ليش بلوق، ليش دحين؟

يا أهلاً 🙏
هنا المكان اللي حكتب فيه اللي يعجبني اللي حطلع من نفسي فيه الجوانب اللي ابغى أطلعها، المكان اللي اشارك فيه التجارب والأشياء اللي احس ابغى أشاركها وأبغاها تفضل.
خلينا نتفق على شي كلامي هنا ما راح يكون منسق مرتب أو فيه تدقيق لغوي كتير، اخر إهتمامي الإملاء وقوانين اللغة، الحياة بسيطة. غالباً حكتب بالطريقة اللي تريحني التلقائية بلغة عامية مفهومة قدر الإمكان. مع بعض المصطلحات بالانجليزي يعني فترة حكتب كده وكده. عربي 80% و English 20%

من زمان أبغى Blog

فكرة انه أبدأ  موجودة من زمان بس دايماً كان في شي يوقفني، أكتر شي كان موضوع انه حكتب عن أي جانب هل حتصير بلوق عن المواضيع التقنية ولا عن التجارة ولا السفر أو Spirituality أو عن veganism كنت متلخبط. صاحبي محباتشي دائماً كان يشجعني انه ابدأ Blog.
المهم وصلت الى أنه ياحبيبي سوي Blog وحط كل شي يعبر عنك فيه، ومع الوقت حقسم البلوق لتصنيفات حسب الإهتمامات عشان تصير أرتب.

ما اعرف ايش الشكل اللي حتاخذه بس مع الوقت حيبان. الأكيد This is a space for my weird self to be exposed.

نحتاج ناس زيادة تبدأ

أؤمن مره انه نحتاج ندون زيادة، المدونات دائماً تحفظ المحتوى، وتوفره بطريقة سهلة لما تبحث عنه اون لاين، في مواضيع وتجارب كثير رهيبة ما بتتوثق عندنا، أو على الاقل في ناس بتوثقها على Snapchat وتختفي بعد يوم!
يحمس!! بصير أكتب هنا زيادة كل ما أحس وحتى أبدأ اوثق الأشياء القديمة اللي ما قد كتبت عنها.
حب وسلام.. بدايات جديدة! 🙏💜

قصة الغلاف: صورة من خط 🛣 الطائف الرياض، في رحلة لذكرى مع محباتشي.