تجارب، حكاوي، وشوية شطحات.

هل التمر الي ناكله حي؟

من يوم ما بدأت رحلتي مع Raw Vegan وصرت مهتم بالأكل الحي وأنا أبغى أعرف هل التمر الي عندنا في السعودية حي؟ بالذات السكري والأنواع المجففة والتمر المضغوط، كل الموضوع أني شاك في موضوع كيف صناعة التمر بتصير وهل بتفرق من مكان لمكان أو لا، حاولت أدور في اليوتيوب والإنترنت أشوف كيف بتصير عملية التجفيف، وأسال موردي التمور عن إذا كانت تتعرض لحرارة عالية في عملية التجفيف أو لا، بس ما كنت بلاقي جواب واضح يأكد لي.

الي مو فاهم أيش قصدي بحي، فهو الأكل الي ما تعرض لدرجة حرارة فوق 45°C وهي درجة حرارة الشمس الطبيعية إلي الأكل ما يموت فيها وتبقى الإنزيمات حية، فلو كانوا في عملية التجفيف بيعرضوا التمر لأي درجة حرارة أعلى من هذي حيكون ميت وحيخسر طاقة الحياة الي فيه، وجسمنا حيعوض الإنزيمات من عنده بدل ما يحصل عليها من الأكل نفسه.

“خذها قاعدة: ما وضعتها في الأرض وأنبت هو حيًا. ما لم ينبت بالضرورة ميت!”

― دار منار


التجربة

قررت إنه أخذ الموضوع بيدي وأجرب تجربة نفسي أسويها، وأكتشف منها هل التمر الي قاعد أكله، حي أو لا، أكثر شيء أبغى أعرفه هو التمر السكري الضميد، لإني مني مصدق إنه حي أبداً، من كثر ماهو مضغوط ومتغير، وأبغى أجرب وأتأكد بنفسي.

قررت أحوش نواة التمر الي قاعد أكله بدل ما ارميهم في الزبالة! حاخذهم وأسوي تجربة، اخترت نوعين من التمر، تمر سكري ضميد من القصيم، وتمر صقعي من المدينة عضوي.

حنبتهم وحزرعهم لو طلعوا، فالشيء الي أنا بأكله فيه طاقة الحياة.

خطوات إنبات وزراعة نواة التمر

ححكيكم بالخطوات كيف تزرع بذور التمر وكيف كانت تجربتي:

  1. نقع النواة

    أول خطوة ننقع النواة لمدة أسبوع في موية دافية، مع تغيير الموية مرة في اليوم.

  2. التجهيز للإنبات

    بعد أسبوع من نقع النواة، نحطها في منديل قوي من كم طبقة، وننقع المنديل بشوية موية ونغطي النواة بالمنديل ونحطهم في علبة، يفضل تغطي العلبة بقماش عشان ماتدخل أشعة الشمس للبذور، نبغى نحسسها إنها جوا التربة! أتركها في مكان دافي ومعتدل، أنا حطيتها جمب الشباك في المطبخ.

    شيك عليها كل كم يوم، ولو حصل تعفن في المنديل أو حول النواة غسلهم وغير المنديل، يفضل تغسلهم مره كل أسبوع وتغير المنديل.

  3. مرحلة الإنبات

    يسسس! بدأت تنبت!

    بعد أسبوع حتبدأ تشوف بوادر الإنبات من النواة، ممكن يأخذ أسبوع أو أكثر، لا تستعجل. 

  4. الزراعة في التربة

    تقدر بعد كم أسبوع من ظهور الجذور، تزرعها في حوض تربة، خليها في البداية في مكان رطب جوا البيت مثلاً وحافظ على رطوبة التربة، وأول ما تبدأ تطلع أوراق طلعها لشمس.


أيش صار معايا

تجربتي كانت إني أنبت 6 حبات من النواة، ثلاثة من كل نوع، إلي صار ثلاثة من حبات السكري نبتت بدون أي مشاكل واثنين من النوع الثاني الصقعي نبتت بدون مشاكل برضوا، بس وحدة منهم الي ما نبتت، ما اعرف ايش ممكن يكون السبب ممكن شيء غلط حصل يخليها ما تنبت أو انها ميته من قبل.

زرعت إثنين أول ما بدأت تطلع لهم جذور كويسة، وتركت البقية ينبتوا لفترة أطول أشوف أيش يصير لهم. 

جنون الجذور! هذي المجموعة الي تركتها لفترة أطول وبدأت حتى تطلع أوراقها.


الزراعة

زرعت بقية الحبات في أحواض وأماكن عشوائية عندي في الحديقة، وبدأت أتابعهم.

أول 2 زرعتهم أخذوا وقت الى ما طلعوا من التربة، نسيتهم من كثر ما طولوا، والي زرعتهم متأخر طلعوا بسرعة بحكم إنهم كانوا جاهزين وكونوا جذور طويلة.

هلا والله 😍 دليل الحياة ☀🌱


الخلاصة

هل التمر الي عندنا في السعودية حي؟ غالباً أيوا، ما اقدر أقول 100% هوا حي لانه ممكن النواة تكون محفوظة داخل التمر وما تعرضت للحرارة نفسها، لكن الأكيد إنها ما بتتعرض لحرارة عالية جداً لاني لو حطيت التمر في الفرن وبعدين زرعت النواة ما راح يطلع شيء في الأرض.

لو أحد عنده خلفية أكثر عن مصانع التمور في السعودية وأجهزة التجفيف الي تستعمل، ياريت يتواصل معايا أبغى أعرف زيادة وأضيف معلومات عنها هنا، ودرجات الحرارة الفعلية الي تستخدم.

التجربة غيرت نظرتي بالكامل، أول شيء قبل التجربة كنت مقتنع انه التمر السكري الضميد غالباً مو RAW، والآن تجربة إنباته كانت ناجحة 100% وأكثر من التمر الثاني، في نفس الوقت ما صرت أشوف نواة التمر زي أول إنه بزر ونرميه في الزبالة! صرت أشوفه إنه شيء حي وجوته طاقة وفرصة للحياة، رغم اني لسه ارميه في الغالب، أحب لما أقدر ارميه في التراب حتى لو ماراح انقعه أحس هوا الشيء الصح.

النخلة النونو قاعدة تكبر، أيوا صار أسمها النخلة خلاص 🌴 بعد ما كانت نواة!

 
أشياء أتكلمت عنها:

في بالك كلام؟

  1. 31 أغسطس، 2018

    تحمس التجربة مرة! أحس ما كان عندي شك إنها حتنبت، يالله شكلها لطيف مرة.. أصلاً حلو الحرص على نوع أكلنا و حتى البيئة إللي انزرع فيها و الطاقة إللي كان معرض لها لأنها في النهاية لمن نستهلكها بتصير جزء مننا..

    1
  2. 31 أغسطس، 2018

    مرة يحمس!
    منجد ماعمري فكرت إنها شي فيه حياة، شكلها مرة حلو لمن طلعت من التراب و بان الورق لونه الأخضر يجيب السعادة 😍

    2
  3. 31 أغسطس، 2018

    كنت اخذ من مزرعة جدي كمية تربة عشان ازرع في البيت و فجأة صار في الحوض الواحد تطلع لي 10 و لما اشيلها تطلع ثاني صرت ازين فيها هدايا لصحباتي و اشياء كثير و لسه تطلع بس جدي قال انو ماتطلع لك نخلة منهم 🙁 انا عندي نخلة في المزرعة و طلعت بلح و تمر و بنسوي التمر في البيت بكل مراحلوا حتى دبس التمر يطلع لذيذ و التمرة مليانة كذا تاكلها و انت مبسوط معرف اشرح الشعور xD بس الحياة مع النخلة عجيبة جداً و جميلة إن شاء الله تجربها و مبسوطة بهذا التحديث ربي يسعدك نرسلك تمر نخلتي إن شاء الله في المستقبل 😍🙏

    1
    1. 1 سبتمبر، 2018

      يبسط حماسك! ما في زي لما تاكل من محصود زرعك اكييد.
      ناوي اهتم فيها وانقلها في الأرض اول ما تبدأ تكبر واشوف ايش يصير فيها لو بتقدر تكبر أو لا.

      2
  4. 1 سبتمبر، 2018

    شو هالجمال ما شاء الله
    ما عمري خطر لي ولا شفت تنبيت نواة التمر
    على كدا حنسوي جنات في البلد من النخيل

    1
  5. 4 سبتمبر، 2018

    جميلة التجربة جداً وكنت متحمسة اعرف النتيجة وعلى وجل انه ممكن ماتنبت وتطلع ميتة بس الحمدلله ❤️🙏🏻

    1

حرسلك الأشياء الجديدة قبل أي أحد