في هذي الحلقة أتكلم عن هرمون الدوبامين، أيش هو وكيف نحقق التوازن اللي يساعدنا نعيش بسعادة بشكل متزن ومستمر.

أيش هو الدوبامين؟

• الدوبامين هو ناقل عصبي يرسل إشارات بين الخلايا العصبية في الدماغ.
• الدوبامين يعمل على المناطق في الدماغ اللي تعطيك شعور التحفيز، المتعة، والرضا.
• كمان الدوبامين له دور في التحكم في الذاكرة، المزاج، التركيز، والاحساس بالوقت، ووظائف الجسم الأخرى.
• الدوبامين ببساطة هو هرمون التحفيز والمكافأة.
• سوي شيء مقابل شيء آخر.
• مثال الأكل.
• لما تكون نسبة الدوبامين عندنا منخفضة ما يكون عندنا حافز كافي انه نسوي أشياء في الحياة بالذات الأشياء اللي تطلب مجهود.

غير نظرتك

• الدوبامين نقدر نشوفه إنه عملة.
• هذي العملة الدماغ يستخدمها عشان يحفزنا ويكافئنا لتحقيق أهدافنا.
• وهذي العملة ينفع نشوفها إنها رصيد عندنا، لازم نستخدمه بحكمة.
• لو أفرطنا في استخدامها حنفلس، ولو استخدمناها بحكمة حيكون دائماً عندنا رصيد كافي نستفيد منه.

أشياء طبيعية تفرز الدوبامين

• أكل طعام مفضل.
• ممارسة الجنس.
• الفوز في لعبة.
• إنجاز المهام.
• ممارسة الرياضة.
• مخالطة الناس.
• السماع للموسيقى.
• التأمل.
• مساعدة الناس.

أشياء تفرز دوبامين عالي

هذي بعض من الأشياء اللي تفرز نسبة عالية من الدوبامين الغير طبيعي، وبمجهود منخفض وبشكل سريع.

• الوجبات السريعة، والطعام العالي بالسكر.
• الأفلام الإباحية.
• إدمان الألعاب.
• المخدرات
• القمار

تعزيز الدوبامين (reinforcement)

• الشعور الجيد اللي تشعر به بعد إفراز كمية كبيرة من الدوامين يخليك تبغى زيادة من هذا الشعور (مكافأة).
• هذا الشيء هو اللي يخلي الدوبامين مرتبط بالإدمان. بالذات لما يكون المجهود مقابل الحصول على الدوبامين سهل وسريع.
• على سبيل المثال: لما نأكل وجبة لذيذة، يفرز دوبامين في دماغنا ونشعر معه بشعور بالرضا، هذا الشعور يتم تعزيزه ليحفزنا أن نأكل نفس الوجبة مرة ثانية في المستقبل.
• هذا التعزيز قد يؤدي لمشاكل في الأشياء المضرة مثل السكر والأفلام الإباحية والمخدرات. (بسبب انه الإضافات والمحفزات فيها غير طبيعية)
• أيضاً ممكن هذا التعزيز يفيدنا لو تم إستخدامه في السعي للأهداف، فلما نحط هدف وننجزه ويفرز الدوبامين، هذا الشيء حيزيد قابلية اننا نحط المزيد من الأهداف ونسعى لها في المستقبل.

إنعدام حساسية الدوبامين (desensitization)

• في كل مره نصرف فيها الدوبامين مع الوقت قد نصل لمرحلة نصبح غير حساسيين كفاية له.
• والأشياء اللي كانت تعطينا شعور جيد توقف تعطينا هو بنفس القدر، وهذا يعود إلي إنخفاض رصيد الدوبامين لدينا.
• بسبب إفراطنا في الحصول على المكافأة من الدوبامين بدون بذل مقدار كافي من الجهد.
• الدوبامين لا يتم إطلاقه فقط إستجابة للتجارب الممتعة. أحياناً يتم إطلاقه استجابة لتجارب الجديدة الغير متوقعة والغريبة. هذا هو السبب في أننا غالبًا ما ننجذب إلى أشياء جديدة ومثيرة، حتى لو لم تكن ممتعة بالضرورة. (الأكلات الغريبة، الأفلام الإباحية الغريبة)
• لما تقل حساسيتنا لدوبامين نصير نحتاج المزيد والمزيد من التنشيط عشان نشعر بنفس مقدار المتعة السابق.
• فمثال لو كان على استهلاك السكر، بدل الملعقة حنحتاج اثنين وثلاثة.
• وفي الأفلام الإباحية حنصير نحتاج أفلام غريبة وغير أخلاقية أكثر وأكثر.
• وفي المخدرات نفس الشيء وغيرها…
• حتلاحظ إنه دائماً كأنك تحتاج جرعة أعلى وأعلى.
• هذا الشيء بالتالي يؤدي للاكتئاب وغيره من الأعراض، بسبب عدم قدرتنا على الشعور بالمتعة من النشاطات البسيطة اليومية، ويخلينا ننسحب وننعزل أكثر.
• أفضل شيء لتجنب إنعدام حساسية الدوبامين هو تجنب الأشياء المسببة للإدمان وهي الأشياء اللي تفرز نسب عالية جداً من الدوبامين مثل: المخدرات، الأفلام الإباحية، الكحوليات، السكر، القمار، الطعام الغير صحي، وغيرها…
• أيضاً التعرض لنسب عالية من التوتر بشكل مستمر يفرز الكورتيزول اللي بدوره يؤثر على افرازات وعمل الدوبامين في الدماغ.

الدوبامين محفز

• استخدم الدوبامين كمحفز.
• السعي هو المكافأة. مو خط النهاية.
• حس بالاستمتاع من السعي.
• العبرة، والغاية، والمتعة تكمن في الرحلة وليست في نقطة الوصول.

.الدوبامين غير مسؤول عن المتعة، بل عن ترقب المتعة. هو المسؤول عن الرغبة والحافز لسعيك نحو السعادة
روبرت سابولسكي –

الدوبامين والألم

• في علاقة طردية بين مقدار الألم اللي نختبره ومستويات الدوبامين اللي حنحصل عليها.
• فمثلاً لو كان عندنا تمرين في النادي، وكنا مستثقلين هذا التمرين وبس نفسنا نقعد في البيت ونتفرج تلفزيون، لو رحنا النادي واتمرنا (اختبرنا الألم) وانجزنا الهدف اللي هو التمرين. بعدها راح يفرز الدوبامين وراح نستمتع أكثر بأكل وجبة قدام التلفزيون. كل هذا بسبب أننا أختبرنا الألم، وأنجزنا الهدف وكانه وسعنا من رصيدنا بالاستمتاع.
• كلما زاد الألم اللي تشعر به، زادت كمية الدوبامين اللي تقدر تحققها في مسار السعي.
• مثل الشاور البارد (cold shower) تختبر الألم عشان تحصل على الدوبامين.
• فلو حاس بتحدي وصعوبة في شيء معين أفضل شيء تسويه تحول هذا الألم لدافع يخليك تنجز اللي محتاج تنجزه عشان تختبر بعدها شعور أكبر بالإنجاز.

الرغبة هي ما تجعلني أشعر بالحياة
Craving is what makes me feel alive
– أندرو هوبرمان

أزمة الدوبامين Dopamine crash

• أحياناً بعد إنجاز وتحقيق شيء كبير في حياتك، ممكن تحس بهبوط كبير يسمى Dopamine crash.
• رغم إنه أنت حققت شيء إيجابي ومفيد لك، بس ليش بعدها نحس بهذا الهبوط؟
• السبب يكمن في المبالغة بالاحتفال والإنجاز، وبالتالي صرف دوبامين كبير، وتوقع إنك الآن وصلت!
• في عدة أمور ممكن تسويها تساعدك تتجنب أزمة الدوبامين هذي.
• أولاً عدم المبالغة بالاحتفال وتضخيم الأشياء.
• خذ الوقت وأعطي كل شيء حقه من الإحتفال المعقول
• ثانياً توقع حصول الهبوط، معرفتك بوجود الهبوط راح يقلل أثره عليك وحيقلل من مقاومتك له.
• شوف الموضوع زي البندول لو راح يمين يحتاج يرجع يوازن شمال.
• خذ وقتك أنك ترجع تتوازن، أنت وصلت القمة، تقبل أنك حتمر ببعض الهبوط في المشاعر وتشعر كأنك لم تحقق شيء.
• خلي مصدرك من الدوبامين في السعي أكثر من النتيجة. أبدأ في السعي مجدداً

أنواع الحصول على الدوبامين

• في نوعيين من الحصول على الدوبامين:
• 1- من الاستهلاك: الأكل، تتفرج شيء، تلعب لعبة، أفلام إباحية، سوشيال ميديا.
• 2- من الإنتاج: تصنع شيء جديد، تنجز مهام، تصنع محتوى، ترتب البيت وتنظفه، تطبخ وجبة، تسوي مشوار، تساعد أحد.
• ركز إنك تحصل عليه أكثر من الإنتاج مو الإستهلاك.
• الإعتماد في الحصول عليه من الاستهلاك يسمى الإدمان، أما الإعتماد في الحصول عليه من الإنتاج يسمى الشغف.

دوبامين ديتوكس Dopamine Detox

أيش هو؟

• ببساطة هو الإقلاع عن أي من أنواع الاستهلاك اللي تفرز نسبة عالية من الدوبامين.
• يسموه أيضاً صيام الدوبامين Dopamine fasting.
• الهدف منه هو إعادة ضبط الدماغ وعمل الدوبامين والنواقل العصبية (إعادة برمجة Reset).
• ويخليك بالتالي أكثر حساسية لمكافئات الدوبامين مستقبلاً.

ايش فوائده؟

ليش تسوي دوبامين ديتوكس؟

• الإحساس بالمتعة والرضا من أبسط الأشياء وبشكل مستمر
• زيادة الحافز والرغبة الداخلية
• تحسين التركيز
• تقليل التوتر والاكتاب
• تحسين جودة النوم
• تحسين الإبداع والإنتاجية

أعراض إنخفاض رصيد الدوبامين

علامات الحاجة لدوبامين ديتوكس.

• الشعور بالتعب وعدم وجود حافز
• الشعور بالحزن وفقدان الأمل
• مشاكل في التركيز
• إنخفاض الرغبة الجنسية
• تقلبات المزاج
• صعوبة اتخاذ القرارات
• مشاكل في الذاكرة

نصائح

كيف تسوي ديتوكس وتنجح فيه.

• في نوعين للديتوكس:
  1- تقلع عن جميع أنواع الإستهلاك اللي تفزز الدوبامين.
  2- تقلع عن بعض منها مثل: السوشيال ميديا، ألعاب الفيديو، السكر، الطعام الغير صحي، الأفلام الإباحية.
• مدة الديتوكس تختلف، كل ما كان أطول كل ما كان أفضل وتعتمد المدة على شدة إدمان الشخص على عادة معينة .
• 90 يوم هي المدة الأطول لأشد أنواع الإدمان مثل الإباحية.

الخطوات

• في البداية حدد أكثر نوع إستهلاك يعطيك مكافأة دوبامين.
• حط خطة كيف حتتفادى التعرض له لفترة معينة أو الإقلاع عنه تماماً.
• أوجد بديل صحي للعادة المضرة اللي بتحاول تقلع عنه. مثال بدل الألعاب، تتمرن، تقضي وقت مع الأصحاب والأهل، تقرأ كتاب.
• كن صبور وخذ الوقت والمحاولات الكافية للإقلاع عن أي عادة أو مصدر معتمد عليه.
• في أشياء تساعدنا في إعادة ضبط الدماغ منها الاهتمام بالأكل الصحي والتغذية والنوم المبكر والكافي، والشاور البارد.

في النهاية

• أعرف متى توقف وتحط حد، عشان بعدين تقدر تستمتع في الشيء اللي نفسك فيه أكثر.
• نفس الشيء لما تبذل مجهود كبير، ريح شوية واستمتع.
• لا تكون قاسي بزيادة وصارم مع نفسك في هذا الموضوع، أسمح لنفسك في أوقات وأعرف أنك حتسهو ومحا تكون مثالي دائماً.
• بس لما تضيع الطريق أرجع ثاني وكمل.

أشياء أتكلمت عنها

•  Dopamine Detox | Andrew Huberman
• علاقة الدوبامين بالشغف | دوباميكافين
• أحسن نوع ستيفيا وكيتو
• جلسة الاستشارة
• روابط حساباتي وموقعي

كتبت في: دوبامين Dopamine 🧪🧠 - كشميري.

في هذي الحلقة أتكلم عن الأكل الحي ببساطة أيش هو، ليش مهم، وأيش فوائده.

المصطلحات المختلفة:

بعض هذي المصطلحات ممكن تكون قد مرت عليك وهي كلها تتكلم على نفس النوع من الطعام.

• الأكل الحي Raw food
• الأكل الني
• رو فيجان – نباتي حي Raw vegan

أيش يعني أكل حي

هو الأكل اللي ما تعرض لدرجة حرارة عالية، فوق 45°C تقريباً، وهي درجة حرارة الشمس الطبيعية. تحت هذي الدرجة تبقى الإنزيمات حية داخل الطعام.

ليش هو مهم؟

• في حال كان الطعام لا يحتوى على أنزيمات حية، جسمنا حيعوض الإنزيمات من عنده بدل ما يحصل عليها من الأكل نفسه.
• وبالتالي حيحتاج لمجهود أعلى لهضم الطعام، وحيستنزف من أنزيمات الجسم على المدى الطويل.

الفوائد

هذي بعض الفوائد اللي الناس تختبرها في الأكل الحي واللي من تجربتي الشخصية أختبرتها.

• تطهير الجسم وعلاجه
  أغلب الناس اللي تحول أو تجرب هذا النظام عشان يطهروا أو يعالجوا أمراض في أجسادهم. مركز Hippocrates Wellness من المراكز اللي تعتمد على هذا النوع من الطعام لعلاج أخطر الأمراض.
• صحة أكبر، وإختفاء الأمراض
• موازنة للبرودة والحرارة في الجسم
• هضم أفضل
• طاقة أكبر
  لإنه جسمك أستهلك طاقة أقل في هضم الطعام.
• إختفاء انتفاخ البطن
• لا يوجد صداع
  الصداع هو تنبيه الجسم، بوجود مشاكل في الجهاز الهضمي، مثل الإمساك. عندما يكون الجهاز الهضمي في حالته المثالية يختفي الصداع!
• خسارة وزن جسمك الزائد

مقارنة بالحيوانات

اليوم نقدر نتأمل الحيوانات في الطبيعة كيف يعيشوا بدون أكل مطبوخ ونلاحظ التالي عليهم.

• ما يشيخوا
  ما تشوف حيوان في البرية أو الغابات والجبال يشيخ وتظهر عليه علامات مثل شيب الشعر وغيرها، بالعكس أغلب الحيوانات تعيش بصحتها الكاملة حتى نهاية عمرها.
• ما يمرضوا أمراض مزمنة ومستمرة.
• يأكلوا بغريزتهم.
• أكلهم ني وغير مطبوخ.
• يتحركوا طوال السنة.
• يسكنوا في البيئة والأجواء المناسبة لهم.

أيش تأكل

هذي بعض الأشياء اللي أكلها في يومي وتعتبر نباتية وحية بالكامل.

• عصير سموذي
  ويكون يحتوى على حليب نباتي أو فواكه، وأضيف له ورقيات أو مكملات عذائية طبيعية تحتوي على قيمة عالية.
• فواكه مختلفة
  تنوع الطعام مهم وأركز أكل الفواكه في موسمها.
• حبحب/بطيخ
  في موسمه يعتبر من الفواكه المفضلة لي واللي أحبها في بداية اليوم، يمشي بطني.
• المبرعمات Sprouts
  تعتبر من أعلى أنواع الغذاء الطبيعي قيمة وفائدة.
• مجفف الطعام Deyhydrator
  يساعد في صنع الكثير من الوجبات النباتية الحية.
• المكسرات والبذور
  مهم نقع البذور والمكسرات للاستفادة منها.

اليوم ممكن لو أنك ما راح تحول بالكامل لنظام الأكل الحي، جرب تدخل وجبات بسيطة في يومك تعتمد بشكل كامل على الأكل الحي وشوف كيف إحساس هذا الشيء مع الوقت على جسمك وصحتك. بعد سنوات من الاستمرار على هذا النظام صرت اليوم أحب إنه تكون بداية يومي دائماً بالاكل الحي السهل والمريح على جسمي، والجزء الأخير من اليوم ممكن يكون أكل مطبوخ صحي قدر الإمكان.

أشياء أتكلمت عنها

• مطبخي وصحتي
• هل التمر اللي ناكله حي؟
• دليل المتاجر العضوية في السعودية
• أماكن فيجان وصحية في جدة
• مدة نقع البذور والمكسرات
• صور الأكل الحي – كيرليان
• قناة Markus Rothkranz
• Hippocrates Wellness
• كتاب مطبخ بلا طبيخ
• روابط حساباتي وموقعي

كتبت في: الأكل الحي 🍎☀️ - كشميري.

في هذي الحلقة أتكلم عن الصيام وأنواعه المختلفة وليش الناس تصوم، وبشارك معاك من تجاربي مع الصيام والنصائح اللي عندي.

أنواع الصوم

في عدة أنواع لصيام برتبها حسب اللي أشوفه أسهل للأصعب.

1. صيام متقطع Intermittent fasting
   الفكرة أن تصوم 16 ساعة في اليوم وتأكل في خلال فترة 8 ساعات. وبالتالي تأخذ فائدة الصيام بشكل مستمر.
2. صيام على السموذي
   السموذي يحتوي على ألياف الفاكهة أو الخضار، ولكن أغلب الهضم قام به الخلاط ويتبقى جزء بسيط لجهازك الهضمي.
3. صيام على العصيرات
   العصير لا يحتوي على ألياف لان العصارة تقوم بازالته وتخرج لنا فقط العصير، وبالتالي تستفيد مباشرة من الفيتامينات والمعادن، وبدون أي مجهود لجهازك الهضمي ليقوم بهضم الطعام وهذا هو المقصود بصيام العصيرات (الديتوكس).
4. صيام على الماء
   المقصود به هو الصيام لفترة معينة فقط بشرب الماء. هذا النوع يحتاج منك فهم ومتابعة لصحتك والتأكد من أنك تستطيع القيام به.
5. صيام عن الطعام والشراب Breatharian
   وهو واحد من الأنواع الغير معروفة كثير لخطورته وصعوبة القيام به، وهو الصيام عن الطعام والشراب والحصول على الطاقة والغذاء مباشرة من المصدر. هذا النوع لا يجب عليك القيام به بدون إشراف ومتابعة وفهم كامل له. تقدر تبحث أكثر عن breatharian.

ليش تصوم؟

• راحة وتنظيف للجسم
  الصيام عن الطعام من أسرع الطرق لتنظيف وتطهير الجسم من السموم ومساعدته في العلاج. الجسم أغلب طاقته تروح في هضم الأكل! لما يرتاح الجسم وما يكون مشغول بعمليات الهضم، يبدأ يركز على تنظيف الجسم وتطهيره.
• إعادة ضبط وموازنة للهرمونات والمشاعر
  الصيام يساعد في موازنة الهرمونات وإعادة ضبط النواقل العصبية neurotransmitter بكفائة أعلى.
• حرق دهون
  في وقت الصيام يتحول الجسم لاستخدام الدهون المخزنة كمصدر لطاقة ويقوم بحرقها، وكثير من الناس يصوموا لتخلص من الدهون والوزن الزائد.
• طاقة وتركيز أكبر
• تطهير للمشاعر (الأكل العاطفي)
  العلاقة قوية بين المشاعر والهضم، أكثر شئ زي ما تكلمنا يشغل طاقة الجسم هو الأكل وعملية الهضم، و اول ما يتوقف دا الشئ في حاجة تحصل، الجسم يصير يحرر مشاعر كثير وتطلع لك في صور مختلفة سواء في احلام او الام جسدية وأفكار قوية، مهم في هذي الفترة أنه نحس بهذي المشاعر بشكل كامل وما نتجاهلها، لانها كانت مكبوتة وتحتاج تتحرر وتتركنا.

تغير الفصول

فترة تغيير الفصول مثل فصل الخريف والربيع، تعتبر مناسبة لتنظيف والتطهير سواء لجسمك أو المكان والبيئة من حولك. هي فترة طاقتها تنظيف وتجديد.

تجربتي

كتبت وشاركت في تدوينات مختلفة تجاربي مع الصيام بتفصيل وتعمق.

• تجربة صيام عن الأكل لمدة أسبوعين
  أشارك تجربة تغييرات نظام اكلي في 2017، أيش وصلني انه اكون vegan نباتي وبعدها raw vegan.
• رحلة الصيام على العصيرات
  تجربتي في صيام العصائر، أيش حسيت وايش أتعلمت منها، نصائح وأنواع عصيرات أسويها في الصيام.

نصائح لصوم

في أشياء مختلفة أنتبهت لها من تجاربي المختلفة مع الصيام، تقدر تنتبه لها عشان تستفيد من تجربتك في الصيام.

• حط هدف من الصيام
  حط هدف ونية من هذا الصيام، كمان ممكن تحط هدف يتعلق بتبني عادة صحية وإجابية جديدة.
• حدد المستوى المناسب لك
  ممكن يكون أسهل وأنسب لك تبدأ بالصيام المتقطع وتلغي وجبة الفطور من يومك أو ممكن تكون متحمس تبدأ مباشرة بالصيام على العصيرات شوف أيش يناسبك.
• خذ راحة من كل شيء
  ما أنصح احد يصوم وقت دوام أنت في هذي الفترة تحتاج راحة من كل شي من الضغوطات والتوتر، تحتاج ترتاح وتعطي جسمك فرصة ينولد من جديد.
• النوم المبكر
  نام في وقت مبكر ولا تأكل قبل 3 ساعات من وقت نومك.
• أستخدم عصارة تعمل بالعصر البطيئ
  تقنية العصر البطيء تخرج لك أكبر كمية من العصير وما تأثر على الإنزيمات اللي فيه، وتبطئ من أكسدته.
• أشرب عصيرك في وقته
  تحصل على أكبر فائدة لما تشربه في وقت عصره، لانه مع الوقت راح يتعرض للأكسدة.
• تجنب عصر الفواكه
  السبب اللي يخليني ما أعصر الفواكه، هو أنه السكر يصير مركز مع العصر والالياف غير موجودة فيه، اللي مهمتها توازن هضم السكر، بالتالي ممكن يصير له ضرر ويغذي الفطريات في الجسم بالسكر. تجنب عصير الفواكه بالذات لو كنت تبغى تعالج مرض.
• ساعد جسمك في التنظيف والتخلص من السموم
  أستخدم: Dry brushing – Neti pot – Enema
  في هذي الفترة الجسم يسوي كل شي يقدر عليه عشان ينظف الجسم، السموم دي لو أتجمعت في الجسم وما طلعت ممكن تسبب أشياء كثير الناس يعتبروها أعراض التنظيف Detox reactions
  زي: الصداع، حبوب البشرة، eczema، الإمساك، مزاج سيء، الكسل والخمول. كل دا يصير لانه الجسم ما بيتخلص من السموم وبترجع للدم، البشرة، وقنوات ثانية عشان يتخلص الجسم منها. مساعدتك لجسمك في مهمة التخلص من السموم بيقلل من هذي الأعراض.
• أكسر الصوم بأكل خفيف
  مهم في نهاية صيام إنه تكسر الصيام تدريجياً وبشكل خفيف، على فاكهة تحتوى على الكثير من الماء مثل البطيخ أو سموذي لإنه جهازك الهضمي له فترة في راحة. كل شيء خفيف وبكمية قليلة وبهدوء وتركيز وإمتنان.

أشياء أتكلمت عنها

• الانيما – الحقنة الشرجية
• How and Why to do an ENEMA
• الانيما – تنظيف القولون (مقالة)
• Heal yourself 101
• تجربة صيام عن الأكل لمدة أسبوعين
• رحلة الصيام على العصيرات
• Fat, Sick & Nearly Dead
• تجربتي عصارة السيف البطيئة
• قناة تلغرام
• روابط حساباتي وموقعي

كتبت في: الصيام والديتوكس 🍏🥬 - كشميري.

أول ما جيت أبغى إنيما كان في فترة صيامي والديتوكس، وكنت حايس فين ألاقيها عندنا في السعودية.

الصيدليات مع الأسف كل الأنواع اللي عندهم سيئة وما تعتبر انيما في الأساس!

فين أشتري الانيما؟

• المحلات الطبية – في جدة والطائف لقيتها في محلات الأدوات الطبية في شارع خالد بن الوليد(جدة) يبيعوها، لو تدور شوية في هذي المحلات تلاقيها. ونفس الشيء أتوقع في باقي المدن. بس النوع ما كان مرة ممتاز ومو إستخدام متعدد بس كم مرة تستخدمها. أنقذتني في وقتها. (صورة لها)
• متجر Sun Pharmacy – واحد من أفضل الأنواع وتجي في نوع قربة وهذا أفضل نوع ويعيش معاك. الانيما – الحقنة الشرجية لتنظيف القولون
• أمازون – في أمازون في نوع ممتاز كمان جربته، قربة. Cloud 9 Deluxe Enema
• متجر  99 فيتال – عندهم نفس النوع اللي لقيته في المحلات الطبية. Enema Bag

روابط مفيدة

لو منت فاهم الانيما كويس، أنصحك تشوف هذي الروابط:

• أماني دغريري | مقالة: الانيما (لم يعد متاح)
• How and Why to do an ENEMA – Markus

زر حُب16

كتبت في: من فين تشتري Enema - كشميري.

وأنا بدور طحت على عصارة السيف اليكتريك! عجبني سعرها قبل كل شيء وإنها بتقنية العصر البطيء.

فوائد العصارة البطيئة

ليش تشتري عصارة بطيئة؟

• تعصر على البطيء وما تقتل الأنزيمات الموجودة في العصير.
• ما تحتوي على أطراف حادة في العصر، التركيز على العصر بالضغط.
• بسبب هذا الشيء العصير كمان ما يتأكسد بسرعة.
• وكمان تعطيك كمية أكبر من العصير، مقارنة بالعصارات العادية.

تجربتي مع العصارة – Alsaif Elec

ما كان عندي توقعات كبيرة للعصارة، وكنت متحمس أجربها وأشوف. بدأت أستعمل العصارة تقريباً قبل شهر. واستخدمها تقريباً 4 أيام في الأسبوع.

أسوي في الصباح بيها عصير كرفس كبير! 16 اونص. مره مبسوط بالنتيجة، العصارة ممتازة وسوت لي المطلوب. عصير معصور على البطيء ومليان حياة

غسل العصارة

الشيء اللي ضايقني في العصارة، وكنت متوقعه. تنظيفها ثقيل شويتين بعد ما تخلص، تحتاج تفك أشياء كثير وتغسلها كويس. فلو كنت بعصر أكثر من مرة في اليوم حيكون مزعج شويتين.

حسبت الوقت تقريباً تحتاج من 5-7 دقائق عشان تغسلها، بس مع الأيام أتعودت عليها وصرت أغسلها أسرع وبسهولة أكبر، بس زي ما قلت لو أني ناوي أعصر كثير أكثر من مرة في اليوم حختار عصارة ثانية.

غسيلها كان بصعوبة أغلب العصارات العادية اللي قد جربتها قبل في حياتي، عشان أكون واضح.

تزحلق الألياف

لاحظت بعد ما أخلص من العصر أنه يبقى أسفل الكاسة ألياف قليلة. الظاهر الفلتر في التصفية ما يشتغل تمام. حليتها بأني حطيت مصفى صغيرة حقت شاهي، حطيتها على الكاسه عشان اصفي أي ألياف قاعدة تتزحلق من العصارة

في الصيام

واحد من الأيام كنت بصوم يوم كامل على عصيرات بس، فأخدت العصارة تحت التجربة. سويت عصيرات أغلبها كان ورقيات: بقدونس وكزبرة وجرجير. وكمان خيار وكرفس.

طلع العصير كويس وكل شيء، بس حسيت أدائها في الورقيات مو كويس مرة. العصارة مناسبة أكثر في عصر الفواكه والأشياء الأكبر، ممتازة للكرفس والتفاح مثلاً، وهذا مكتوب في الدليل حقها. غسلها كمان ثلاثة مرات في اليوم ما كان شيء ممتع

تقييمي

• السرعة 5/5
• الأداء 4/5 – لولا مشكلة الألياف كان أخذت 5 في هذا الجانب.
• الكمية 4/5 – الكمية من العصير ممتازة، بس متأكد العصارات البطيئة الإحترافية راح تنتج أفضل. في الغالب يكون في كميات بسيطة، عالقة جوا العصارة ما أتعصرت.
• التنظيف 3/5 – زي ما قلت تنظيفها صعب، وممكن يكون عيب مهم لو بتستخدمها كثير.
• السعر 5/5 – سعرها أسطوري خورافي وما عليه كلام.

التقييم العام: 4/5

الخلاصة

أشتري العصارة لو أنت مو ناوي تعصر كثير وتدفع حالياً على عصارة غالية. حتكون كويسة ومفيدة لك أنه تعرف قد أيش أنت جاد في موضوع مثلا شرب العصائر. أنا أشتريتها عشان أجرب نفسي وأشوف هل من جد بستمر على عصير الكرفس، ولو أستمريت وأتحمست مستقبلاً ممكن أجيب عصارة أحترافية أرهب، تساعدني أكثر ويصير ما أتردد أستثمر فيها.

مبسوط  وممتن مره إني جبت دي العصارة، وصار عندي عصارة بطيئة أخيراً، أعصر بيها عصيرات حية

فين تنباع؟ ومواصفتها؟

أول مره جيت ببحث عنها ما لقيت أي مصدر كاتب كم سرعة دوران المحرك فيها وهذا الشيء كان مهم عشان أتاكد إنها فعلاً بطيئة، الزبدة عشان ماتحوس زيي، بكتبلك كل مواصفاتها اللي على الكرتونة.

المواصفات والمميزات

Model: Alsaif Elec – 916181/S

• القوة 200W
• سرعة الدوران 65rpm
• 220/240 فولت
• 50/60 هرتز
• قطر مدخل العصارة 65mm 
• محرك نحاسي 100٪
• واجهة لوحة تحكم ضد الماء
• تقنية العصر البطيء
• ضمان سنتين (2)

أماكن تبيعها

• ماي مارت My Mart – متجر في الرياض ويشحنوا في السعودية
• Shatri Store – متجر في جدة ويشحنوا في السعودية

أشياء أتكلمت عنها

• Celery Juice Can Save Your Life – Medical Medium

كتبت في: تجربتي عصارة السيف البطيئة - كشميري.

التنبيهات Notification

من ثلاثة سنين تقريباً، قفلت كل التنبيهات زي واتس اب وتويتر والجوال دائماً يكون على Silent، لانه ما أحب كيف تقدر تتحكم فيا وتندايني في أي وقت تبغى، ومن وقتها حسيت براحة كبيرة وما عمري فكرت أغير دا الشئ، وقت ما أنا أبغى أقرر ادخل على هذي البرامج حدخل، بس هذا مو دائماً كافي، ما زلت أحس بإزعاج من أشياء ثانية، التأثير أعمق من كده.

مرض التشييك

في مرض عندنا إنه لما نكون فاضيين وما عندنا شئ، نطلع الجوال ونقعد نشيك واتس اب، انستجرام، وغيره… مدري كم مرة في حياتي الاقي نفسي في discover أنستجرام وأقعد أسال نفسي أيش جابني المكان الزبال دا! الموضوع مستفز لإنه تحس مو أنت المتحكم لا ارادياً بيصير دا الشئ، نزلت App مرة انه يحسب لك كم مرة في اليوم تفتح شاشة جوالك، العدد طلع شئ مجنون فوق +200 من اللي اتذكره. أستوعبت دا الشئ زيادة كل ما امسح البرامج دي إنه مازلت أفتح الجوال وادور على icon حقت app عشان أفتحه.

مع الوقت يتعالج دا المرض.

أيش اللي بنخسره؟

وقت الفراغ لازم يقدس، هوا الوقت اللي الأفكار تنط لك فيه وتجري عليك، حالياً الوقت دا أشبه بإنه معدوم نهرب فيه للجوال على طول، أحياناً احس اني سوبر مان لما أكون في أي مكان إنتظار أو تاكسي وأقرر ما أفتح الجوال. مين ما يحب الأفكار اللي تجيه وهوا يتروش! أفنن أفكار تجيك وقتها! لإنه ما في شي يشغلك لحظة صفاء! نفس الشئ لما اجي أسوي meditation مليون فكرة تنط في راسي وكلام كتير يصير جوا مخي مايخليني فعلاً أتامل، اللي حصل إنه فجأءة من وسط اليوم أعطيت مساحة للأشياء إنه تقدر تتكلم، لما كل دي الأشياء تتكلم وتخلص كل اللي عندها، وقتها فعلاً راح يصفى مخي! أتمنى إنه أجرب دا الشئ.

“أنا أؤمن إنه الأفكار شئ حي، وواعي تجيك ولو ما عبرتها وطلعتها للحياة، تسيبك وتروح لأحد تاني، لو مهتم أقرأ كتاب Big Magic”

أنا مثالي، أنا رهيب.

واحد من الكوارث اللي بتصير في السوشيال ميديا، وخلينا نتكلم عن إنستجرام بالتحديد، إنها “منصة المثالية” كل أحد بيحاول يكون مثالي، وينزل أرهب صور تمثله وقاعد يشكل شخصية لنفسه بكامل تفاصيلها، في صور ما ينفع ينشرها وكلام ما ينفع يقوله لإنه ما يتماشى مع شخصيته اللي صنعها وقاعد يتعب عليها. المشكلة مو إنه الناس بتطلع حسناتها وإيجابيتها، بالعكس محد يبغى ينشر سلبياته وعيوبه، بس خلينا نتفق على شئ مخك قاعد يلف التايم لاين طول اليوم ويشوف كمية perfection مو طبيعية! وما راح يقتنع إنه اللي بيشوفه هذا جزء بسيط من حياة الناس دول، بمعنى أنت قاعد في وقت فراغك، غالباً طفشان، وقاعد تشوف التايم لاين وناس بتنزل إنجازاتهم، رحلاتهم وسفراتهم، “عاداتهم الصحية الرهيبة” مخك اللي راح يفهمه إنه أنت ما بتسوي شئ في حياتك وهدول الناس مره رهيبين وقاعدين ينجزوا وحياتهم رهيبة، المقارنة هذي اللي تحصل تجيب الهم، بينما الواقع إنه حياتهم فيها طلعات ونزلات وبيمروا بأغلب اللي أنت بتمر فيه، وأمكن حياتك أحسن من حياتهم.

Relax وركز في رحلتك ووقتك مو كل أحد عنده نفس الطريق والرحلة.

ليا فترة أحاول أطل في اللي حولي، لما أكون معاهم ويشاركوا أشياء online، هل الموقف حقيقي اللي بيشاركوه، لما يحطوا بوست رهيب وسعيد؟ هل هما فعلاً حاسيين بدا الشئ أو لا؟ أحترم جداً جداً الناس الحقيقين والعفويين على السوشيال ميديا بس من اللي بشوفه عددهم قليل وما أظن إني أصنف نفسي منهم.

قاعد أقيم نفسي كمان، ليش أنا خارج الطلعة دي؟ وليش بسوي الشئ دا! هل أنا ابغى أشاركه أون لاين؟ هل أقدر أروح اسوي sky dive أو اروح مكان رهيب وما أصور ولا صورة وأقعد أنشرها لنص العالم، أبغى أسوي أشياء أنا حقيقي أبغى أسويها مو عشان تكمل شخصية كشميري اللي بصنعها.

مسحت كل شئ

من التشبع اللي أنا فيه والحماس، قمت أتفرج TED talks وفديوهات كتير عن social media وتأثيرها وتجارب ناس وقفوا، المهم أتشجعت وقررت وقتها، ومسحت Whatsapp مع إنه ما يصنف مره كشبكة إجتماعية، بس أنا من زمان أبغى أجرب امسحه وأشوف كيف الحياة بدونه، أرسلت لناس القريبين مني عشان يعرفوا، وبعده مسحت تويتر مع أني بطلت استخدمه بس أحياناً الاقي نفسي ادخله وألفلف في أشياء مالها قيمة زي الترند، وبعدين على Instagram وطلعت من حسابي فيه، وبعدين على سناب شات شلت أبوه، اللي أصلاً ما استخدمه ولا احبه كنت أخليه عشان أتابع أصحابي القريبين مرة، وأشوف نفسي لو أحد صورني .

فجأءة لقيت نفسي منعزل عن كل شئ الحل الوحيد إنه احد يوصلي إنه يكلمني على الجوال أو يرسلي إيميل، الشعور رهيب حرية! كنت أستناها من فترة بالذات واتس اب ما قد حسيت إنه اقدر اسيبه زي دحين، مو لازم أدخل أشيك لو أحد أرسلي شئ أو اشيل هم حاجة، مو لازم أستنى أحد يرد على كلامي، ومو لازم أستنى notifications و Likes عشان يجيني شوية dopamine.

أنا حَر

هل في شئ ندمت عليه؟

هذا السؤال دائماً نفسي أعرفه من الناس اللي يوقفوا، بالذات اللي ما يستخدموا Whatsapp، ليا تقريباً عشرة أيام من يوم ما مسحت واتس اب وحفضل فترة بدونه، ما حسيت إني خسرت حاجة اللي مهم ويبغاني حيتصل عليا، احس ممكن شوية أشياء تفوتني في البداية لإنه الناس متعودين يكلموني هناك، بس مع الوقت خلاص، أصحابي كمان أتعودوا من كثر ما اسوي حركاتي دي واشرد واقفل فترات. أحياناً كثير تفوتني أشياء بتصير في المجتمع، أوامر ملكية وقرارات، أو أحداث مو مهمة مرة، الأشياء المهمة بسمع عنها بعد فترة من أحد. لاحظت كمان إنه الناس دائماً يخمنوا إنه أنت حتعرف كل شئ عن حياتهم لإنك تتابعهم اون لاين.

* وصلتني مكالمة دولية من أبعد قارة، في أحد كان محتاجني وعرف يوصلي لما مالقاني على واتس اب! هل في أشياء مهمة بتفوتني حالياً؟ ممكن!

والنهاية

الموضوع مو تعذيب أو حرمان، قد ما إنه مساحة ليا إنه أتنفس تاني كل ما أحتاج ، وقت ما أحس إنه فترة راحتي خلصت حرجع أفعل الحسابات تاني بس غالباً مو زي أول، بمعنى أبغى أكون حقيقي أكتر وعندي تحكم، وأبغى أقلل الوقت اللي أتعرض فيه لدي الأشياء زي إنه يكون في ساعة في اليوم مسموح فيها أشيك على social media غير كده شكراً.

أحس Blog هوا جوي الأنسب والي دائماً ممكن أهرب ليه، عشان أكتب أشياء وأفضي شوية، فلتبارك الـ Blog.

الشبكات الإجتماعية عرفتني على ناس رهيبة رهيبة! وقريبين مني مرة، ممكن ما كان عرفتهم بدونها، لذلك أنا ممتن جداً لها ، ولكن السؤال هل بدونها الفرص والسحر  راح يتوقف يوصل لعندي؟ ما أظن، أثق إنه الكون لو يبغى يجيب شئ لحد عندك ما راح يفرق معاه أنت على السوشيال ميديا أو لا، حيتغير الطريق بس لكيف حيوصلك الشئ. “We never miss on anything”

“هذي الصفحة ما راح أشاركها على social media”

أشياء أبغاك تشوفها:

• الشبكات الإجتماعية والواقع (Video 3:12)
• #شوبقو شي. واحد. بوقت. واحد – حاتم النجار (33:38 Audio)

قصة الغلاف: صورة وقت الغروب، في يوم رايق وهادي في الشفا، مع أمي وأخواني في واحد من أيام رمضان، ولعنا الشمع واتأملنا وقتها.زر حُب70

كتبت في: كفاية Social media - كشميري.

أتكلمت في blog قبل عن الصيام وDetox، شيكها لو ما قرأتها لسه “أنولدت من جديد! تجربة صيام عن الأكل لمدة أسبوعين”.

الآن ابغى اتكلم بشكل أعمق عن التجربة، والأشياء اللي مشيت عليها، وأيش اتعلمت.

هدفي من الصيام

كل تجربة أصوم فيها يكون لها نية معينة، هذي المرة مو Detox أو تنظيف عام. بما إني قاعد أسوي Parasite cleanse وبأخذ الاعشاب، حبيت ادي الموضوع دفعة أقوى زيادة، في الصيام عن الأكل قوة الأعشاب تكون أقوى بالضعف بما انه ما في هضم بيحصل أو أكل ثاني يتعارض معها، هذا السبب الرئيسي.
قربت أخلص Parasite cleanse اللي مدته ثلاثة شهور وحكتب عنه وعن النتائج لما أخلصه.

ليش نصوم؟

فائدة الصيام سواء على الموية أو العصيرات إنه يعطي الجهاز الهضمي راحة، الجسم أغلب طاقته تروح في هضم الأكل! لما يرتاح الجسم وما يكون مشغول بعمليات الهضم، يبدأ يركز على تنظيف أعضاء الجسم وتطهيرها، في ناس كثير تصوم عشان تعالج أمراض مستعصية مالها حتى حلول، الجسم عنده كل السحر  والقوة إنه يعالج نفسه من أي شي لو أعطيناه الفرصة، ووقفنا الأشياء اللي تسبب المشاكل.

الصيام عن الاكل من الأشياء اللي ينصح بيها مره في تغير الفصول زي الخريف والشتاء.

قواعد الصيام

في Rules أساسية دائما اتبعها لما أصوم وعادات معينة أسويها في هذي الفترة:

• 
  

  ما أعصر فواكه 

  
  

  السبب اللي يخليني ما أعصر الفواكه، هو أنه السكر يصير مركز مع العصر والاياف مهي موجودة اللي توازن هضم السكر، بالتالي مضر، واكثر شي ما ابغاه وانا اسوي Parasite cleanse أنه أغذيهم بالسكر اللي يحبوه، تقدر تلاحظ كمية السكر وال rush اللي تجيك لو تشرب عصير برتقال كمية سكر مو طبيعية، الفاكهة الوحيدة اللي مسموح بيها هنا التفاح الأخضر. اللي استخدمه في العصيرات خضار وورقيات خضراء (سبانخ، جرجير، بقدونس، مورينقا) اللي فيها كل الطاقة والسحر.

  
  

  ملاحظة: في الخلاط عادي تحط فواكه لانه انت بتخلط كل شي، هيا مجرد الفاكهة نفسها بس صارت مهضومة.

  
  
• 
  

  أحط كرفس Celery في كل شي

  
  

  في ناس ماتحبه، بس شخصياً أحبه من أكثر الأشياء المفيدة والعلاجية، غني وعالي في الكتروليات “electrolytes”، بوتاسيوم، ماغنيسيوم.. ويعتبر مصدر ممتاز للموية وترطيب الجسم hydrating.

  
  
• 
  

  أسوي عصيراتي بنفسي وأشربها في وقتها

  
  

  أفضل شي تشرب العصير في لحظتها وهوا fresh ما يكون عدى عليه 20 دقيقة، السبب إنه فائدة العصير كلها موجودة لما يكون طازج fresh، اول ما نعصره تبدأ جدران الخلايا فيه تتكسر، بالتالي تبدأ تنقص قيمة vitamins و enzymes ويتعرض لـ oxidation الأكسدة.

  
  

  لو ما كنت تقدر تشرب العصير في وقته بسبب الدوام، وتحتاج تاخذ عصيرك معاك ويكون جاهز من قبل، مو مشكلة برضوا بس أنا بتكلم عن أفضل شي ممكن تسويه.

  
  

  * ما أنصح احد يصوم وقت دوام انت في هذي الفترة تحتاج راحة من كل شي من الضغوطات والتوتر، تحتاج ترتاح وتعطي جسمك فرصة ينولد من جديد.

  
  
• 
  

  أساعد الجسم في التنظيف والتخلص من السموم، Dry brushing، Enema، Neti pot

  
  

  في هذي الفترة الجسم يسوي كل شي يقدر عليه عشان ينظف الجسم، السموم دي لو أتجمعت في الجسم وما طلعت تسبب أشياء كثير الناس يعتبروها طبيعية في الصيام أو detox reaction، زي الصداع، حبوب البشرة، eczema، الغثيان. كل دا يصير لانه الجسم ما بيتخلص من السموم وبترجع للدم، البشرة، وقنوات ثانية عشان يتخلص الجسم منها.

  
  
• 
  

  أنام بدري 

  
  

  هذي النقطة مره مهمة وما أنتبهت لها في اول صيام ليا، الجسم من الساعة 10 إلى 2 الصباح، يطلق الهرمونات العلاجية “healing hormones” ولازم تكون نايم عشان يصير دا الشئ.

  
  
• 
  

  أرتاح Relax

  
  

  ما في شي يوترك ويقلقك أرتاح وروق، في وقت العلاج مهم الواحد يكون مسترخي إمكن اللي أكثر ضرر علينا من أكلنا وعادتنا الغير صحية هو صحتنا النفسية التوتر يهلك الجسم.

  
  

الفرق بين العصيرات و الـ Smoothies

العصيرات (Juicing): ببساطة هي عملية عصر الخضار والفواكه والورقيات والتخلص من الالياف fiber واللب pulp بالتالي جسمك ما يحتاج يهضم شي، العصيرات هي أفضل طريقة للعلاج والصيام وجسمك يستمر يحصل على الفيتامينات والتغذية اللي يحتاجها.

الخلط (Smoothie): هنا أنت بتخلط الفاكهة بشكل كامل وبتحصل على كل الالياف بس الفرق انه سائل وتقريباً مهضوم لك قبل، وحيحتاج مجهود أقل من جسمك عشان يهضمه.

أنواع عصيرات أسويها

هذي أفكار عشان تساعدك لو تبغى تصوم على عصيرات صحية، أنا اكد لك انه ما راح تعجبك في البداية وطبيعي دا الشي، خذ الموضوع حبة حبة، وسوي خلطتك، الانترنت مليان كمان بأفكار.

أهمية ال Enema

أتكلمت كيف أنه مهم إنه نساعد الجسم في التخلص من السموم، واحد من أهم الاشياء هوا Enema، اللي ما يعرف ايش الانيما بحط رابط تحت لمقالة تفصيلية تشرح فائدتها وكيف تستخدم لتنظيف القولون.
الانيما راح تساعدك تتخلص من أعراض كتير تصير بسبب الصيام أو الديتكوس:

• صداع
• المزاج الملخبط
• الامساك
• الكسل، والخمول

الاكل العاطفي Emotional eating

من تجارب الصيام، جسمي مر بحالات ديتوكس كثيرة ومازال مع Raw food diet (الأكل الحي)، الشئ العجيب هو كمية المشاعر اللي اتحررت مني وعشتها في الفترة الأخيرة سواء مشاعر جديدة أو اشياء قديمة مكبوتة صارت تطلع.

العلاقة قوية بين المشاعر والهضم، أكثر شئ زي ما قلت يشغل طاقة الجسم هو الأكل وعملية الهضم، و اول ما يتوقف دا الشئ في حاجة تحصل، الجسم يصير يحرر مشاعر كثير وتطلع لك في صور مختلفة سواء في احلام او الام جسدية وأفكار قوية، مهم في هذي الفترة أنه نحس بهذي المشاعر بشكل كامل وما نتجاهلها، لانها كانت مكبوتة وتحتاج تتحرر وتتركنا.

وأستوعبت بوضوح شديد كيف نخدر نفسنا ونكتم مشاعر كثير بالأكل، وتلاقي ناس تقول “لا تحرمني من الأكل الشئ الوحيد اللي يبسطني ويفك عني” هذا كله لانه فعلاً لما نعبي بطوننا أحنا بطريقة ما بنشغل الجسم من التركيز على المشاعر اللي مفروض تتعالج، ويصير ينشغل بعملية هضم الأكل.

الرحلة طويلة، في كلام كمان عن العلاقة بين الصيام والكارما Karma وكيف تساعد في تحريرها.

من كل اللي بتعلمه واستوعبه في الفترة الأخيرة عن الصحة، اكثر شي مذهل بالنسبة لي هو قوة الجسم في كيف انه يستحملنا ويدافع عننا طول هذي الفترة، رغم إنه أحياناً نغذيه بأشياء غير طبيعية وفضائية عليه، ومع ذلك الجسم بيتعامل مع الموضوع وكل يوم يقاوم. تخيل أيش بيصير لما توقف الأشياء اللي تضره؟

أشياء وروابط أتكلمت عنها:

• (How and Why to do an ENEMA (video
• One More Reason You Should Eat Fruit, Not Drink It
• ?When Does Fresh Juice Lose Its Freshness
• ?Why should we get to sleep before 10 pm
• كتاب Heal yourself 101.

قصة الغلاف: الصورة هذي صورتها في واحد من الأيام اللي كنت صايم فيها، وقاعد امشي وأستمد الطاقة من الشمس العظيمة.

كتبت في: رحلة الصيام على العصيرات - كشميري.

الديتوكس Detox

كل دا تقريباً بدأ لما أول مره قررت أسوي ديتوكس، الأسباب ما كانت عشان أنقص وزن أو اسوي دايت اللي يعرفني كويس يعرف انه Already أنا نحيف، وبالعكس أبغى ازيد وزن صحي. الهدف كان من اول تجربة انه أبغى ارفع طاقتي وتركيزي وأبغى أبدأ عادات جديدة صحية، كان النظام عبارة عن ثلاثة أيام، في النهار أشرب موية وفي الليل اشرب سوائل زي العصيرات، وفعلاً سويته وطاقتي كانت رهيبة وعالية هذا الشي احسه دائماً فيا، كل ما أكل اقل كل ما طاقتي أعلى.

طيب بعد الصيام كان النظام انه أدخل على أكل نباتي حبة حبة هنا بدأت اتحمس وأتحمس مره على فكرة انه احول Vegan لانه من اول الموضوع في راسي بس ما قد قررت، صرت اقرأ زيادة واتفرج فديوهات على اليوتيوب وأتحمست مره وقررت أجرب احول.
هنا السر معايا! كل مره أسوي نوع معين من الديتوكس أخرج منه بقرار أو عادة جديدة!
فائدة الصيام زي كذا او الديتوكس انه يعطي الجهاز الهضمي راحة، بالتالي الجسم يشتغل ويعالج جوانب ثانية ويعطي فرصة للخلايا والنواقل العصبية (neurotransmitters) انها تتوازن بشكل سريع بالتالي أسهل بكثير لمخك أنه يربط عادات جديدة في هذي الفترة ويترك عادات قديمة.

أيش بعد Vegan؟

الآن صرت نباتي وكملت على هذا الوضع فترة طويلة، بعد ستة شهور قررت اجرب اسوي تنظيف للقولون، نور عزوني حكاني عنه وعن تجربته معاه واتحمست، التنظيف هذا Colon cleanse يتطلب أسبوع كامل صيام على عصير التفاح مع خلطة الأعشاب اللي تاخذها معاه، كنت متحمس وجاهز اني اسويه وطلبته أون لاين. تنظيف القولون شي مهم ومفروض يتسوا في السنة مره، كوني نباتي جديد وابغى اتخلص من الرواسب، السموم والأشياء اللي ممكن تكون متعفنة جوا القولون من كل عادات الأكل السئ اللي كنت فيها عبر السنين، حمسني انه أسويه دحين.

بعد ما سويته حصل السر تاني معايا، وحسيت انه أبغى أصير Raw vegan.
الى الان ما اعرف ايش المصطلح العربي Raw vegan بس الزبدة أنه اكل Vegan بس بدون ما يكون مطبوخ، طبعاً نفس اللي صار معايا لما صرت فيغان، قعدت أبحث كثير واقرأ واتفرج فيديوهات، وأتحمست انه اعمل Switch اللي كان مرددني انه الفواكه والخضروات عندنا مو عضوية Organic لاكن في النهاية أستوعبت انه حتى لو مو عضوية ما راح تكون مشكلة كبيرة مره، لو موجود عضوي حناخذه لو مو موجود مو مشكلة. بعدين أبغى أصير أزرع أكلي بنفسي بس دا موضوع تاني. (في وقت تاني حتكلم ليش برضوا قررت ما أكل مطبوخ)
الغلط الكبير اللي سويته لما كنت فيغان كنت أكل كتير مطبوخ وقليل فواكه وخضار، اللي هوا فيها كل الحياة وكل شئ جسمي يحتاجه. الآن احاول ما أكون متعصب مرة Raw المهم انه اكون 80% Raw في اكلي  ولو مرة قررت اكل شي مطبوخ نباتي ما راح تكون نهاية العالم! بس في اشياء عليها اكس (X) كبير زي العيش والسكر الصناعي وأي شي صناعي ومتحول، كلها أشياء ما راح تفيد جسمي وحتضره.
في يوم تاني لازم حتكلم بالتفصيل عن تجربة التحويل لنباتي و Raw والاكل اللي تقدر تاكله وتنوع الأشياء كثير يحسبوا أنه كل اللي ناكله هوا خضار وفواكه ترا حتى Raw vegan يقدروا يسوا اكل كتير رهيب وغشاش مره!  في شي اسمه Dehydrator حتكلم عنها بعدين ممكن.

المرحلة الثانية Cleanse of a lifetime

بعد ماسويت تنظيف القولون في July  وأنبسطت بالأشياء الفضائية (mucoid plaque) اللي طلعت من جسمي، أتعمقت وقتها بزيادة في الصحة والجسم وانواع التنظيف cleansing وحسيت أنه الجسم يحتاج لسه شغل زيادة، وقتها كنت لسه دوبي طالع من صيام اكتر من اسبوع ومهلوك وخلاص فقررت اوقف غوص في داك العالم، وأكل Raw فترة وانبسط وبعدين أرجع اشوف ايش اسوي في الأشياء اللي اكتشفت أني أبغى أنظفها.

طيب الآن جاء الوقت أخر شهر سبتمبر كملت شهرين من أخر Cleanse وقررت انه أبدأ في المرحلة الثانية والاخيرة هذي السنة في التنظيف،
هذي المرة أصعب من أي شي فات.

كل الموضوع بدأ لما اكتشفت عن شي اسمه Parasites يسكنوا جوا جسمنا، ياكلوا من أكلنا، ويمرضونا. يسموهم Garbage men زبالين، ينظفوا جسمنا من الزبالة! ويتغذوا عليها. كل ما يكون أكلي سئ ومليان خرابيط وسكر غير طبيعي، يتكاثروا جوا الجسم وينبسطوا ويسببوا أمراض كثير مجهولة! I KNOW بس الفكرة اول ما عرفت عنهم قرفتني، كيف لو بتتفرجوا على صورهم.

الموضوع انه ما نقدر نهرب منهم موجودين في الهواء في الاسطح اللي نلمسها في الأكل، وزي ما قلنا لهم فايدة ياكلوا الزبالة حقتنا! بس لما يزيد الموضوع ويخرجوا عن السيطرة ويصيروا جوا الجسم اقوى من البكتيريا المفيدة هنا تبدأ المشاكل.
طيب الآن أكتشفت عن شخص اسمه Markus Rothkranz الادمي دا رهيب بكل ما تعنيه الكلمة، لازم بعدين أفصل في أيش هوا يسوي في الحياة، او روحوا ابحثوا عنه لو حسيتوا. المهم طلبت كتابه Heal yourself 101 وشوية من منتجاته حقت التنظيف، كلها عبارة عن اعشاب طبيعية في بودرة. المهم واحد من أقوى المنتجات عنده هوا Parasite Free.
في الكتاب عنده الخطة لكيف تحول وتعيد كل شي جوا جسمك وصحتك Reset، أو تعالج اي مرض حتى لو لا سمح الله سرطان! المهم سويت اللي في الكتاب منها صيام يومين على موية، وبعدين كملت 5 أيام على عصيرات، وبعدين على Blended drinks لمدة اسبوع. أسوء مرحلة كانت صيام العصيرات هلكتني.
الموضوع انه لما نكون في هذي المرحلة من التنظيف، الجسم يسوي كل شي عشان ينظف نفسه من السموم داخلياً ونفسياً وروحياً، فيكون في Reactions ومشاعر وحاجات غريبة كلها قاعدة تخرج منك!
خلال دي الفترة عزلت نفسي بشكل كبير، وكثير يعرفوا حتى بعدت عن Social Media، أحتجت أفصل وارتب الامور وارجع اشبك الاشياء في مخي.

الهدف من دي المرحلة:

• راحة للجهاز الهضمي عشان الجسم يركز في التنظيف وعلاج أي شي يحتاج علاج.
• Liver cleanse
• Kidney cleanse
• Parasite cleanse

الولادة الجديدة Am born again

بعد كل هذي المدة أسبوعين كاملة ما كنت أكل فيها شي، رررررجعت للاكل، كان شي رهيب لايوصف الـ gif اللي هنا ممكن انها المعبر الوحيد، أكلت موز  كاول شي اخترته مع اني في اخر اسبوع كنت بخلط الموز في العصير بس أبداً أبداً ما كان بيوصلني نفس الطعم لما أكلته!
أنا ما أعرف هوا انا نسيت الطعم ولا Taste buds أتغيرت عندي! بس حرفياً الطعم لا يقاوم كان والطعم له كذا مستوى، بعدها جربت الافوكادو MY FAVORITE food of all time وكانت Creamy lvl 1000 والرمان نفس الشي مره كان طعمه حلو! كل شي كنت أجربه كاني طفل يجرب أكل للمرة الأولى! شي رهيب رهيب!!

السر دي المرة بما أنه كل ديتوكس اطلع منه بشي جديد، دي المره طلعت بعادة أني ادخل Green smoothies كشي اساسي كل يوم كالوجبة الاولى في الصباح عشان تكون مهضومة وجسمي يأخذ كل الفايدة اللي فيها بشكل أسرع وادخل Greens الورقيات اللي هوا الشي المفيد، اللي حالياً مهو شي أساسي في أكلنا، الفواكه رهيبة واسطورية بس السٌر في Green leafy stuff. لسه بحاول اسوي التغييرات المفيدة في دا الموضوع.
I need more kale seriously!

أيش دحين؟ What’s next

حالياً انا بكمل اني اخذ Parasite free واستمر عليه لمدة 3 شهور يس طويل لانه ياخذ ثلاثة مراحل عشان تقضي عليهم بالكامل وعلى البيوض حقتهم اللي يتركوها لما يموتوا، حقدر اكل طبيعي طوال هذي الفترة الشي الوحيد انه الفواكه السكرية مره ما ينصحوا فيها خلال هذي الفترة، عشان لا تغذيهم خلال دي الفترة وتقويهم، بالصيام انا جوعتهم ودحين برمي عليهم الأعشاب المدمرة . ما يحبوا الثوم البصل، الاشياء المرٌة، Spices الاشياء الحارة كمان كلها تساعد انه تقضي عليهم. الأكل المطبوخ يقتل parasites اللي فيه بس في نفس الوقت يغذيهم! لو أحد بيسوي cleanse parasite أبعد عن المطبوخ فترة.
دحين ما اقدر اتكلم عن أيش حاس من موضوع ال Parasites وأيش النتائج بعد 3 شهور أحتاج أسوي Update post، وافصل في موضوعها وأيش صار معايا.

الآن انا مره مبسوط اني بأكل تاني، حكتشف زيادة في الاكل حبدأ اتفنن حبة حبة، وزني نقص كثير طبعاً دحين وشي طبيعي، حرجع ازيد واخذ وزن صحي، كل مره اسوي ديتوكس كذا يصير الجسم ما يتخلص الا من أشياء ما نحتاجها.

* كل شي بكتبه هنا، بشارك فيه تجربتي وأوثقها، في تفاصيل كثير لسه أحتاج أغطيها حبة حبة. ما بحاول أقنع احد في شي، عادات اكلي كانت سيئة لأبعد الحدود قبل سنتين، مستحيل كنت اصدق انه ممكن اسوي نص اللي بسويه اليوم من قرارات الاكل، كل الموضوع اني الآن جاهز اني امر بدي التجربة واحس اني ابغى اسويها دحين، لما نشارك تجاربناً اكيد في ناس حتكون معانا في نفس الخط وناس تانية لا. اللي متحمس لاي شي من الاشياء اللي بتكلم فيها وبسويها حكون دائماً موجود لو يحتاج أساعده في شي او يبغى يعرف شي زيادة من تجربتي.

حب وحياة 

أشياء وروابط أتكلمت عنها:

• تنظيف القولون اللي سويته – The Colon Cleansing Kit.
• قناة Markus Rothkranz – يتكلم عن الصحة والحياة، ملهم كبير لي.
• Parasite free – المنتج اللي استخدمه لل Parasite Cleanse.
• كتاب Heal yourself 101 –  مجاني ولو شبك معاك انصحك تشتريه ورقي يفضل عندك.

قصة الغلاف: الصورة هذي تمثل ركن الصحة، اللي سويته في غرفتي بكل حماس قبل لا أبدأ الصيام الثاني عشان يحمسني ويلهمني.زر حُب69

كتبت في: تجربة صيام عن الأكل لمدة أسبوعين - كشميري.