أنك تأخذ دش بموية باردة 🚿❄️ له فوائد كثيرة صحية، ونفسية. أنا شخصياً بدأت أجرب هذي العادة في آخر 4 سنوات. في أفكار كثير مغلوطة عن البرد وإنه ممكن يمرضك بينما هو العكس! وممكن يكون من أكثر الأشياء المفيدة لك.
تجربتي
قائمة بالأشياء الإيجابية اللي لاحظتها من تجربتي لما أستمر على عادة الإستحمام بالموية الباردة.
- أتنشط بسرعة بسبب الموية الباردة.
- سرعة في التنفس.
- الجيوب الأنفية تنفتح وتتنظف بسرعة.
- أسهل علي أسوي أشياء صعبة وفيها تحدي، استحملت موية باردة في الصباح! أيش اللي بيوقفني بعدها؟
- أسهل أبني عادات جديدة وأستمر عليها أو أوقف عادات سيئة.
- يصير عندي صفاء وتركيز أكبر.
فوائده العلمية
- يحفز جهاز المناعة.
- يحسن الدورة الدموية.
- يرفع حرارة الجسم ويوازنه.
- يحسن من تشافي العضلات.
- يحسن ويسرع من عملية الأيض (metabolism).
- ممتاز للبشرة والشعر.
- يرفع ويحسن من مستوى مشاعرك.
كيف تبدأ
أول شيء دائماً لما تجي تأخذ شاور، حاول تبدأ مباشرة بالموية الباردة ❄️ وبدون تردد، خذها دفعة واحدة. حيبني عندك قوة إرادة أنك ما تتردد تبدأ شيء حتى لو إنه صعب. أثره مرة قوي.
بعدها ممكن تبدل لدش دافئ، وتختم بالبارد. التبديل بينهم له فوائده كمان.
لو مره الموضوع صعب عليك ممكن في البداية تبدأ بموية دافية وتنزل للموية الباردة تدريجياً.
كل مرة غالباً حتجي تبغى تأخذ دش بارد حتتردد وحتشيل هم. الهدف إنه رغم صعوبة الشيء “أنت حتسويه” هذا اللي يخليك أقوى لما تواجه “منطقة الراحة” comfort zone ويخليك تسوي الشيء اللي تبغى تسويه رغم الخوف والتردد.
اليوم حتى لو كنت في البحر 🌊 أو قدام شلال أو تحت المطر 🌧 أحب إني أنط فيه رغم البرودة. وطريقتي المفضلة غالباً إني أهجم على الموية بدون تراجع أو إستسلام، كذا أحس بالفائدة أكثر شيء.
لو الموية درجة برودتها مره عالية! زي مثلا في بعض النوادي الصحية يوفروا مغطس بارد، هنا غالباً أخذ الموضوع تدريجي لإنه ممكن يكون خطر تغيير الحرارة الكبير والمفاجئ.
رجل الجليد ❄️
أنصحك تتابع Wim Hof وتجرب تمرينه لتنفس. الادمي هذا يسموه “رجل الجليد” وهو من أهم الناس اللي أثبت وبحث في قوة البرودة العالية في رفع وتحسين مناعة الجسم، وغيرها من الفوائد. ويم هوف يتكلم دائماً إنه احنا بس نسينا كيف نتنفس صح وننسجم مع البرد.
طيب شتاء!؟
لو بتفكر إنه جنون الواحد يسوي هذا الشيء في الشتاء، بالعكس دحين أحسن وقت، وقت ما تحصل موية باردة حقيقية. في الصيف صعب تحصل موية باردة. ويم هوف يتكلم كيف هذي العادة وتعودنا على التواجد في البيئة الباردة والتنفس الصحيح حيخلينا نستحمل البرد ويعود الجسم يوازن ويتكيف مع البرد ويحارب الأمراض. زي أغلب الكائنات على الكوكب.
روابط مفيدة
- 📼 تمرين التنفس من Wim Hof
- 📼 فيديو قصير عن Wim Hof
- 📼 حلقة بودكاست حلوة: Wim Hof & Russell Brand
في تويتر بشارك أكثر عن تجاربي وتفاصيل للأشياء اللي أسويها، لو مهتم تابعني على تويتر.
في بالك كلام؟
متعودة عالدش البارد وأهم سبب بالنسبة لي أنه يعطيني النشاط, والصفاء بداية يومي.
وأقدر أقول أن بلوجاتك لها نفس التأثير أنها تعطيني دفعة حماسة ونشاط عشان أسوي أي شي في أي وقت أقرأها, روحك اللي توصلنا من محتواك جدًا مميزة لدرجة أني أقرأها بصوتك في رأسي😅, وأعتقد أني كمان شويتين بتحول فيجان.
ربي يوفقك ويسعدك كشميري على كُثر السعادة اللي يخلقها محتواك فينا✨💛
شكراً للكلام الرهيب دا 🙏🏼⚡️
محد يقدر يقرأها بصوتي غير مستمع البودكاست المخلص 👌
شكرًا على أرهب بلوق من صغري بأتروش بمويا باردة وكانو دايمًا بيخاصموني بس على قولك أستمتع بالفجعة حق البداية😂
بالتوفيق لك استمر🙏🏼
اذكر مره السخان حق المويه كان خربان واضطريت اتروش بمويه بارده وانا متعوده كل مره اتروش بمويه حااره بس هالمره اضطريت اتروش بمويه بارده وماانكر الشعور كان غريب ومزعج بعض الشيء بالبدايه بحكم اني متعوده ع الحار بس بعدين بديت احس بشعور حلوو ومنعش واحس ان الدم بعروقي تجدد وعلى فكره لما جربت اني اتروش بمويه بارده ما كنت ادري انك قد تكلمت عن الترويش بمويه بارده وانه مفيد وانبسطت الحين لما عرفت انه شي مفيد ، تجربه ممتعه اكيد رح اكررها
احب مواضيعك مره انترستنق شكرا مره مره ممتنه لك❤️🩹
من اسبوع اتفرجت ع اجانب بيعشقوا يسبحوا في الماية في عز الشتا، و دوله اجانب يعني الجو في أوروبا تلج تلج ،و ديه حاجة يومية بيعملوها، و اتا بتفرج و مستغربة ازااااي مستحملين ماية ساقعة في وسط جو متلج