستقبل
― ستيف جوبز

خليني أحكيك عني شخصياً كيف بشوف الحماس مربوط في حياتي، المثال اللي بحكيك هوا دحين هوا اللي حمسني أكتب هذي البلوق. أنا ليا فترة حاس بتقصير في أني أتكلم عن شغلي ومشاريعي وأيش بسوي والتسويق لها. فاليوم بحكيكم عن واحد من مشاريعي، موقع البودكاست العربي.

هرجة البودكاست العربي

في أواخر 2012 كنت على أبواب التخرج من الثانوي وكنت بطور نفسي كثير في صناعة المواقع على الإنترنت، وبحاول الاقي نفسي في المجال. وقتها كنت أحب أسمع بودكاست مرة، وبرامج البودكاست العربية كانت قليلة وصعب تلاقيها، فكرت أنه ليش ما أسوي دليل يوثقها ويسهل أنك تلاقيها وتشوفها حسب التصنيفات، الفكرة بسيطة وكنت مره متحمس أني أشتغل عليها وأسويها، ويكون في شيء يمثل شغلي ومهارتي في تطوير المواقع وتصميمها.

أتحمست مره للفكرة وما فكرت كثير ولا ركزت في كيف هذي الفكرة ممكن ترجع لي بدخل مادي أو تكون مشروع تجاري، بالعكس كنت شايف إنها صعب تكون مشروع يرجع بدخل مادي في أي وقت قريب، ومستبعد الخيار تقريباً. كل اللي فاكره إني كنت متحمس وأبغى أسوي المشروع دا وعندي القدرة والوقت له.

أشتغلت عليه سويته، جهزته، وأطلقته

كان بسيط وبكم بودكاست في هذاك الوقت، ما يتجاوزوا 50 بودكاست. كل فترة شغلي عليه كانت حماسية وأتعلمت منها كثير.

شاركت عنه في تويتر وقتها، وبدأ الموقع ينتشر على خفيف، وينعرف كأهم دليل لبرامج البودكاست العربية ويرشح دائماً لناس الجدد للبودكاست. يبسط

هذا الشيء كان كفاية بالنسبة لي، لكل المجهود. زي ما قلت لكم ما كان عندي توقعات كثيرة له، وكنت أبغى أسوي شيء يساعد الناس يستخدموه ويستفيدوا منه، وفي نفس الوقت يمثلني ويمثل شغلي.

الى هنا القصة عادية وكذا تقريباً أنا في الغالب أشوفها.

الآن مرت تقريباً 7 سنوات من يوم إطلاقة كل فترة أطل لورى وأشبك الخطوط وأستوعب.
اليوم لما أحد يسألني عن البودكاست العربي وإذا يدخل لي فلوس، أرد وأقول: “لا المشروع غير ربحي”، ومو محمسني أوسعه لفكرة تجارية حتى الآن.

بعدين أوقف شوية وأحكي كيف المشروع دا أثر في حياتي اليوم. في أول سنة من إطلاق المشروع جاني أول عميل عن طريق الموقع شافه وعجبه، وأتواصل معايا يسألني مين المصمم عشان يبغى أطور له موقع.

فاكرين لما قلتلكم كنت أبغى شيء يمثلني ويمثل شغلي!

بعدها جاتني أول وظيفة بسبب البودكاست العربي لإنه أحد عرفني عن طريقه ورشحني “كمطور مواقع جيد”، الوظيفة دي طورتني كثير وعلمتني. بعدها صرت أحطه في CV وصار الموقع يتكلم عني لما أقدم على أي وظيفة وأقدر أقول، إنه كان سبب مؤثر في أني أحصل على وظيفتين بعدها وأنا لسه طالب جامعي وبدون شهادة أو مؤهل في المجال.

شغلي كان كفاية إنه يتكلم عني.
فاليوم لما أطل لورا أنا ممتن أني أشتغلت على البودكاست العربي وسويته بكامل حماسي وبدون ما حتى أفكر كيف ممكن يرجع لي بفائدة مادية!

سلسلة الحماس: نفسي أسوي موقع يفيد الناس ويمثلني > أتعلمت كثير > سويته > ناس أكثر عرفت شغلي > وظائف وفرص أكثر جاتني > طلعت فلوس > ونكمل…

أشياء وأمثلة كثيرة ممكن تطبقها على نفس هذا المثال، وتشوف كيف الحماس كان مؤثر في حياتك وحياة ناس ثانيين. الحماس يفتح أبواب.

الحيرة

تعرف لما تكون محتار بين كم شيء ومن جد منتا عارف أيش تختار قلبك يقول لك شيء وعقلك يقول لك شيء، ومنتا عارف تسمع مين أو أصلاً منتا عارف قلبك أو عقلك أي واحد فيهم

هنا يجي دور الحماس في أنه يدلك، لما تكون محتار. وقف وجاوب على سؤال: أيش اللي محمسني أكثر، دحين والآن؟

بعد ما تعرف أيش اللي محمسك، الآن تقدر تاخد برأي عقلك كمان مع حماسك وتوازن بينهم. أنا صار واضح لي إنه حماسي هو لغة قلبي اللي يتواصل فيها معايا!

على طاري العقل، مثلاً أنا لما أشتغلت على البودكاست العربي وقتها، واللي هوا حماسي في هذيك اللحظة، عقلي ما كان في تعارض وقتها، ما كان عندي التزامات مادية أو كنت مثلاً حستثمر مبلغ كبير عشان أشتغل عليه أو حترك مشاريع وأشغال عندي عشان بس أتفرغ له. لا كان في إنسجام بين اللي حماسي بيقولي هوا وبين عقلي اللي كان شايف انه أيوا أستغل وقتك في شيء مفيد حتى لو إني مني شايف كيف حيرجع عليك بمردود كويس.

أعرف متى تسمع عقلك ومتى ما تخليه يأثر. أنت اللي حتقرر.

اليوم أنا أتبع حماسي في كل شيء تقريباً، واحد من أهم الأشخاص اللي انا احبه ويتكلم عن الحماس كثير، ودائما يلهمني هوا Bashar وحترك رابط تحت للفيديو اللي أحبه له، يتكلم فيه عن الحماس.
واحد من الأسباب اللي بدأت فيها هذا الموقع والبلوق هوا الحماس اللي كان عندي في 2017! وهوا نفسه إختفاء الحماس للكتابة الفترة الأخيرة اللي خلاني أبعد.

الحماس أتوجه لشيء ثاني من البلوق بدأت ناس تعرفني أكثر، وأتعرفت على ناس جدد رهيبين! يشاركوني إهتمامات مختلفة، مره يحمس!

الحماس بعدها أتوجه وأتركز على البودكاست الفترة الأخير بدل الكتابة، حماس البودكاست جاء من البلوق في الأساس، في أول تجربة اللي كانت: تجربة يوم بدون كلام.

سلسة الحماس: نفسي أسوي بلوق > سويت بلوق وبدأت اكتب > اوه خليني أجرب أسجل بلوق صوت > بدأت بودكاست شطحة > أتعرفت على ناس رهيبة > ونكمل…

الحماس لما يجيك يفضل يزّن عليك، ما يجي يوم، يومين ويروح طوالي، لو كملت تسحب عليه أكيد بيوقف. والحماس بطبعه متغير ومتجدد.

بس لا تخاف عمره ما يفوتك شيء!

تجديد النية

هدفي من البلوق دا مو إنه أخليك تقدس الحماس أو تتبعه على طول كقانون، الحماس في النهاية ممكن يكون شيء أنا أفضله ويشتغل معايا، بس بالنسبة لك أهميته ممكن تكون غير شوية. نيتي من البلوقه دي إنه أخليك تنتبه له أكثر، وتعطيه إهتمام أكبر.
لما يجيك الحماس، حاول تأخذ خطوة صغيرة في طريقه وشوف هل بتتحمس زيادة وتأخذ خطوة أكبر أو لا. الحماس يجر بعضه فلا تشيل هم أنت أنوي وابدأ في اللي محمسك.

لما تجيني فترات ضياع ولخبطة في الحياة أو شغلي، ومني عارف أرجع أركز من فين. أول شيء اسويه، ابدأ أحاول وأشوف أيش أقرب شيء بيجيب لي حماس حتى لو صغير وأمشي له وأشوف، من بعدها الوضع حيصير كورة ثلج، وكده.

الشغف

يجيني أحياناً سؤال، إنه “أنت كيف تبدأ كذا شيء وبعدين مثلاً ممكن ما تكملها أو تستمر فيها؟”
جواب السؤال: إنه على قد ما الواحد دائماً يحب لما يبدأ شيء يلتزم فيه، فهو في نفس الوقت اهتماماته تتغير وحماسه يتغير. لو الواحد حيفضل قبل كل ما يجي يبغى يبدأ شيء يفكر هل حلتزم فيه أو أكمل، فهو غالباً محا يبدأ شيء. بسبب الحمل والمسؤلية اللي قاعد يحطها.

بالنسبة لي أنا دائماً لما أتحمس لشيء أحب أجرب ابدأ فيه وأشوف أيش يصير. هذا الشيء ساعدني أكتشف شغفي وحبي للكمبيوتر والإنترنت من عمر صغير.
لو أنت من الناس اللي متلخبطة ومهي عارفه أيش شغفها وأيش تحب، فجوابي لك انه حتعرف لما تجرب، جرب كل شيء يحمسك ويناديك، مصيرنا كلنا من كثر التجربة حنلاقي شيء يعجبنا، وحنشبك في خط معاه وحنستمر فيه، وحيكون وقتها هو تركيزنا، وحنكبر فيه.

الشيء اللي يحمسك، حيخليك تمسك القيتار وتقعد تحاول تعزف أيام وأيام، تحاول تزبط النوتة كل خطوة صغيرة بالنسبة لك تجاه المعزوفة حتكون إنجاز، حتكون مستعد تستثمر في القيتار الوقت، الجهد، والفلوس أنك تتعلم، الرسام نفس الشيء، تقدر تشوف المثال في أشياء كثيرة.

الأشياء اللي تحمسك وتستهويك تلاقي نفسك في الغالب علمتها لنفسك! لإنك مستعد تغوص وتنسجم فيها رغم الصعوبات والوقت الكثير إللي تحتاجه عشان تحترفها.

بينما الشخص اللي مو مجاله هذا الشيء حيترك ويوقف من أول كم محاولة، ماراح يقدر يمسك الخط الطويل، حماسه بيدله على شيء ثاني مختلف.

نسيت أقول إنه الحماس مو دائماً طريقه سهل، أحياناً الحماس يصدم فيك في جدار وتلعن أمه من بعدها، بس برضوا شوية وقت، وطل لورا والا ما تعرف إنه الحماس كان نيته طيبة معاك، وكان يبغى يعلمك شيء أو يختصر لك طريق.

نبسّط

من حكم Bashar اللي أحبها، حلخص وأترجم في نقاط:

• الحماس يشتغل زي البوصلة تدلك لشيء اللي مقدر لك تسويه، والطريق اللي روحك تبغاه.
• الشيء اللي يحمسك هو أنت!
• لإنه أنت، حيكون سلس ومنسجم معاك.
• لإنه أنت، الكون حيدعمك تكمل تسويه (مادياً كمان)، وحيخليك تتوسع فيه أكثر.
• لو حماسك بيقول لك تسوي شيء باين إنه تافه أو بسيط مرة، حتى هنا قوم وسويه!
• لإنه سعيك لهذا الشيء البسيط، احتمال يخليك تقابل شخص أو تكتشف شيء، يخليك تتوسع في طريقك.
• كل حماس مع الوقت يدلك لحماس ثاني أكبر منه ومرتبط فيه.
• لا تصر إنه نتيجة سعيك لحماسك تكون زي ما توقعت، حماسك ممكن يعرف شيء أحسن لك.

الحماس هو علامة، على أن ما تنوي القيام به، هو في توافق مع ذاتك العليا، وهذا التوافق هو ما يسبب هذا الحماس.

― بشار Bashar

حماسك وحماسي وصلنا لنهاية هذي البلوق

سؤالي لك، أيش في شيء الحماس كان مؤثر فيه على حياتك، لما تطل لورا دحين؟ وكيف هي سلسلة حماسه؟

فكر مع نفسك وشارك معانا تحت لو أتحمست!

أشياء أتكلمت عنها:

• Finding your Highest Excitement
• Some of the Core Concepts of Bashar
• البودكاست العربي | دليل برامج البودكاست العربي.
• بودكاست شطحة

زر حُب53

كتبت في: كيف يكون الحماس دليلك؟ - كشميري.