ليش أنام على الأرض؟

قبل سنة تقريباً من التاريخ اللي بكتب فيه، بدأت رسمياً أنام على الأرض وتركت السرير.
بدأت القصة من لما شفت فيديو على اليوتيوب لشخص يتكلم عن النوم على الأرض وفوائده وكيف أنه من طبيعتنا أنه ننام على الأرض، من وقتها صرت أجرب أنام على الأرض كل فترة وأشوف هل هوا شي ممكن وهل له فوائد أو لا.

ولد الطبيعة

الشئ دا معد صار غريب عليا، إنه كل فترة أجرب أشياء جديدة أو اتخلى عن أشياء معينة صرنا نسويها مع إنها مو من طبيعتنا، أيوا! الشعور دا إنه نرجع للحظة اللي نزلنا فيها على الأرض وكنا طبيعين نمشي ونأكل من قدامنا نسكن في الغابات والجزر، حياتنا البسيطة، اللي صارت غريبة علينا!

كل شي نسويه اليوم صار هوا “الطبيعي” هل من جد طبيعي! اللي بنسويه.

على أي حال أنا الشخص اللي يبغى يرجع انه يكون ولد الطبيعة.

المنطق

أحب وأقتنع كثير بقد أيش الشئ منطقي بالنسبة لي ولطبيعة، المنطق من أنه ليش مفروض ما ننام على السرير هو أنه لما تنام على السرير، اللي بيصير أنه هيكلك العظمي اللي وظيفته يشيل جسمك ما يدّخل والي يحصل انه كل الحمل يصير على عضلات الجسم ويصير وظيفتها تشيل جسمك.

بينما المفروض وقت النوم انه عضلات جسمنا ترتاح والهيكل العضمي هو اللي يشيل الجسم، بالتالي نصحى ونصبح مرتاحين بدون تشنجات وبطاقة أكبر.

هذا الشئ صقع في مخي وأقنعني، أنه السرير والطراحة مهي من طبيعتنا.
بنسوي أشياء كثيرة حالياً تضر بهيكل جسمنا، ومهي من طبيعتنا زي الجلوس الكثير وطريقة نومنا وغيره! يحمس لما نبدأ حبة حبة نسوي أشياء لمصلحتنا.

I want a super flexible body

التجربة

بدأت بأني أجرب يوم انام على الأرض، الى ما وصلت أنه أجرب أسابيع، وصلت لمرحلة أنه افكر اتخلى عن السرير حقي، وقتها كان القرار يخوف شوية انه أتخلى عن السرير تماماً، كنت أنام اكثر على الارض بينما السرير موجود، الى ما في 2016 نقلنا بيت جديد وقررت أنه أتخلى عن السرير وبالتالي حتى أقدر استغل مساحة الغرفة عندي، وفعلاً سويت دا الشئ.

من الأشياء المثيرة للاهتمام، وقت ما كنت لسه بجرب، زرت المتحف المصري وشدني مره كيف سرير الفراعنة الملوك كان عبارة عن خشبة صلبة وما كان فيه طراحة زي دحين.

اليوم وبعد + سنة بدون سرير، مقتنع تماماً بهذا الشئ وما عندي اي إهتمام أنه يكون عندي سرير.

حلو مره شعور البساطة دا! حالياً اي مكان اروحه سهل أنام فيه، في أوقات أنام على سرير زي السفر في الفنادق.
هذي التجربة، سهلت عليا وفتحت أبواب أنه اتخلى عن عادات كثيرة وأكون “طبيعي” أكثر.

كأني كل مره أوصل لمرحلة جديدة، وكل مره أتخلى عن شئ أكبر.

الفوائد

أشياء كويسة لاحظتها:

• أحتاج ساعات نوم أقل.

  طبعاً يعتمد على عوامل ثانية قد ايش انا مسترخي وهل بنام بدري او لا.

• سهل أني أقوم بسرعة في الصباح.

  مو دائماً طبعاً 😂، خلينا نتفق أنه لو ما تبغى تقوم بدري أو عاداتك لسه مو صحية ماراح تقوم بدري، لاكن لو تبغى تقوم بسهولة وبسرعة وحاط النية ما في شي أحسن من النومة على الأرض حيساعدك في دا الشئ.

• إنتصاب العامود الفقري.

  بدون ما أنتبه الآن عامودي الفقري وأكتافي منتصبة بشكل أفضل، طبعاً هذا الشي ممكن تكون عوامل ثانية تساعد فيه زي اليوغا.

• مساحة أكبر في الغرفة بدون السرير.

  دا إمكن أرهب شي كل يوم أجهز سريري بنفسي وكل يوم أشيله بنفسي، هذا الشئ أعطاني مساحة اكبر في الغرفة انه تكون اوسع واشرح.

• إسترخاء عضلات الجسم

مكونات السرير

ببساطة هذي الاشياء اللي استخدمها عشان أسوي سريري كل يوم:

1. Yoga mat
2. طبقة خفيفة (لحاف، طراحة خفيفة)
3. شرشف
4. لحاف نوم
5. مخدة x2

بفكر مستقبلاً أرتب واطور السرير، أقرب شي ممكن اسوي له هو زي السرير الياباني يكون عندي شوية اشياء جاهزة ومرتبة.

الهدف أنه يكون مكان نومي يساعد ظهري انه يكون منتصب وشايلني، وبنفس الوقت مايكون قاسي لدرجة انه مو مريح.

التجربة دي مو سهلة في بدايتها، راح تحس الموضوع صعب لاتنسى انه جسمنا والهيكل حقنا متأثر من السنين الكثيرة اللي تعبناه فيها، لاكن لو كنت من الناس اللي يحبوا يجربوا أشياء جديدة، جرب وشوف بنفسك الفرق وهل يستاهل الموضوع او لا.

• الفيديو اللي أتكلمت عنه – The Spine and Sleeping properly! The Truth about Beds!