تجربتي

قائمة بالأشياء الإيجابية اللي لاحظتها من تجربتي لما أستمر على عادة الإستحمام بالموية الباردة.

• أتنشط بسرعة بسبب الموية الباردة.
• سرعة في التنفس.
• الجيوب الأنفية تنفتح وتتنظف بسرعة.
• أسهل علي أسوي أشياء صعبة وفيها تحدي، استحملت موية باردة في الصباح! أيش اللي بيوقفني بعدها؟
• أسهل أبني عادات جديدة وأستمر عليها أو أوقف عادات سيئة.
• يصير عندي صفاء وتركيز أكبر.

فوائده العلمية

• يحفز جهاز المناعة.
• يحسن الدورة الدموية.
• يرفع حرارة الجسم ويوازنه.
• يحسن من تشافي العضلات.
• يحسن ويسرع من عملية الأيض (metabolism).
• ممتاز للبشرة والشعر.
• يرفع ويحسن من مستوى مشاعرك.

كيف تبدأ

أول شيء دائماً لما تجي تأخذ شاور، حاول تبدأ مباشرة بالموية الباردة وبدون تردد، خذها دفعة واحدة. حيبني عندك قوة إرادة أنك ما تتردد تبدأ شيء حتى لو إنه صعب. أثره مرة قوي.
بعدها ممكن تبدل لدش دافئ، وتختم بالبارد. التبديل بينهم له فوائده كمان.
لو مره الموضوع صعب عليك ممكن في البداية تبدأ بموية دافية وتنزل للموية الباردة تدريجياً.

كل مرة غالباً حتجي تبغى تأخذ دش بارد حتتردد وحتشيل هم. الهدف إنه رغم صعوبة الشيء “أنت حتسويه” هذا اللي يخليك أقوى لما تواجه “منطقة الراحة” comfort zone ويخليك تسوي الشيء اللي تبغى تسويه رغم الخوف والتردد.

اليوم حتى لو كنت في البحر أو قدام شلال أو تحت المطر أحب إني أنط فيه رغم البرودة. وطريقتي المفضلة غالباً إني أهجم على الموية بدون تراجع أو إستسلام، كذا أحس بالفائدة أكثر شيء.
لو الموية درجة برودتها مره عالية! زي مثلا في بعض النوادي الصحية يوفروا مغطس بارد، هنا غالباً أخذ الموضوع تدريجي لإنه ممكن يكون خطر تغيير الحرارة الكبير والمفاجئ.

رجل الجليد

أنصحك تتابع Wim Hof وتجرب تمرينه لتنفس. الادمي هذا يسموه “رجل الجليد” وهو من أهم الناس اللي أثبت وبحث في قوة البرودة العالية في رفع وتحسين مناعة الجسم، وغيرها من الفوائد. ويم هوف يتكلم دائماً إنه احنا بس نسينا كيف نتنفس صح وننسجم مع البرد.

طيب شتاء!؟

لو بتفكر إنه جنون الواحد يسوي هذا الشيء في الشتاء، بالعكس دحين أحسن وقت، وقت ما تحصل موية باردة حقيقية. في الصيف صعب تحصل موية باردة. ويم هوف يتكلم كيف هذي العادة وتعودنا على التواجد في البيئة الباردة والتنفس الصحيح حيخلينا نستحمل البرد ويعود الجسم يوازن ويتكيف مع البرد ويحارب الأمراض. زي أغلب الكائنات على الكوكب.

روابط مفيدة

• تمرين التنفس من Wim Hof
• فيديو قصير عن Wim Hof
• حلقة بودكاست حلوة: Wim Hof & Russell Brand

في تويتر بشارك أكثر عن تجاربي وتفاصيل للأشياء اللي أسويها، لو مهتم تابعني على تويتر.

كتبت في: ليش أتروش بموية باردة؟ - كشميري.

الهاجس إنه أسوي مدونة وموقع كان عندي ومن أنا عمري 15 تقريباً، بس كنت دائماً متردد.
أقول “مين بيقرأ كلام واحد ما حقق شيء في حياته؟” كمان “اوه لازم تعرف أيش المجال اللي تبغى تكتب فيه وتكون واضح”. كل مرة أحط سبب.
صراحة ما أعرف أيش بناء الأفكار دي عندي. بس متأكد إنها عوامل مختلفة.

يلا!

جاء يوم حسيت خلاص كفاية وإنه لازم أبدأ ولو بشيء بسيط. ومو لازم أحصر نفسي باهتمامات معينة، حكتب في كل شيء يهمني ومع الوقت ممكن يصير في جو واضح للمدونة.
في 2017 بدأت البلوق حقتي وبدأت أكتب لأول مرة وأشارك تجاربي والأشياء اللي تهمني.

المنصة

بدأت وسويت مدونتي على ووردبريس بما إني أحبه كمنصة وعندي خبرة في برمجته والتعديل عليه، وأبغى حريتي الكاملة في تعديله زي ما أحب.
بدأته بأبسط شيء وبدون فلسفة كثير وقررت أحسنه مع الوقت.

التصميم

أستخدمت قالب (Theme) جاهز وقتها، وهذا اللي يميز ووردبريس مداك تلاقي قوالب كثيرة جاهزة وتختار اللي يناسبك وتعدل عليه.
مع الوقت أنا طورت ثيم حقي من الصفر عشان يكون عندي حرية أكبر في التعديل عليه والتطوير.

اللوقو

أستخدمت موقع fiverr.com عشان أطلب خدمة من رسام يسوي لي لوقو يمثل شخصيتي ويعطي الموقع جو شخصي أكثر يعبر عني. برضوا موجود موقع خمسات (عربي).
كلهم اللي يميزهم إنه بتلاقي ناس تعرض خدمات بأسعار ممتازة تبدأ من 5$
كلفني اللوقو 135 ريال تقريباً.

بدأت أشارك

بعدها بدأت أشارك تجاربي اللي كنت أمر فيها في هذاك الوقت وتجارب أقدم ما قد وثقتها
منها:

• تجربة صيام عن الأكل لمدة أسبوعين
• ليش أنام على الأرض؟
• كيف سافرت المالديف لحالي؟

نويت إنه أكتب بعفوية وبطريقتي. وبدأت أشاركها في إنستغرام وتويتر وجاني تفاعل حلو عليها، حمسني أكثر.

أيش أختار منصة؟

لو نويت تبدأ ومتلخبط في المنصة اللي تستخدمها عشان تبدأ مدونتك فيها. أنا في الغالب أنصح بخيارين.

منصات تدوين:

1. ووردبريس WordPress
2. كرميلا Caramella

أنصحك بـ (ووردبريس) لو تبغى شيء ممكن توسعه في المستقبل وتعدل عليه.
(كرميلا) لو تبغى شيء سهل ونظيف ومرتب.

كلهم خيارات مجانية ووردبريس ممكن يصير مدفوع لو تبغى تحطه على سيرفر شخصي وتطوره. كتبت مقالة قبل شرحت فيها الفرق بين أنواع ووردبريس.

إضافات أستخدمها

ووردبريس زي ما فيه قوالب فيه كمان آلاف الإضافات (plugins) تساعدك تضيف مميزات زيادة لموقعك.

إضافات:

• Comments Like Dislike – تضيف خيار Like لتعليقات.
• Favorites – تضيف زر تفضيل للمقالات.
• reSmush.it Image Optimizer – تصغر مساحة الصور وتسوي لها compress.
• Send email only on Reply to My Comment – ترسل تنبيه لشخص لو جاء رد على تعليقه.
• Super Emoji Plus+ – تساعدك تضيف emoji في الكتابة.
• Visual Link Preview – تستعرض الروابط بشكل حلو، طبقتها في مقالة زي: برامج بودكاست أحبها.
• WP Fastest Cache – إضافة Caching توفر موارد على السيرفر وتسرع من موقعك.
• Yoast SEO – إضافة SEO المفضلة لي، تساعدك تهيئ موقعك مع محركات البحث.
• BackUpWordPress – تأخد نسخ إحتياطية لموقعك بشكل مستمر.
• Kash Related Posts – هذي إضافة أنا طورتها لإستخدامي تشوفها تحت كل مقالة عنوانها: “شوف كمان” وبفكر في يوم أنضفها زيادة وأنشرها.

إستضافة الموقع

بالنسبة لي أنا استضيف موقعي على سيرفر شخصي.
في البداية لو تبغى بس تجرب تبدأ فما تحتاج تفكر في سيرفر وغيره، ممكن تجرب الخدمة المجانية من ووردبريس ويكون موقعك على السيرفر حقهم. عيبها إنه بيكون فيها إعلانات ومحدودة شوية.

لو قررت تتوسع وتستضيف موقعك مع شركة. أنصحك بهذي الشركتين كلهم فاهمين في ووردبريس وأسعارهم ممتازة.

استضافات لووردبريس:

1. SiteGround
2. Bluehost

لو أشتركت معاهم تقدر تنقل كل المحتوى حقك لهم. لإنه ووردبريس نظام سهل تنقله وتحطه على أي سيرفر تبغاه. زي مثلاً نظام ويندوز تقدر تثبته على أي كمبيوتر، نفس الفكرة مع نظام إدارة المحتوى (ووردبريس).

إحصائيات موقعي

خليني أشارك معاك شوية أرقام وإحصائيات من موقعي حتى تاريخ نشر المقالة.
صراحة الى اليوم ما أدخل وأتعمق في أرقام المدونة كثير وحطيت هذا الشيء في بالي إنه ما راح أطل في الأرقام كثير في البداية وأخليها معيار. بس دحين بعد ما شفت الأرقام بتعمق حاس لازم أحسن زيادة من مشاركتي وتسويقي للمحتوى. أحس في مجال إنه يوصل لناس أكثر حتستفيد منه.

أرقام

• عدد المقالات: 47.
• شخص زار الموقع: 70 ألف تقريباً (unique).
• زيارات لصفحات: 100 ألف تقريباً (pageviews).
• من محركات البحث: 20 ألف.

الأكثر قراءة

1. كيف سافرت المالديف لحالي؟
2. رحلة الصيام على العصيرات
3. ليش أنام على الأرض؟
4. هل التمر الي ناكله حي؟
5. من فين أشتري أكلي العضوي

من أي دول الناس تقرأ؟

1. السعودية
2. مصر
3. الإمارات
4. أمريكا
5. الكويت

أنا أؤمن إنه كل شخص عنده شيء يقدمه ويشاركه من تجاربه في الحياة. أهم شيء شارك بطريقتك وأسلوبك (أنت) في ناس دائماً حتكون بدور على اللي بتقدمه. ولا تتردد تشارك المحتوى اللي تصنعه. ولا كيف بيعرفوا الناس عنه؟

اليوم صرت أفعل حساب تويتر حقي أكثر، وبشارك فيه تجاربي وتفاصيل للأشياء اللي أسويها، لو مهتم تابعني هناك.

كتبت في: كيف سويت البلوق حقتي؟ - كشميري.

الإيكيغاي IKIGAI 生き甲斐 فلسفة يابانية تجاوب على سؤال “أيش الشيء اللي تعيش عشانه؟” أو “أيش يخليك تصحى الصباح كل يوم؟”

يركز على هذي الجوانب:

1. أيش تحب تسوي؟ (هواياتك)
2. أيش تعرف تسوي؟ (مهاراتك وقوتك)
3. أيش يحتاج العالم؟
4. أيش ممكن تسوي ويجيب لك فلوس؟

كيف تطبقه في حياتك؟

عشان تبدأ تطبقه على طول، ممكن تسوي جدول لكل قسم من هذي الأربعة أقسام وتبدأ تجاوب وتحط نقاط تحت كل عامود. حيساعدك تفهم نفسك وتعرف فين قوتك والمهارات اللي يحتاجها منك العالم…

ملخصي لأهم نقاط الكتاب

• مو لازم تؤمن بالتقاعد لو كنت تسوي شيء تحبه.
• المفتاح لطول العمر: نظام أكل صحي، ممارسة الرياضة، معرفة غايتك وسببك، والروابط الإجتماعية.
• “املأ بطنك حتى 80٪ فقط”.
• السعادة تلاقيها في السعي والفعل نفسه، مو في النتيجة.

• خليك في حالة من الاندماج flow.
  .Be in a state of flow
• ابدأ ولا تتلكع، أول ما تبدأ بخطوات صغيرة، حتبدأ تندمج وتدخل في حالة flow من الاندماج.
  Get started don’t dwell, as soon as you start with small steps, you will get in a flow.
• العادات اليومية تساعدك تدخل في حالة الاندماج.
• التركيز على شيء واحد راح يساعدك تندمج وتدخل في حالة flow.
• أكثر الناس سعادة هم الأشخاص اللي يقضوا أغلب الوقت في حالة من الاندماج والتدفق. مو اللي يحققوا أكثر.
• إبتسامك لناس هو من أهم مفاتيح السعادة.
• سلم على الناس اللي تقابلهم في الشارع حتى لو ما تعرفهم.

أشياء عجبتني

• فيديو من ورشة يعلمك كيف تستخدم Ikigai
  How To Find And Do Work That You Love (Ikigai)

كتبت في: أيش هو الإيكيغاي IKIGAI؟ - كشميري.

يعني لو اليوم عندك الآن جمعة فهو في الصين جمعة وفي أمريكا جمعة وفي موزمبيق جمعة ما في فرق؟ ممكن بالنسبة لك ما يكون عجيب بس بالنسبالي مره شايفه عجيب، لإنه لو نجي نطل مثلا على التقاويم… واو دوبي استوعب جمع تقويم.

التقاويم

في العالم في تقاويم كثيرة، بعضها سمعت عنها بعضها ما سمعت عنها، وبعضها أختفت من التاريخ. خليني أعدد شوية منهم، ولاحظ كيف إنه كل تقويم في سنة وعالم تاني.

• التقويم الميلادي: سنة 2020
• التقويم الهجري: سنة 1441
• التقويم الإثيوبي: سنة 2012
• التقويم الصيني: سنة 4718

* أرقام السنوات وقت نشر البلوق.

أيام الأسبوع

أتوقع وصلت النقطة العالم بيمشي على تواريخ مختلفة، ولو إنه السنين الأخيرة متوحدين بسبب العولمة على التاريخ الميلادي. فتلاقي ناس تاريخهم شمسي وناس قمري وناس شمسي وقمري في نفس الوقت. وإيمانات مختلفة في هذا الموضوع.

العجيب إنه رغم اختلاف اللغات، الثقافات، الإيمانيات… العالم سبحان الله متفق على أيام الأسبوع، كلهم اتفقوا إنه أيام الأسبوع سبعة! وكمان بنفس الترتيب.

يعني محد جاء شطح وقال أحنا بنخلي أيام الأسبوع 4 ولا 8 ولا أي رقم. لا يا حبيبي كلنا بنصير سبعة. متى أجتمعوا وأتفقوا عليها؟

ممكن تتوقع وتبحث إنه اوه أكيد في سبب له علاقة بالفلك ودوران الأرض ولا شيء. بس الحقيقية إنه محد بيلاقي شيء أو رابط. وسواء كان التقويم فيه 12 شهر ولا 13 شهر، كان شمسي ولا قمري، كلنا حنمشي على سبعة

أول ما جاء التساؤل في بالي بدأت أطرحه وحسيت محد مهتم إنه عادي أيش يعني كلنا متفقين على سبعة. بعدين قلت خليني أبحث أشوف لو أحد جاله نفس التساؤل، وطحت على مقالة للكاتب فهد الأحمدي: كيف تسبع العالم. حسيت أشبعت فضولي لما لقيت أحد بيفكر في نفس اللي بفكر فيه وكتب عن أفكاره وإنه من جد في شيء يستحق التساؤل.

مسميات أيام الأسبوع

عجيبة مسميات الأيام، لو ما قد ركزت فيها حتلاقي معاني مستخبية لكل واحد.

بالعربي

• السبت – من كلمة شبت العبرية معناها: الراحة. كأنها جية من السبات، يوم للراحة.
• الأيام مرتبة كأرقام: 1 الأحد | 2 الإثنين | 3 الثلاثاء | 4 الأربعاء | 5 الخميس.
• الجمعة – ببساطة يوم الجمعة واللمة.

في الحضارات الأجنبية

• Saturday – يوم السبت في اليونانية يرمز لكوكب زحل Saturn.
• Sunday – يوم الأحد ويرمز للشمس.
• Monday – يوم الإثنين ويرمز للقمر.
• Thursday – يوم الخميس، يرمز لثور Thor أسطورة الفايكنج.

في بابل

في كلام كتير إنه تسبيع الأسبوع بسبعة أيام أول مره جاء وبدأ في بابل (العراق حالياً) وهوا من ورث حضارتهم السومرية. البابليون كان عندهم علم بالفلك والتنجيم ومراقبة الكواكب، ومو صدفة اللي طلعوا بيه.

قسموا الأيام بـ 7 كواكب:

• السبت: زحل
• الأحد: الشمس
• الإثنين: القمر
• الثلاثاء: المريخ
• الأربعاء: عطارد
• الخميس: المشتري
• الجمعة: الزهرة

لا تنسى إنه الرقم (7) رقم مهم وله رمزية في معظم الأديان والحضارات.

ما أتوقع موضوع الأيام نتيجة الصدفة أو ما له معنى، ممكن مستقبلاً نفهم أكثر. الآن التساؤل أشبعني.

مراجع

• مقالة: معاني أسماء أيام الأسبوع – دوت مصر
• أسماء أيام الأسبوع – ويكيبيديا
• The Secret Language Of Weekdays

كتبت في: كيف العالم متفق على أيام الأسبوع؟ - كشميري.

سألت ناس من أعمار ودول مختلفة، أولاد وبنات. وطلعنا بهذي اللستة
من الأجوبة اللي جاتني جمعتها، ترجمت بعضها، ورتبتها في قائمة. حطيت فيها أفكاري وأفكارهم الرهيبة، شكراً ألف لكل أحد ساهم

كيف تدلع وتبسط نفسك؟

1. “أتروش ترويشة ترد الروح مع روائح عطرة”
2. “ألبس اكثر ملابس حلوه وتبين كشخه حتى لو ما كانت مريحة، بس يكون شكلي أنيق.”
3. “أتروش وأنسدح تحت الشمس”
4. “أخرج أتمشى وأستكشف مكان في الطبيعة”
5. “ألعب كورة/رياضة مع أصحابي”
6. “أروح البحر وأغوص (snorkel)”
7. “أتفرج على النجوم”
8. “أرقص مع نفسي”
9. “أكل وجبة من مطعم أحبه أو أطبخها”
10. “أقعد أرسم”
11. “اسوي لي مشروب أحبه”
12. “ما أحرم نفسي من شيء مشتهيته”
13. “أسوي لي باث”
14. “ابخر المكان وأسترخي”
15. “اكافئ نفسي بكلام إيجابي، اتكلم مع نفسي بحب ولطافة”
16. “أفضي يوم أسوي ماسك لوجهي وشعري ومساج”
17. “أحط شموع”
18. “أغني وأعزف موسيقى”
19. “أكل junk food نفسي فيه”
20. “أشتري حاجه نفسي فيها”
21. “أحبس نفسي في الغرفة”
22. “اشرب قهوة لزيزة”
23. “أسوي مشروع بيديني شي يتصلح أو يتركب”
24. “أسوي كولاج”
25. “اصنع شي جديد مع نفسي أو أطفالي”
26. “أسوي مساج”
27. “أطلع في سفرة قريبة”
28. “اتمغط”
29. “البس بجامه مريحة وأحبها”
30. “اكافئ نفسي بشيء ثمين كان نفسي فيه”
31. “اعطي نفسي بريك من كل شيء حتى المهام والواجبات”
32. “اطلع اتمشى لحالي بدون اي احد معاي”
33. “اشتري هدايا لنفسي من الإنترنت”
34. “اسوي لي جو خاص، ارتب غرفتي اخذ شاور اشوف مسلسلي واسوي لي اكل احبه”
35. “أشغل playlist قائمة بالأغاني اللي أحبها”
36. “أسوي ستريتش يوغا”
37. “أقعد مع صاحباتي ونتفلسف عن الكون”
38. “أروح مزرعة بعيدة عن المدينة مع أصحابي، بدون لابتوبي او اغراضي واقضي الليل هناك اشرب قهوة والعب بلايستشين واشم هواء نظيف.”
39. “أقضي وقت لحالي: أقرأ كتاب، أتامل، أسمع موسيقى.”
40. “أقابل شخص أنبسط بالقعدة معاه”
41. “أسبح”
42. “أروح لسينما لحالي”
43. “أركب قطع Puzzle”
44. “فنجان قهوة مع دفتر وقلم لوحدي بمقهى لطيف”
45. “أشتري جوارب (شرابيب) جديدة”
46. “اسوي فقرة عنايه وجمال وأشغل شموع واسترخي”
47. “أعيد فيلم أعرف أنه دائماً يبسطني”
48. “أكل شوكلاتة”
49. “أروح أسلم على الناس. تجيني بهجة”
50. “أروح أسوي مغامرة، شيء جديد عليا”
51. “ألعب video games”
52. “أحجز رحلة لمكان ما قد رحت له”
53. “اتعلم أو أقرأ عن أي شيء جديد عليا”
54. “اسمح لنفسي اخبص بكل شيء، وأضيع وقت وما اسوي شي مفيد”
55. “ألبس ملابس جديدة وذهب و makeup”
56. “أعزم الأصحاب لمشاركة الأكل، والتأمل، والمشي”
57. “أخذ بطانية وأنسدح وسط الأشجار أتامل”
58. “أزرع وأهتم بنباتاتي”
59. “أطبع ورقة Mandala أو رسمة وألونها كأني طفل”

في أشياء اتكررت عليا بشكل واضح! من أغلب اللي سألتهم، لو بلخصها في جملة حتكون: “أحب أسوي جو ومكان ليا، وأتفرج فيلم أو مسلسل وأنا بأكل شيء أحبه. بعدين ممكن أقعد أسمع للأغاني اللي أحبها.”

أنا وصاحبي سجلنا حلقة في البودكاست عن حب الذات Self-love أتوقع حتهمك لو عجبتك دي البلوق.

كتبت في: أفكار عشان تدلع نفسك - كشميري.

من فين بدأ الموضوع؟

قبل كم سنة سمعت حلقة من بودكاست فنجان مع يوسف الدويس، الحلقة كانت رهيبة مره وأنصح أي أحد يسمعها. بس بجي لنقطة معينة كان فيها محمد يتكلم عن انه سوا تجربة يدون كل يوم ايش يصير في يومه، وبعد سنة صار يلاحظ إنه في نمط، وأحداث الأيام بتتكرر في حياتيه في نفس الأوقات من السنة!

مثلاً يكون متضايق وعنده مشكله مع شخص، يرجع لسنة اللي فاتت ويلاحظ انه في نفس هذا اليوم كان بيواجه مشكلة تشبهها. أو مثلاً يجيه رزق مفاجئ ويلاحظ إنه السنة اللي راحت صار نفس الشيء! كان يوصفها إنه هذي من الاشياء أو الأنماط اللي هوا يشوفها تصير له وإنها نوع من فهم ذاته، ومو شرط تكون عند كل أحد.
القصة كانت مبهرة ليا مره، وحطيت نية إنه أبغى أجرب التدوين اليومي، الفكرة مستهويتني من فترة.

بدأت

بعدها بفترة قابلت عبدالرحمن العمران وكان يحكيني عن التدوين اليومي وإنه بيسويه له فترة ويكلمني عن فوائده، حمسني زيادة وزيادة إنه أبدأ، بعدها بفترة قصيرة قررت إنه خلاص جاء الوقت أبدأ بس بقي أختار برنامج يناسبني لتدوين ويكون سهل ومريح ليا، عشان أتحمس أكمل.

فعلاً بدأت، الموضوع بسيط كل يوم في أخره ارجع اتذكر، ايش صار في اليوم، وأهم الـ highlights وأكتبها. بعض الأيام مثلاً كنت أنسى أكتب ولو صحيت وأتذكرت أقوم أكتب اللي أتذكره من اليوم اللي فات. من اللي لاحظته ما في زي لما تكتب ليلتها، اليوم اللي بعده تنسى أحداث كثيرة والمشاعر ما تكون بنفس القوة.

أيش حسيت؟

في أيام تكون الكتابة فيها مره ثقيلة وأكتب سطرين وأقفل الموضوع، وأيام استرسل واكتب بالهبل، يكون مثلاً يوم مليان أحداث ومشاعر. بس الهدف الأساسي كان اني أكتب كل يوم وما أوقف لأي سبب وأخذتها كعادة. كل السنة وأنا متحمس “يالله يالله” متى أخلص سنة من الكتابة عشان أبدأ أقرأ الايام اللي راحت من السنة اللي فاتت وأقارن.

نتائج التجربة:

اشياء استفدت منها وحسيتها بعد سنة من التدوين اليومي.

• إمتنان أكثر – استذكاري لليوم وكتابته في ملخص كان يخليني أمتن زيادة واستوعب انا ايش بسوي في يومي، واحس بتقدير لأشياء كثيرة.
• التكرار – بعد سنة بدأت أقرأ الايام الي فاتت وأقارن. مثلاً يوم 6 فبراير السنة اللي فاتت أيش كتبت، وبدأت الاحظ أحداث فعلاً بتتكرر، 1- مثلاً يوم من الأيام صاحبي جاني وقعدنا سوا وهو في مدينة ثانية في الأساس، بعد سنة اتكرر نفس الشيء!! وجاني صاحبي يزورني رغم إنه مرات قليلة في السنة يزور مدينتي. 2- أو مثلاً السنة اللي فاتت كنت بسلم مشروع كبير، الاحظ انه نفس الشيء ينعاد ثاني في نفس هذي الفترة، وبدرجة تشابه كبيرة في نوع الشغل. 3- أو مشاعر متلخبطة تتكرر ثاني في نفس الفترات. 4- برضوا مره كنت بنقع أعشاب بحرية، نفس الشيء أنعاد السنة اللي بعدها! أنا حرفياً في النادر أنقع أعشاب مرات قليلة في السنة، فإنه يتكرر ثاني في نفس اليوم شيء عجيب مره!
• مو دائماً الأحداث تتكرر. بس لاحظت إنه فعلاً في نمط معين يتكرر في الغالب. لسه متحمس أشوف أكثر الموضوع هذا في المستقبل.
• الزمن – الزمن وما أدراك ما الزمن، أمكن هذا أحلى شيء. بدأت أستوعب قد أيش الزمن يزحلق “Slippery” أيام تحسه يمشي بسرعة وأيام بشويش، أقرأ مثلاً يوم من السنة اللي فاتت وانفجع أقول معقول، معقول!! بس سنة عدت على هذا اليوم! الشعور كانه ثلاثة سنين. وأوقات ثانية العكس. الوقت يتلاشى.
• الإنجاز – أنا أكتب كثير عن شغلي وأيش شغال عليه كل يوم في الملخص. بعد سنة صرت أستوعب أنا أيش كنت شغال عليه وقد ايش قطعت شوط طويل. الشعور حلو حلو مره! ولو جاتني فترة كنت حاس إني مقصر أو مو منجز كفاية، أقوم أقرأ أيام من السنة اللي فاتت، واتحمس ثاني واستوعب أنا أيش سويت وفين كنت، وفين الآن وصلت. وبالتالي أخف على نفسي شوية.
• الاستذكار – أقدر أرجع لأيام معينة كنت مثلاً أواجه فيها صعوبات واستذكر أيش صار وكيف انحلت المشكلة اللي كانت عندي، أو مثلاً أستوعب كيف إنها كانت تافهة وما تستاهل القلق اللي حطيته عليها. ولو مثلاً كنت ابغى اتأكد من مشاعري في يوم معين أو موقف معين، أقدر أرجع لكتابات هذاك اليوم.
• الكتابة – أظن أظن التعبير عندي مره أتحسن في الكتابة، لإني صرت أكتب بطريقة شفافة أكثر لنفسي وهذا الشيء صار يساعدني أكتب كلام وأشاركه حتى أون لاين وأعبر فيه بشكل واضح وشفاف أكثر. أحس إنه ساعد بس مو متأكد لأي درجة.
• تفاصيل – في أشياء وأحداث لها معنى في حياتنا. ممكن تصير وننسى شوية من تفاصيلها، حلو انه يكون عندنا آرشيف يذكرنا بهذي اللحظات.
• عوالم – لاحظت كيف دماغ البشر يغير الحقائق، مثلاً يوم معين نتذكر إنه صار بشكل معين لما أرجع له بعد سنة، ألاحظ إنه بخيالنا غيرنا شوية تفاصيل فيه! ممكن يكون تنقل بين عوالم موازية! . سجلت حلقة عن العوالم الموازية.

أبغى أسوي زيك

لو ناوي تجرب تكتب يومياً وتوثق أيامك، بعطيك كم نصيحة من تجربتي ممكن تفيدك.

1. أختار بين التوثيق الإلكتروني أو الورقي. عني أنا أخترت الالكتروني لانه أبغى أشيائي تكون محفوظة وأقدر أبحث فيها وأرجع لها بسهولة وأستفيد من مميزات التطبيقات الكثيرة. متأكد كمان الكتابة على الورق لها فوائدها الرهيبة.
2. أختار التطبيق اللي يناسبك. ما في تطبيق واحد كويس، كل أحد يحتاج تطبيق مختلف يناسب احتياجاته أعرف أيش تبغى وابحث وجرب. مثلاً هل يهمك إنه التطبيق يذكرك كل يوم تكتب؟ هل يهمك إنه يكون موجود على الويب، أو تطبيق على جوالك؟
3. أنوي إنه هذا شيء أنت حتلتزم فيه لفترة معينة وبعد هذي الفترة تقدر تقرر لو تبغى تكمله أو لا.
4. أكتب لنفسك، لك أنت! لا تلمع الكلام وتثقله وأكتب الأشياء على حقيقتها.
5. أكتب أحداث يومك حتى أبسطها، مين قابلت؟ ايش صار؟ ايش حسيت؟ ايش سويت؟ فين رحت؟ وكده ركز على التفاصيل اللي تهمك.
6. خذ الموضوع ببساطة ولو يوم مرة ما لك نفس أكتب بس شيء بسيط، كلمة كلمتين تلخص اليوم. أنت بتكتب لنفسك في النهاية.
7. لو عندك خوف إنه تكتب عشان خصوصيتك فأنا أفهم مره شعورك. بالذات لو في طفولتك كان عندك دفتر Dairy وكنت بتتجنن عشان تحميه “هيلو أخواتي”. أغلب تطبيقات الكتابة توفر خاصية خصوصية، بكلمة سر تقفل التطبيق. وكمان ممكن خيار تلغي المزامنة على الإنترنت. وصراحة أنا حالياً أكتب وفي بالي إنه لو بنسبة 1٪ أحد طاح على هذا الشيء فطز! لازم يكون عندك هذا الشيء وتستوعب إنه ما يفرق وأيش يعني. ولا تكتب أشياء خاصة مره لو أنت قلقان كثير.

تطبيقات ممتازة

التطبيقات اللي بقترحها هنا، هيا من بحث بسيط ليا واللي أعرفه، أبحث زيادة ودور أمكن تلاقي شيء يناسبك أكثر.

• Journey – تطبيقي المفضل واللي بستخدمه من أول يوم. يعجبني لإنه متخصص تحديداً في التدوين اليومي، فيه مميزات كثير تعجبني: يرسل لي تذكير يومي في الوقت اللي اختاره عشان أتذكر أكتب (ساعدني أرسخ العادة). أقدر أختار حالة مشاعري وقت الكتابة. يسجل العنوان والمدينة اللي كتبت فيها. يسجل طقس اليوم. ويوريك رسم بياني لمشاعرك في الفترة الأخيرة. فيه خاصية البحث والـ Tags. يدعم الكتابة من اليمين لليسار. وفيه أشياء أكثر بس هذي اللي تهمني فيه.
• Evernote – حكاني عنه عبدالرحمن العمران أول مره. البرنامج متخصص للملاحظات بس اللي فهمته عبدالرحمن يناسبه مره ويستخدمه بطريق كويسة لتدوين اليومي ويغطي كل إحتياجاته.

مبسوط بالتجربة ونتائجها عليا، وأتوقع حستمر على العادة، صارت راسخة فيني كشيء كل يوم أسويه. متحمس لو فضل اللي كتبته واستمريت، بعد سنين السنين حتكون كنز حقيقي ليا.

سجلت حلقة بودكاست عن الموضوع لو مهتم تسمعها: كتابة اليوميات – Journaling

روابط ممكن تهمك

• بودكاست فنجان: الانعزال 365 يومًا مع 365 كتاب
• بلوق كتبها عبدالرحمن العمران: نظامي في ادارة الوقت ورفع الانتاجية

كتبت في: سنة من كتابة اليوميات - كشميري.

أبغى أحكيك عن الحماس وتأثيره في حياتي، وكيف أستخدمه عشان أوصل لشيء اللي أحب أسويه ومقدر لي.

الحماس أيش هوا؟

الحماس هو البوصلة اللي تقولك من فين الطريق. لما يجيك الحماس لشيء، لا تحاول تفهم كثير ليش الشيء دا محمسك دحين! حاول تركز على إتباع حماسك، حماسك حيدلك على أشياء ثانية تحمسك وطول ما أنت ماشي في هذا الطريق حق “إتباع حماسك” حتطل ورا وحتبدأ تربط الخطوط وتستوعب ليش هذي الأشياء كانت تحمسك وتستوعب كيف هيا مربوطة برغباتك وأهدافك في النهاية.

لا يمكنك توصيل النقاط بالنظر للأمام، فقط بالنظر للوراء يمكنك إتمام تلك المهمة، ولذلك عليك أن تؤمن بأن تلك النقاط ستصبح متصلة يوما ما في المستقبل
― ستيف جوبز

خليني أحكيك عني شخصياً كيف بشوف الحماس مربوط في حياتي، المثال اللي بحكيك هوا دحين هوا اللي حمسني أكتب هذي البلوق. أنا ليا فترة حاس بتقصير في أني أتكلم عن شغلي ومشاريعي وأيش بسوي والتسويق لها. فاليوم بحكيكم عن واحد من مشاريعي، موقع البودكاست العربي.

هرجة البودكاست العربي

في أواخر 2012 كنت على أبواب التخرج من الثانوي وكنت بطور نفسي كثير في صناعة المواقع على الإنترنت، وبحاول الاقي نفسي في المجال. وقتها كنت أحب أسمع بودكاست مرة، وبرامج البودكاست العربية كانت قليلة وصعب تلاقيها، فكرت أنه ليش ما أسوي دليل يوثقها ويسهل أنك تلاقيها وتشوفها حسب التصنيفات، الفكرة بسيطة وكنت مره متحمس أني أشتغل عليها وأسويها، ويكون في شيء يمثل شغلي ومهارتي في تطوير المواقع وتصميمها.

أتحمست مره للفكرة وما فكرت كثير ولا ركزت في كيف هذي الفكرة ممكن ترجع لي بدخل مادي أو تكون مشروع تجاري، بالعكس كنت شايف إنها صعب تكون مشروع يرجع بدخل مادي في أي وقت قريب، ومستبعد الخيار تقريباً. كل اللي فاكره إني كنت متحمس وأبغى أسوي المشروع دا وعندي القدرة والوقت له.

أشتغلت عليه سويته، جهزته، وأطلقته

كان بسيط وبكم بودكاست في هذاك الوقت، ما يتجاوزوا 50 بودكاست. كل فترة شغلي عليه كانت حماسية وأتعلمت منها كثير.

شاركت عنه في تويتر وقتها، وبدأ الموقع ينتشر على خفيف، وينعرف كأهم دليل لبرامج البودكاست العربية ويرشح دائماً لناس الجدد للبودكاست. يبسط

هذا الشيء كان كفاية بالنسبة لي، لكل المجهود. زي ما قلت لكم ما كان عندي توقعات كثيرة له، وكنت أبغى أسوي شيء يساعد الناس يستخدموه ويستفيدوا منه، وفي نفس الوقت يمثلني ويمثل شغلي.

الى هنا القصة عادية وكذا تقريباً أنا في الغالب أشوفها.

الآن مرت تقريباً 7 سنوات من يوم إطلاقة كل فترة أطل لورى وأشبك الخطوط وأستوعب.
اليوم لما أحد يسألني عن البودكاست العربي وإذا يدخل لي فلوس، أرد وأقول: “لا المشروع غير ربحي”، ومو محمسني أوسعه لفكرة تجارية حتى الآن.

بعدين أوقف شوية وأحكي كيف المشروع دا أثر في حياتي اليوم. في أول سنة من إطلاق المشروع جاني أول عميل عن طريق الموقع شافه وعجبه، وأتواصل معايا يسألني مين المصمم عشان يبغى أطور له موقع.

فاكرين لما قلتلكم كنت أبغى شيء يمثلني ويمثل شغلي!

بعدها جاتني أول وظيفة بسبب البودكاست العربي لإنه أحد عرفني عن طريقه ورشحني “كمطور مواقع جيد”، الوظيفة دي طورتني كثير وعلمتني. بعدها صرت أحطه في CV وصار الموقع يتكلم عني لما أقدم على أي وظيفة وأقدر أقول، إنه كان سبب مؤثر في أني أحصل على وظيفتين بعدها وأنا لسه طالب جامعي وبدون شهادة أو مؤهل في المجال.

شغلي كان كفاية إنه يتكلم عني.
فاليوم لما أطل لورا أنا ممتن أني أشتغلت على البودكاست العربي وسويته بكامل حماسي وبدون ما حتى أفكر كيف ممكن يرجع لي بفائدة مادية!

سلسلة الحماس: نفسي أسوي موقع يفيد الناس ويمثلني > أتعلمت كثير > سويته > ناس أكثر عرفت شغلي > وظائف وفرص أكثر جاتني > طلعت فلوس > ونكمل…

أشياء وأمثلة كثيرة ممكن تطبقها على نفس هذا المثال، وتشوف كيف الحماس كان مؤثر في حياتك وحياة ناس ثانيين. الحماس يفتح أبواب.

الحيرة

تعرف لما تكون محتار بين كم شيء ومن جد منتا عارف أيش تختار قلبك يقول لك شيء وعقلك يقول لك شيء، ومنتا عارف تسمع مين أو أصلاً منتا عارف قلبك أو عقلك أي واحد فيهم

هنا يجي دور الحماس في أنه يدلك، لما تكون محتار. وقف وجاوب على سؤال: أيش اللي محمسني أكثر، دحين والآن؟

بعد ما تعرف أيش اللي محمسك، الآن تقدر تاخد برأي عقلك كمان مع حماسك وتوازن بينهم. أنا صار واضح لي إنه حماسي هو لغة قلبي اللي يتواصل فيها معايا!

على طاري العقل، مثلاً أنا لما أشتغلت على البودكاست العربي وقتها، واللي هوا حماسي في هذيك اللحظة، عقلي ما كان في تعارض وقتها، ما كان عندي التزامات مادية أو كنت مثلاً حستثمر مبلغ كبير عشان أشتغل عليه أو حترك مشاريع وأشغال عندي عشان بس أتفرغ له. لا كان في إنسجام بين اللي حماسي بيقولي هوا وبين عقلي اللي كان شايف انه أيوا أستغل وقتك في شيء مفيد حتى لو إني مني شايف كيف حيرجع عليك بمردود كويس.

أعرف متى تسمع عقلك ومتى ما تخليه يأثر. أنت اللي حتقرر.

اليوم أنا أتبع حماسي في كل شيء تقريباً، واحد من أهم الأشخاص اللي انا احبه ويتكلم عن الحماس كثير، ودائما يلهمني هوا Bashar وحترك رابط تحت للفيديو اللي أحبه له، يتكلم فيه عن الحماس.
واحد من الأسباب اللي بدأت فيها هذا الموقع والبلوق هوا الحماس اللي كان عندي في 2017! وهوا نفسه إختفاء الحماس للكتابة الفترة الأخيرة اللي خلاني أبعد.

الحماس أتوجه لشيء ثاني من البلوق بدأت ناس تعرفني أكثر، وأتعرفت على ناس جدد رهيبين! يشاركوني إهتمامات مختلفة، مره يحمس!

الحماس بعدها أتوجه وأتركز على البودكاست الفترة الأخير بدل الكتابة، حماس البودكاست جاء من البلوق في الأساس، في أول تجربة اللي كانت: تجربة يوم بدون كلام.

سلسة الحماس: نفسي أسوي بلوق > سويت بلوق وبدأت اكتب > اوه خليني أجرب أسجل بلوق صوت > بدأت بودكاست شطحة > أتعرفت على ناس رهيبة > ونكمل…

الحماس لما يجيك يفضل يزّن عليك، ما يجي يوم، يومين ويروح طوالي، لو كملت تسحب عليه أكيد بيوقف. والحماس بطبعه متغير ومتجدد.

بس لا تخاف عمره ما يفوتك شيء!

تجديد النية

هدفي من البلوق دا مو إنه أخليك تقدس الحماس أو تتبعه على طول كقانون، الحماس في النهاية ممكن يكون شيء أنا أفضله ويشتغل معايا، بس بالنسبة لك أهميته ممكن تكون غير شوية. نيتي من البلوقه دي إنه أخليك تنتبه له أكثر، وتعطيه إهتمام أكبر.
لما يجيك الحماس، حاول تأخذ خطوة صغيرة في طريقه وشوف هل بتتحمس زيادة وتأخذ خطوة أكبر أو لا. الحماس يجر بعضه فلا تشيل هم أنت أنوي وابدأ في اللي محمسك.

لما تجيني فترات ضياع ولخبطة في الحياة أو شغلي، ومني عارف أرجع أركز من فين. أول شيء اسويه، ابدأ أحاول وأشوف أيش أقرب شيء بيجيب لي حماس حتى لو صغير وأمشي له وأشوف، من بعدها الوضع حيصير كورة ثلج، وكده.

الشغف

يجيني أحياناً سؤال، إنه “أنت كيف تبدأ كذا شيء وبعدين مثلاً ممكن ما تكملها أو تستمر فيها؟”
جواب السؤال: إنه على قد ما الواحد دائماً يحب لما يبدأ شيء يلتزم فيه، فهو في نفس الوقت اهتماماته تتغير وحماسه يتغير. لو الواحد حيفضل قبل كل ما يجي يبغى يبدأ شيء يفكر هل حلتزم فيه أو أكمل، فهو غالباً محا يبدأ شيء. بسبب الحمل والمسؤلية اللي قاعد يحطها.

بالنسبة لي أنا دائماً لما أتحمس لشيء أحب أجرب ابدأ فيه وأشوف أيش يصير. هذا الشيء ساعدني أكتشف شغفي وحبي للكمبيوتر والإنترنت من عمر صغير.
لو أنت من الناس اللي متلخبطة ومهي عارفه أيش شغفها وأيش تحب، فجوابي لك انه حتعرف لما تجرب، جرب كل شيء يحمسك ويناديك، مصيرنا كلنا من كثر التجربة حنلاقي شيء يعجبنا، وحنشبك في خط معاه وحنستمر فيه، وحيكون وقتها هو تركيزنا، وحنكبر فيه.

الشيء اللي يحمسك، حيخليك تمسك القيتار وتقعد تحاول تعزف أيام وأيام، تحاول تزبط النوتة كل خطوة صغيرة بالنسبة لك تجاه المعزوفة حتكون إنجاز، حتكون مستعد تستثمر في القيتار الوقت، الجهد، والفلوس أنك تتعلم، الرسام نفس الشيء، تقدر تشوف المثال في أشياء كثيرة.

الأشياء اللي تحمسك وتستهويك تلاقي نفسك في الغالب علمتها لنفسك! لإنك مستعد تغوص وتنسجم فيها رغم الصعوبات والوقت الكثير إللي تحتاجه عشان تحترفها.

بينما الشخص اللي مو مجاله هذا الشيء حيترك ويوقف من أول كم محاولة، ماراح يقدر يمسك الخط الطويل، حماسه بيدله على شيء ثاني مختلف.

نسيت أقول إنه الحماس مو دائماً طريقه سهل، أحياناً الحماس يصدم فيك في جدار وتلعن أمه من بعدها، بس برضوا شوية وقت، وطل لورا والا ما تعرف إنه الحماس كان نيته طيبة معاك، وكان يبغى يعلمك شيء أو يختصر لك طريق.

نبسّط

من حكم Bashar اللي أحبها، حلخص وأترجم في نقاط:

• الحماس يشتغل زي البوصلة تدلك لشيء اللي مقدر لك تسويه، والطريق اللي روحك تبغاه.
• الشيء اللي يحمسك هو أنت!
• لإنه أنت، حيكون سلس ومنسجم معاك.
• لإنه أنت، الكون حيدعمك تكمل تسويه (مادياً كمان)، وحيخليك تتوسع فيه أكثر.
• لو حماسك بيقول لك تسوي شيء باين إنه تافه أو بسيط مرة، حتى هنا قوم وسويه!
• لإنه سعيك لهذا الشيء البسيط، احتمال يخليك تقابل شخص أو تكتشف شيء، يخليك تتوسع في طريقك.
• كل حماس مع الوقت يدلك لحماس ثاني أكبر منه ومرتبط فيه.
• لا تصر إنه نتيجة سعيك لحماسك تكون زي ما توقعت، حماسك ممكن يعرف شيء أحسن لك.

الحماس هو علامة، على أن ما تنوي القيام به، هو في توافق مع ذاتك العليا، وهذا التوافق هو ما يسبب هذا الحماس.

― بشار Bashar

حماسك وحماسي وصلنا لنهاية هذي البلوق

سؤالي لك، أيش في شيء الحماس كان مؤثر فيه على حياتك، لما تطل لورا دحين؟ وكيف هي سلسلة حماسه؟

فكر مع نفسك وشارك معانا تحت لو أتحمست!

أشياء أتكلمت عنها:

• Finding your Highest Excitement
• Some of the Core Concepts of Bashar
• البودكاست العربي | دليل برامج البودكاست العربي.
• بودكاست شطحة

زر حُب53

كتبت في: كيف يكون الحماس دليلك؟ - كشميري.

الي مو فاهم أيش قصدي بحي، فهو الأكل اللي ما تعرض لدرجة حرارة فوق 45°C وهي درجة حرارة الشمس الطبيعية اللي الأكل ما يموت فيها وتبقى الإنزيمات حية، فلو كانوا في عملية التجفيف بيعرضوا التمر لأي درجة حرارة أعلى من هذي حيكون ميت وحيخسر طاقة الحياة اللي فيه، وجسمنا حيعوض الإنزيمات من عنده بدل ما يحصل عليها من الأكل نفسه.

“خذها قاعدة: ما وضعتها في الأرض وأنبت هو حيًا. ما لم ينبت بالضرورة ميت!”

― أماني دغريري

التجربة

قررت إنه أخذ الموضوع بيدي وأجرب تجربة نفسي أسويها، وأكتشف منها هل التمر اللي قاعد أكله، حي أو لا، أكثر شيء أبغى أعرفه هو التمر السكري الضميد، لإني مني مصدق إنه حي أبداً، من كثر ماهو مضغوط ومتغير، وأبغى أجرب وأتأكد بنفسي.

قررت أحوش نواة التمر اللي قاعد أكله بدل ما ارميهم في الزبالة! حاخذهم وأسوي تجربة، اخترت نوعين من التمر، تمر سكري ضميد من القصيم، وتمر صقعي من المدينة عضوي.

حنبتهم وحزرعهم لو طلعوا، فالشيء اللي أنا بأكله فيه طاقة الحياة.

خطوات إنبات وزراعة نواة التمر

ححكيكم بالخطوات كيف تزرع بذور التمر وكيف كانت تجربتي:

1- نقع النواة

2- التجهيز للإنبات

بعد أسبوع حتبدأ تشوف بوادر الإنبات من النواة، ممكن يأخذ أسبوع أو أكثر، لا تستعجل. 

4- الزراعة في التربة

تقدر بعد كم أسبوع من ظهور الجذور، تزرعها في حوض تربة، خليها في البداية في مكان رطب جوا البيت مثلاً وحافظ على رطوبة التربة، وأول ما تبدأ تطلع أوراق طلعها لشمس.

أيش صار معايا

تجربتي كانت إني أنبت 6 حبات من النواة، ثلاثة من كل نوع، اللي صار ثلاثة من حبات السكري نبتت بدون أي مشاكل واثنين من النوع الثاني الصقعي نبتت بدون مشاكل برضوا، بس وحدة منهم اللي ما نبتت، ما اعرف ايش ممكن يكون السبب ممكن شيء غلط حصل يخليها ما تنبت أو انها ميته من قبل.

زرعت إثنين أول ما بدأت تطلع لهم جذور كويسة، وتركت البقية ينبتوا لفترة أطول أشوف أيش يصير لهم. 

الزراعة

زرعت بقية الحبات في أحواض وأماكن عشوائية عندي في الحديقة، وبدأت أتابعهم.

الخلاصة

هل التمر اللي عندنا في السعودية حي؟ غالباً أيوا، ما اقدر أقول 100% هوا حي لانه ممكن النواة تكون محفوظة داخل التمر وما تعرضت للحرارة نفسها، لكن الأكيد إنها ما بتتعرض لحرارة عالية جداً لاني لو حطيت التمر في الفرن وبعدين زرعت النواة ما راح يطلع شيء في الأرض.

لو أحد عنده خلفية أكثر عن مصانع التمور في السعودية وأجهزة التجفيف اللي تستعمل، ياريت يتواصل معايا أبغى أعرف زيادة وأضيف معلومات عنها هنا، ودرجات الحرارة الفعلية اللي تستخدم.

التجربة غيرت نظرتي بالكامل، أول شيء قبل التجربة كنت مقتنع انه التمر السكري الضميد غالباً مو RAW، والآن تجربة إنباته كانت ناجحة 100% وأكثر من التمر الثاني، في نفس الوقت ما صرت أشوف نواة التمر زي أول إنه بزر ونرميه في الزبالة! صرت أشوفه إنه شيء حي وجوته طاقة وفرصة للحياة، رغم اني لسه ارميه في الغالب، أحب لما أقدر ارميه في التراب حتى لو ماراح انقعه أحس هوا الشيء الصح.

النخلة النونو قاعدة تكبر، أيوا صار أسمها النخلة خلاص  بعد ما كانت نواة!

أشياء أتكلمت عنها:

• ما هو الأكل الحي؟ – أماني دغريري (الموقع لم يعد متاح)
• How to Grow a Medjool Date Palm From Seed

كتبت في: هل التمر اللي ناكله حي؟ - كشميري.

بداية الحكاية كانت في نفس هذي الأشهر تقريباً، من سنة 2016 إنه كشميري يبغى يسافر في الصيف، وكنت حاط في بالي لما يجي شهر سبتمبر حكون سافرت برا البلد لتجربة جديدة ورهيبة. في هذا الوقت ما كنت لسه قد سافرت لحالي كرحلة سياحية، وأغلب اللي فات كان غالباً شغل. ما كنت ناوي أسافر لحالي، بس لما محد أكد أو أتحمس كنت لسه ملزم إني حسافر حتى لو لحالي مو فارقة، في هذا الوقت ما كنت حددت الوجهة لسه، بس كان عندي تصور مبدئي للبلد اللي أبغى اروحها الجو الطاغي كان، إني أبغى أجرب شيء جديد أبغى أنزل في Hostels وأقابل ناس ما أعرفهم، أمشي في شوارع عجيبة، ومرة كنت شايف أوروبا وقتها.

عدى الوقت ومشيت الشهور وأنا ما خططت ولا جهزت لسفرة مالقيت نفسي الا في شهر August هنا قلت خلاص لازم أسوي شيء أنا مسافر! كان معقدني موضوع الفيزا، كيف حطلعها والإجراءات، وقتها كنت طالب بدرس وموظف Part-time، وكنت شايف الموضوع صعب وحياخذ مني وقت ولخبطة، فقلت خليني أشوف أيش في دول تسمح لسعوديين دخولها بدون فيزا؟ وأنا أقلب في القائمة والا أشوف المالديف شدتني مرة! وأستغربت في نفس الوقت ما كنت ادري إنه المالديف ما تحتاج إستخراج مسبق لفيزا، كل المطلوب تحجز تذكرتك وإقامة وبسم الله من بكرة مداك تنط لهم! حمسني دا الشيء وفي نفس الوقت كنت شفت فيديو أرسله لي أخويا أجواد، لمشهور الدبيان يتكلم عن تجربته في إجازة في المالديف وإنه ترا المالديف مو شرط تكون غالية زي ما كل أحد يحسب! وإنه على حسب المواسم والعروض، حمسني زيادة وزيادة.

أتذكر أول كم ساعة ما كنت جدي مره في الموضوع بس قلبي كان يخفق وكان هو الشعور اللي كأنه قلبي بيقولي أيوا هوا دا، بس في نفس الوقت الفكرة مرة مجنونة وعشوائية في ديك اللحظة، أستنيت أتذكر يوم كمان، في هذا اليوم بحثت عن كل التفاصيل والأشياء اللي أحتاج أعرفها عن المالديف والسفر لها الأسعار وتجارب ناس قد سافروا لها لحالهم Solo، هنا الموضوع بدأ يقلب جد! ويصير حقيقي.

معلومات سريعة

في شوية معلومات سريعة أبغى أقولها عن المالديف عرفتها قبل لأسافر ما كنت واعي لها قبل التخطيط والبحث عنها:

1. المالديف دولة مسلمة.
2. المالديف في عام 2009 سمحت لسياح بالإقامة في الجزر المحلية لسكان، قبل كان مسموح فقط تروح جزر المنتجعات السياحية.
3. غير إنها دولة مسلمة فهي محافظة أكثر من ما تتوقع، المحلات تقفل وقت الصلاة، الكحول غير مسموحة، في شواطئ منفصلة للبكيني وقوانين للبس. *القوانين هذي ما تنطبق على الجزر السياحية والمنتجعات ومو كل السكان يتبعوها طبعاً.
4. في الـ 30 سنة الجية يتوقع إنه جزر المالديف تختفي عن سطح البحر، بسبب إرتفاع مستوى المياه.

اللحظة اللي أتغير فيها كل شيء

أول ما عرفت عن معلومة الإقامة في الجزر المحلية، تقريباً هنا أتغير كل شيء وبدأت أتحمس ومرة أشبك مع الفكرة أكثر وأكثر، أنا أعشق البحر، وأبغى أسترخي، أبغى اتعرف على شعوب وأحتك بالسكان الأصليين وأقابل ناس جدد، وفي نفس الوقت كان لي فترة أقول أبغى أروح أعيش في جزيرة، كل هذا حسيته شابك وبينقلب حقيقة لما عرفت إنه أقدر أسافر للجزر المحلية وأستكشف فيها، لقيت كم موقع كأنه ويكيبيديا لأغلب جزر المالديف المحلية الموقع مرة حمسني حسيت كأني في لعبة، وقاعد أستعرض معلومات الجزر اللي في هذي اللعبة، مساحتها، صور للجزر، معلومات عنها، السكن الموجود فيها، كان شيء مرة يحمس وشابك معايا مليونين! وقررت وقتها رحلتي ما راح تكون بس إستجمام في منتجع أروح أروق فيه وأرجع لا! أنا أبغى أروح أستكشف وأستجم في نفس الوقت.

الخطة

بدأت التخطيط لرحلة عشان أعرف فين حروح، فين حنزل كم يوم ححتاج، ووسائل التنقل اللي بستخدمها. أعتبر نفسي مخطط جيد لرحلاتي وأستمتع بالبحث والإستكشاف عن المكان اللي بسافر له، في نفس الوقت أحب أسيب مكان للعشوائية عشان الأشياء السحرية اللي تصير بدون تخطيط! بس خليني أعترف تخطيط هذي الرحلة ما كان سهل أبداً، قعدت أيام أخطط عشان أعرف في أي جزيرة بنزل ومن الجزيرة هذي أي جزيرة بروح وأيش وسيلة التنقل اللي حتكون موجودة. الوسيلة المعتمدة عندهم لتنقل بين الجزر المحلية هي Ferry، الفيري عبارة عن قارب صغير بطيء وهو التاكسي حقهم أو الباص، وله مواعيد في أيام وأوقات محددة، فكان لازم ألاقي توافق بين كل هذي العوامل.

المهم بعد كم يوم حددت وعرفت المسار اللي أبغى أخذه وبحثت عن الأماكن اللي تقريباً أبغى أنزل فيها، وصار عندي خطة سماوية جاهزة.

مسار الرحلة كالتالي: حوصل مالي عاصمة المالديف، وحاخذ قارب عشان أروح Hulhumalé جزيرة صناعية جمب المطار عشان أريح فيها يوم وأستكشفها عالسريع، بعدها باخذ الفيري وأروح على Fulidhoo وهي جزيرة محلية صغيرة جداً وغير مشهورة بالسياح حقعد فيها ليلة وبعدين بحرك على Maafushi وهي جزيرة محلية مشهورة جداً بالسياح والكثير يزوروها، بقعد فيها يومين وبرجع على Malé العاصمة أقعد فيها ليلة أزور أي معالم مهمة فيها وبعدها أنهي رحلتي في منتجع سياحي على جزيرة Dhoores.

المنتجع السياحي هوا أخر وجهة والي حروق فيه أكثر وأعيش الرفاهية، ومنه أنهي رحلة المالديف العظيمة!

حتسافر المالديف لحالك؟

من يوم ما حجزت تذكرة الطيارة ليوم ما وصلت مطار مالي، ما كان الموضوع سهل، سواء من تخطيط وإستغراب الناس اللي حولي، إنه ليش حسافر المالديف لحالي! أو خوف أمي ومعارضتها في البداية اني أسافر لحالي. كل أحد كان مستغرب من الموضوع، حتى لما وصلت مالي موظف الجوازات هناك كان مستعجب إنه أنا أيش بسوي في أرضهم لحالي، وكأنه المالديف كتبت للمتزوجين والحبيبة بس! وكنت مرة متحمس اني أروح عشان أنفي هذا الشيء، المالديف مو بس لشهر العسل! زائد أنا مو أول واحد راح المالديف لحاله ولا آخر واحد، هل كنت الوحيد هناك؟

الوقت اللي أخترت أسافر فيه للمالديف كان موسم الأمطار في شرق آسيا وأسعار كل شيء في هذا الوقت أرخص، أنقال لي إنه إختيار غير موفق للوقت، وإنه ما بشوف الشمس بس حدسي كان إنه الرحلة هذي حتكون رهيبة ومليانة شمس. المنتجع اللي بنزل فيه قبل لأحجز أرسلت لهم أسئلهم عن توقعات الجو في جزيرتهم أرسلوا لي رد الساعة 2:22 ، اللي يعرفني كويس يعرف إنه هذا الرقم من العلامات اللي لما تجيني أعرف إنه من هنا الطريق وأثق زيادة.

*توقعات الطقس تختلف جداً حسب الجزيرة وموقعها، المالديف فيها 1200 جزيرة تقريباً، و300 من هذي الجزر فيها سكان ومنتجعات، أنواع الجزر تختلف تختلف كثير والتنوع بينهم رهيب.

ما أظن إني كنت شايل هم الفكرة كثير إني لحالي رايح المالديف، بس بدأ الشعور والإستيعاب أول ما ركبت باص الطيارة اللي رايح لمالي، وقتها حسيت من جد إني غريب كلهم Couples وأنا متحمس في النص، لما طلعت الطيارة شفت واحد لحاله كان نايم، أتحمست قلت إمكن في أمل ما أطلع الوحيد، ومن هذيك اللحظة وأنا أدور على أحد مجنون زيي.

وصلت!

الله عالشعور وأنا أطير فوق المالديف، مني شايف قدامي غير جزر ومحيط، والمطار عبارة عن مدرج وصالة على جزيرة صغيرة جنب العاصمة، المطار من أول ما تنزل فيه شيء عجيب كله كاونترات منتجعات سياحية حرفياً بالـ 100 عددهم. أول شيء سويته إني أستخرجت شريحة بباقة إنترنت من المطار، عشان يكون سهل عليا التنقل في الرحلة وأتابع المواعيد والحجوزات وما أنقطع، هذا شيء الأساسي اللي اسويه في السفر دائماً، الانترنت مهم عشان أخذ راحتي تماماً في الإعتماد على نفسي والإستكشاف بـ Google Maps.

الجزيرة الأولى Hulhumalé

هولوهومالي تعتبر جزيرة صناعية جديدة جمب المطار، هذا الجانب يخليها ما تحمس بالنسبة لي، بس لما شفت صورها وشكل المباني الملونة اللي فيها شدتني أقعد فيها ليلة أستكشفها، الجزر اللي زي Hulhumalé الخيارات في السكن فيها قليلة ومو رفاهية مرة سكنت في Guest House وهو المبدأ اللي أخذته في كل الجزر المحلية اللي زرتها، كان نظيف ومرتب، عبارة عن فندق صغير ويطل على الشاطئ، فكرة الـ Guest House إنها بيوت أو أملاك تتحول لفنادق صغيرة وإقتصادية.

أول يوم وصلت فيه كان الجو غيم ونزلت مطرة وهنا فكرني بكلام الناس اللي قالوا لي إني بسافر في وقت غلط وإنه موسم أمطار وحندم، في نفس الوقت ماهز ثقتي دا الشيء كنت متأكد الشمس بتطلع وأيامي الجية بتكون مشمسة وتحمس. أول ليلة أتمشيت على رجلي شفت السوبرماركت حقهم، وشفتهم كيف يقفلوا وقت الأذان، أستعجبت كيف صوت الموذن كانه سعودي مره من العربي حقه! يغبن شوية إنه حتى لما تسافر لبقعة وسط البحر لسه موضوع المحلات اللي تقفل وقت الأذان هذا موجود، لإني كنت لسه أجري الحق السوبرماركت قبل الأذان بس في النهاية ما فرق كتير أنا جي أنبسط. كان عجيب كيف البقالات اللي عندهم الفاكهة يستوردوها من دبي! وفي معلومة قرأتها قبل إنه جزر المالديف مهي مهيئة زراعياً وبيعانوا من هذا الموضوع.

اليوم الثاني الصباح رحت دورت على أحد يأجر دراجة وحققت حلم بإني الف جزيرة كاملة من شرقها الى غربها بالدراجة وكان شعور فخم بالاستكشاف وهوا أكثر شي أحبه في السفر إني أمشي في الشوارع وأستكشف وأعيش جو البلد اللي أنا فيه. ما سويت شي كثير هنا والبحر حقها ما كان رهيب كل ما أغطس تراب بالهبل يحجب الرؤية بس ما كنت متوقع منها كتير بما إني عارف إنها جزيرة صناعية.

خلاصة الجزيرة: أكثر من يوم واحد فيها حتطفش، يوم واحد تلف فيها وتريح قبل لا تنتقل لوجهتك الجية مناسب، الجزيرة فعلاً صناعية وفيها بناء كتير بيحصل، والشاطئ حقها مو رهيب مرة عشان تجي عشانه، ولكن هي مدخل جيد لتدرج في سحر المالديف اللي لسه حتشوفه! أكثر شي حبيته فيها المباني الملونة وإستكشافها بالدراجة.

يلا نسافر لـ Fulidhoo

جاء اليوم الموعود إني أتحرك من الجزيرة الصناعية هذي وأروح لأول وجهة حقيقية ليا، وهي جزيرة Fulidhoo، قبل وأنا أقرأ عنها أغلب السياح اللي زاروها قالوا إنها صغيرة، وفي الغالب لو أنك زرتها ممكن تكون الأجنبي الوحيد على هذي الجزيرة لإنه مهي مشهورة بين السياح لزيارتها.

وصلت الميناء أو مدري ايش اسميه المحطة اللي بأخذ منها الفيري اللي حيتوجه لفوليدو الرحلة حتكون عبارة عن ثلاثة ساعات وربع، وفي النص حيكون في توقف في جزيرة Maafushi وهي الجزيرة اللي حنزل فيها في الرجعة من فوليدو مو الآن، الرحلة هذي تكلفتها 4$ عبارة عن 15 ريال وأنت تقضي ثلاث ساعات تتجول في بحر المالديف الرهيب متخيل!

وصلت الميناء أشتريت التذكرة وقعدت أستنى يجي الموعد، في نفس الوقت ما زلت أبحث عن أي أحد زيي بشكل عجيب، حتى الأجانب Couples كنت أدور عليهم، ليا من يوم ما وصلت ماشفت أجانب كتير في Hulhumalé، فجاءة لمحت وحدة دخلت تسنى معانا من بعيد، شكلها لحالها! عجيب! معقول أحد تاني زيي؟ لما ركبنا الفيري قعدنا جمب بعض وطبعاً فكيت هرجة أنا على طول، وطلعت مجنونة زيي ومسافرة لحالها للمالديف! Fist bump

شفتها لابسة Harem Pants وعليه نقوش فيل وكده أستعجبت! وسالتها إذا انها تسوي يوغا ولها في الأشياء Spiritual طلع أيوا! ومن هنا فكينا مواضيع بالهبل، الأرهب إنها طلعت لها سنتين تركت وظيفتها وبتلف العالم كانت في جنوب أمريكا لفت فيها دول كتير، وقبل المالديف كانت في سريلانكا وبعد المالديف ناوية تكمل على الهند وبعده ماتدري فين! بتمشي بعشوائية وفين ما قلبها يقولها تروح بتروح! ألهمتني مرة والقصص اللي أتكلمنا فيها هو أخر شيء كنت أتوقع أنه حيصير في المالديف.

وأحنا في وسط البحر سألتها عن خطتها، قالتلي أنها رايحة Fulidhoo، قلتلها أوه أنا كمان! كملت تقول: “حقعد هناك يوم وبعدين حروح Maafushi“، قلت: وأنا كمان!!

وأحنا بنمشي في البحر كنت مامل تجي دلافين حولين القارب لانه كثير قالوا صارت لهم، بس مع الأسف ما حصل، وصلنا نقطة التوقف في مافوشي، وحرفياً كل الأجانب اللي في القارب نزلوا لمافوشي الجزيرة الأشهر وبقي بس أنا وهيا والسكان المحليين كملنا الرحلة متوجهيين لفوليدو! طبعاً هيا تقريباً ما تعرف أي شيء وماشية بالبركة ولا بحثت قد ما أنا بحثت حتى مكان سكنها ما تعرف إسمه وهذي طريقتها في السفر حتى بتمشي بدون شريحة إنترنت فاجأتني، فحكيتها كيف أنه فوليدو مو مشهورة وما فيها أجانب كثير، وقعدنا نتسائل لو أحنا الأجانب الوحيدين اللي حنكون على هذي الجزيرة.

وصلنا فوليدو! الجزيرة الصغيرة البسيطة، أستقبلنا صاحب Guest House اللي حننزل فيه، وطلعنا كمان في نفس المكان! حطينا أشيائنا وقلنا بنروح نلحق البحر ونستكشفه قبل الغروب، رحنا البحر ومطرت وقتها وجربت لأول مره شعور السباحة والغوص مع المطر وكان شيء فخم زي ما كل أحد قلي. الغوص ما كان مره رهيب في هذي الجزيرة من ناحية شعب مرجانية، ولما كلمت كذا أحد من الجزيرة قالوا إنه كله من بعد التسونامي اللي جاهم أغلب الشعب المرجانية أدمرت وصار لازم تطلع بعيد بقارب عشان تشوف شيء حلو وحياة جوا البحر.

في نفس الجزيرة مشينا وقابلنا سياح ثانيين زوجين من روسيا وشخص زينا مسافر لحاله! من بريطانيا يعني عددنا كلنا كأجانب 5 على الجزيرة.

شيء يبسط كل مره أقابل أحد جي لحاله Solo ويأكد لي إنه الناس الفاصلة والرهيبة موجودين وحيطلعوا! وأنا قبل كم يوم كنت حاس نفسي لحالي والغريب.

في الليل رحنا كلنا المرسى حق الجزيرة الصغيرة، وكان في زوجين من أهل الجزيرة ورونا Stingrays اللي يجو لشاطئ ولمسناهم! بدون ما نموت أو نتسمم، أكلتهم أكل بيدي كمان، تجربة رهيبة مرة ما كنت مخطط لها، في جزر ثاني تدفع عليها عشان تجربها، في نفس الوقت الـ Couples هدول اللي من الجزيرة مرة كانو لطاف وطيبين، وجوهم كان بسيط على الآخر وباين حبهم لبعض. أحلى شيء في هذي الجزيرة حسيته هو بساطة سكانها وكيف كل أحد يعرف كل أحد، ومنظر الأطفال وهما يجروا في الشاطئ بدون أجهزة أو تكنولوجيا أو أي شيء الى الآن مخزن في مخي، حتى أظن في البيوت ما عندهم تلفزيون كانوا يطلعوا لمطعم في الجزيرة عشان يتفرجوا مباراة لمنتخبهم. الشيء الوحيد المزعج في الجزر المحلية هوا منظر أبراج الشبكة، وأحياناً النظافة.

السكن اللي سكنت فيه في هذي الجزيرة كان أقل شيء جربته في رحلة المالديف كلها كان بسيط مره وماله إطلالة ولا أي شيء يحمس، حتى السرير ما كان مره مريح، بس في نفس الوقت ما فرق معايا كتير لأني كنت متخيل أنا جي لأيش. كلفني تقريباً 200 ريال لليلة الوحدة في دا المكان مع الاكل البسيط. صباح اليوم الثاني في هذي الجزيرة رحت أبغى أشوف الشروق وبالغلط رحت مكان الغروب وقعدت ألف حولين الجزيرة الى ما وصلت لمكان الشروق بعد ما قيدها طلعت الشمس .

وقت الغداء كنا نقعد مع السكان الأصليين للجزيرة غالباً مع العم صاحب البيت وكان يحكينا حكاوي رهيبة زي ذكرياته مع تسونامي 2005 وكيف كانت فجعتهم، القوارب اللي خسروها وكان يورينا لأي درجة وقتها مستوى الموية وصل، شي يفجع! في نفس الوقت سألناهم “أيش رأيكم في التوقعات اللي تقول المالديف حتختفي في المستقبل؟” الرد كان كالتالي وعلى نيتهم: “أظن أيوا سمعنا يقولوا شيء كده في الفيس بوك”

من جدكم!

خلاصة الجزيرة: Fulidhoo جزيرة بسيطة وهادئة جداً، أهلها طيبين وينبسطوا بالأجانب وكل أحد بيبتسم لك، في الجزيرة في ناحية فيها شاطئ للأجانب خاص عشان ياخذوا راحتهم، وغالباً إنه فاضي ونظيف، هذا الشيء يدي خصوصية زيادة لناس اللي يهمهم دا الشيء، السكن أبداً لا تتوقع كثير لانه حالياً في بس خيارين لسكن على هذي الجزيرة وكلها بيوت بسيطة جداً، تعال هنا عشان تجرب شيء مختلف.

حكيني عن Maafushi

جاء موعدنا إنه ناخذ الفيري اللي بتطلع من فوليدو إلى مافوشي تحديداً في الساعة 11:00 صباح، الأوقات بالملي ولو فوت الفيري الله يعينك.

وأنا على القارب لمحت شخص أجنبي ولحاله قاعد يقرأ كتاب، الطبيعي إنه الشخص بيقرأ وقاعد في جوه مفروض أسيبه بس مأدري أشبي في دي الرحلة! رحت لفيت القارب وصلت الى عنده وبدأت أكلمه وأتعرف عليه، الادمي كان رهيب، جي من أستراليا ومسافر لحاله برضوا! بس جوه غير مدري كيف، باين عليه إنه رايق مو اللي حق مغامرات وكده لا شخص أروق من كده وعمره أعطيه في منتصف الثلاثين، أحلى شيء لما قلتله أنا من السعودية، قلي “Oh I love Jeddah” كان غريب! اول مرة انه احد أقله انا من السعودية ويطلع يعرف جدة على طول كده، قلتله أنا من جدة! بعدها سالته السؤال اللي كل احد يسالني هوا والي أنا اسئله لكل أحد، قلتله أيش جابك هنا؟ جوابه بكل بساطة وأختصار “الآن في أستراليا عندنا شتاء وأبغى أهرب منه فقررت أجي هنا.” الشخص كان لطيف جداً، وما أتضايق إني قاطعته من كتابه، ودعته بدون ما اطول عليه. ما أكذب عليكم حسيته ملاك من لطافته وروحه، في شيء كان عجيب.

وصلنا Maafushi زي ما قلت لكم هي جزيرة محلية بس إنها سياحية جداً تقدر تقول عنها شرم الشيخ فرع المالديف الصغير، ما فيها منتجعات بس فيها فنادق صغيرة وفعاليات مره كثير لسياح، والمثير للإهتمام هذي الجزيرة فيها سجن المالديف! بس الوضع مسالم مره ما قد صارت أشياء غريبة بسبب دا السجن، أصلاً أستغربت إنه بلد زي كده فيها سجن.

من هذي الجزيرة أخذت فعاليات زي إنه أروح زيارة لـ Sand Bank وأغوص فيه، وكمان جربت Flyboard وأكلت منه كم طيحة محترمة على وجهي، أسعار الفعاليات هنا أرخص من المنتجعات، وكثيرة مرة الأشياء والفعاليات المائية اللي تقدر تسويها، شواطئ الجزيرة مليانة سياح وقابلت هنا كذا أحد مسافر لحاله بس أغلبهم لغتهم الأنجليزية ما كانت تساعد كثير. الفندق اللي نزلت فيه هنا كان الأرهب على الإطلاق وححط رابط له تحت، حرفياً كل شيء من ستاف، لمدير الفندق، للأغاني الرهيبة اللي أكتشفتها من playlist حقتهم كانوا رهيبين مرة، وكمان كانو حاطين دراجات لسكان الفندق كان شيء خورافي كل يوم أنزل وأخذ الدراجة عشان الف فيها الجزيرة.

في نفس هذي الجزيرة ودعت صاحبتي اللي قابلتها في بداية الرحلة، وكل واحد أتفرق ومشي في خط رحلة مختلف من بعد Maafushi. كان صعب الفراق، ما تخيلت بيكون صعب كده، الليلة الأخيرة بدلنا كريستالات مع بعض، عوضاً عن أشياء رهيبة كتير صارت، كان شيء مستحيل إني أتخيل أني أروح المالديف أقابل أحد وأتبادل معاه كريستالات .

*مستقبلاً حتكلم عن الكريستالات والأحجار وقصتها معايا ممكن في بلوق أو بودكاست، ما راح أسحب على دا الموضوع.
سجلت حلقة بودكاست عن الكريستالات.

خلاصة الجزيرة: Maafushi تجربتها بالنسبة لي خاصة جداً، أنبسطت فيها وعشت مشاعر كثير مختلفة، وفيها حياة بشكل كبير، الفندق اللي نزلت فيه كان رهيب حدود سعره كان 420 ريال في الليلة، ويعتبر من الأغلى على هذي الجزيرة في خيارات ثانية كمان أرخص! الجزيرة مناسبة لشباب أكثر والناس اللي بيسافروا قروب أو لحالهم، وإقتصادية جداً، يعني تقدر تجرب سحر المالديف فيها، بدون ما يكون عندك ميزانية كبيرة، والي عرفته من اللي يشتغلوا هنا إنه في خليجين يجوا ومتعودين عليهم بس أنا ما شفتهم. لو أي احد راح دي الجزيرة في يوم مرة نفسي في تيشيرت “I Maafushi” ما لحقت أخذه، ومره نفسي فيه من كتر ما حبيتها.

Malé العاصمة

ودعت مافوشي وأخذت قارب سريع Speed Boat لإنه في هذاك اليوم ما كان في فيري وهذي كانت وسيلة التنقل المتاحة، سعره يكون أضعاف سعر الفيري، ويعتبر وسيلة عملية وسريعة لتنقل لسياح.

في مالي قعدت يوم واحد، وصلت يوم الجمعة، سمعت الخطبة وصلاة الجمعة أول ما وصلت وكان كأني في السعودية، مالي عاصمة ومدينة بمعني الكلمة لو أقدر أسحب منها كلمة جزيرة بسحبها، كان كأني في الهند سيارات كثير، بشر، وشوارع مو نظيفة، ما كانت مريحة لي أبداً، والفنادق فيها غالية على الفاضي وصعب تلاقي فندق جيد ويكون إقتصادي في نفس الوقت. لفيت فيها كثير، ورحت أغلب الأماكن المهمة والمعالم السياحية، منها مسجد مبني بصخور المرجان، ومقابر إسلامية قديمة كانت غريبة بالنسبة لي، المتحف حقهم كان قافل يوم الجمعة أنقهرت إنه ما قدرت أزوره.

ملخص المدينة: أيوا مدينة Malé صراحة ما أنصح فيها، وكثير يوقفوا فيها أول يوم إلا ما ينتقلوا للمنتجع أو وجهتهم الجية، بس اللي أشوفه إنه أنزل في Hulhumalé أفضل وأروق كثير، لإنه هنا ما في أشياء تشوفها كثير غير إنها بتطلعك من جو المالديف.

الخاتمة: جزيرة طرزان aaaVeee

الحمدلله إني خططت وجهتي الأخيرة إنه تكون منتجع سياحي أروق فيه، وكمان يرجعني لجو المالديف بعد اللي شفته في مالي، طيب هذي الوجهة الأخيرة وهي المنتجع، قبل لا أختار المنتجع بحثت كثير وكان عندي ميزانية محددة تقريباً وفي نفس الوقت في بالي أشياء معينة، أنا أبغى أنبسط! لو حتجي تبحث عن منتجعات المالديف حتلاقي خيارات كثير كثير مره، وإختلاف في الأسعار كبير برضوا، يعتبر شيء كويس إنه يخلي في خيارات لكل أحد سواء للعوائل أو الأزواج وغيره.. طيب وأنا بأبحث طحت على منتجع أسمه aaaVeee Nature’s Paradise حتى إسمه عجيب، وأنا بابحث فيه وأدور أقتنعت إنه هوا دا! هوا دا! كان مغري صراحة أسعاره كانت رهيبة وفي نفس الوقت شايفه مره نظيف، أتاكدت من Reviews عليه كانت برضوا عالية وتأكد رهابته، واحد من الريفيوز كان كاتب “لو طرزان عنده منتجع aaaVeee حيكون منتجعه” وأنا دا اللي كنت بدور عليه، جوه يعطيك جو الغابة من ناحية الأشجار والنخل، الطيور، والتصميم. زائد عندهم إهتمام عجيب وحقيقي بالبيئة غرف الفندق والسرر كلها مصممة يدوياً بالخشب وغيره من الأشياء الطبيعية، فوق هذا كله المنتجع مره جديد قبل كم سنة كانت الجزيرة Dhoores غير مسكونة اصلاً فطبيعية مرة. حمسني! حمسني! حجزت.

aaaVeee يقع في حلقة جزر Dhaalu Atoll وعشان توصل له الطريقة الوحيدة هيا الطيارة المائية، وهذا الحال في كثير من المنتجعات، سعر التذكرة مرتفع شوية لطيارة المائية يوصل 1300 ريال بس مقارنة ببقية العاومل وسعر المنتجع، يسوا مره! غير إنه تجربة الطيارة المائية شيء بحد ذاته رهيب.

ركبت الطيارة وأقلعنا من البحر! خليني أحكيكم عن الكابتن ومساعده اللي في الطيارة، الكابتن حق الطيارة المائية، يلبس شورت وشبشب! كان يفطس ورهيب في نفس الوقت. من الطيارة مناظر وعجائب لجزر كثير ومسطحات فوق الموية رهيبة وعجيبة، أغلبها مو مسكونة، تخليك تفكر قد أيش أحنا ما بنستكشف شيء من الأرض.

وصلت الجزيرة، وهبطنا في الموية! إستقبال الجزيرة كان لطيف، كملت الأوراق والإجراءات، ورحت على بيتي أو خليني أسميه كوخي الصغير، كان شيء رهيب وأنا امشي في الجزيرة وأعيشها زي ماشفتها في الصور فعلاً غابة وسط البحر شيء رهيب! وغرفهم بالنسبة لي رهيبة مره، مع إنها لكثير من الناس ما ترتقي لمعايرهم في الرفاهية والفخامة. الرهيب إنه الكوخ حقك عبارة عن الغرفة والحمام، وكمان منطقة خارجية طبيعية خاصة فيك، وبعدها شاطئ بـ Hammock bed حقك، شيء كان من الخيال بالنسبة لي.

سويت فعاليات هنا أكثر زي اني أخذت رحلة القارب لخليج الدلافين عشان اشوفهم وفعلاً شفتهم بس ما كان مسموح أنزل معاهم، وكانوا يجروا بسرعة كنت ناوي أسحب على القانون بس الدلافين ما أعطوني مجال، برضوا نزلت غوص Scuba diving وشفت سلحفة مرتين شفت سلحفة مره هنا ومره في Sand bank لما كنت في مافوشي، وكان شكلها عظيم وهيا تختفي لأسفل المحيط. جربت أسبح مع سمك القرش الصغير Baby sharks طلعوا رهيبين ومسالمين! والغوص على هذي الجزيرة مره كان عظيم كل يوم كنت أنزل، شعب مرجانية بالهبل وأسماك بكل الألوان والأشكال وتنوع في الشعب المرجانية من حولين الجزيرة. لو بقارن اللي شفته في الشعب المرجانية في المالديف وعندنا في البحر الأحمر ففي تنوع كبير بين الأثنين، بس المنافسة قوية والي عندنا بنفس الرهابة!

الـ spa في الجزيرة كان رهيب برضوا! ومفتوح على البحر، دلعت نفسي وأسترخيت مزبوط هنا.

جزر المنتجعات غالباً تكون مملوكة بالكامل من قبل المنتجع، مهم تجي هنا جاهز، لإنه ماراح يكون في أسواق غير متجر المنتجع ولما تحجز في المنتجع أحجز وجبات الأكل Full board، لإنه مطعم المنتجع هو الشئ الوحيد المتوفر.

من هنا ختمت الرحلة، مبسوط اني قررت أسوي تجربة الجزر المحلية لإنها أضافت لي أشياء ما كانت تجربة المنتجع حتضيفها ليا.

أيامي كانت مشمسة جداً هنا وفي Maafushi الحمدلله. اللي في الجزيرة قالوا لي اني محظوظ، أخر عشرة أيام كانت كلها أمطار. توقع الطقس صعب جداً على جزر المالديف، ولكن عموماً ما ينخاف منها لإنها تتميز بأجواء إستوائية ومشمسة على مدار السنة. أخر يوم ودعتنا الجزيرة بالمطر.

خلاصة الجزيرة: منتجع aaaVeee Nature’s Paradise رهيب وجديد وشواطئه رهيبة مرة، وأسعاره خورافية لو حجزت في وقت جيد. aaaVeee فيه أشياء رهيبة أكثر من إني اقدر أغطيها وهوا لناس معينة حتقدر جو الطبيعة اللي فيه. المنتجع مصمم إنه يكون على جزيرة طبيعية وبدون تعديلات كثير أو تدخل على طبيعتها، وهو من المنتجعات القليلة اللي محافظة على هذا المبدأ. هل أنصح فيه لشهر العسل؟ لو تبغى شي أفخم حتلاقي وحيكون أنسب وأغلب Couples اللي شفتهم هنا كانوا يجوا كإجازة لهم أو anniversary مو شهر عسل، فهو أنسب لإجازة، بس برضوا ينفع لشهر العسل وممكن يكون خورافي لو جوه يناسبكم إنتوا الاثنين. أكثر شيء تقعد فيه 4 أيام أكتر من كده بتطفشوا فيه، وهذا قانون تقدر تتبعه لكل المنتجعات السياحة لا تحجز أكثر من أربعة أيام في نفس المكان لإنه غالباً بتطفش وما في شيء تسويه كتير، بحكم إنك في جزيرة منعزلة.

هل أعيدها ثاني؟

يس، أكيد! في شيء أستوعبته في المالديف، إنه كيف أغلب الأجانب يسافروا لها من أقصى الأرض ، وهيا هنا جمب رجلنا! ومو كتير نروحها، المالديف نقطة راحة وإستجمام مثالية ممكن نزورها كل فترة. وأنا هنا أثبت إنه مو لازم تكون المالديف لشهر العسل، أو تكون محوش كنز عشان تقدر تروح، السفر الإقتصادي “Budget traveling” صار الآن معروف عند الأغلب والمراجع على الإنترنت كثيرة، ما أقدر أقول إنه رحلتي كانت مره إقتصادية، أنا دمجت بين كذا شيء وركزت إني أنبسط. من أغلب الأجانب اللي كانوا زيي مسافرين لحالهم ما راحوا منتجع في النهاية، فكرتهم إنه يبغوا الرحلة إقتصادية.

السفر للجزر صار الآن شيء في قلبي وأبغى أسوي زيادة منه، الأرض مليانة بأماكن وتجارب ما تخطر على البال، بدري على الكواكب الثانية.

لو وصلت هنا وقرأت اللي فات، فأنت وصلت لنهاية أطول بلوق كتبته إلى الآن، شكراً لصبرك وحماسك مع القصة! ما كنت أبغاها لدي الدرجة طويلة، بس عجبني كيف طلعت في النهاية. لسه في حكاوي وتفاصيل ما كتبتها، ممكن أحكيها مستقبلاً في مكان ثاني. أتمنى إني قدرت أحمسك إنه تسوي أشياء مجنونة، وتؤمن بسحر الحياة وإنه مو لازم نعرف كل شيء أو نخطط كل شيء ، رحلتي للمالديف ما كانت مره واضحة بس في نفس الوقت النية في قلبي كانت واضحة لأيش أنا أبغى.

أشياء أتكلمت عنها:

• قائمة دول لسعوديين بدون تأشيرة فيزا
• فيديو مشهور الدبيان – “كل شي تحتاج تعرفه عن السفر لجزر المالديف”
• موقع ودليل لجزر المالديف المحلية
• مواعيد الفيري لتنقل بين الجزر
• الفندق اللي نزلت فيه Maafushi – Velana
• منتجع aaaVeee Nature’s Paradise

كتبت في: كيف سافرت المالديف لحالي؟ - كشميري.

التنبيهات Notification

من ثلاثة سنين تقريباً، قفلت كل التنبيهات زي واتس اب وتويتر والجوال دائماً يكون على Silent، لانه ما أحب كيف تقدر تتحكم فيا وتندايني في أي وقت تبغى، ومن وقتها حسيت براحة كبيرة وما عمري فكرت أغير دا الشئ، وقت ما أنا أبغى أقرر ادخل على هذي البرامج حدخل، بس هذا مو دائماً كافي، ما زلت أحس بإزعاج من أشياء ثانية، التأثير أعمق من كده.

مرض التشييك

في مرض عندنا إنه لما نكون فاضيين وما عندنا شئ، نطلع الجوال ونقعد نشيك واتس اب، انستجرام، وغيره… مدري كم مرة في حياتي الاقي نفسي في discover أنستجرام وأقعد أسال نفسي أيش جابني المكان الزبال دا! الموضوع مستفز لإنه تحس مو أنت المتحكم لا ارادياً بيصير دا الشئ، نزلت App مرة انه يحسب لك كم مرة في اليوم تفتح شاشة جوالك، العدد طلع شئ مجنون فوق +200 من اللي اتذكره. أستوعبت دا الشئ زيادة كل ما امسح البرامج دي إنه مازلت أفتح الجوال وادور على icon حقت app عشان أفتحه.

مع الوقت يتعالج دا المرض.

أيش اللي بنخسره؟

وقت الفراغ لازم يقدس، هوا الوقت اللي الأفكار تنط لك فيه وتجري عليك، حالياً الوقت دا أشبه بإنه معدوم نهرب فيه للجوال على طول، أحياناً احس اني سوبر مان لما أكون في أي مكان إنتظار أو تاكسي وأقرر ما أفتح الجوال. مين ما يحب الأفكار اللي تجيه وهوا يتروش! أفنن أفكار تجيك وقتها! لإنه ما في شي يشغلك لحظة صفاء! نفس الشئ لما اجي أسوي meditation مليون فكرة تنط في راسي وكلام كتير يصير جوا مخي مايخليني فعلاً أتامل، اللي حصل إنه فجأءة من وسط اليوم أعطيت مساحة للأشياء إنه تقدر تتكلم، لما كل دي الأشياء تتكلم وتخلص كل اللي عندها، وقتها فعلاً راح يصفى مخي! أتمنى إنه أجرب دا الشئ.

“أنا أؤمن إنه الأفكار شئ حي، وواعي تجيك ولو ما عبرتها وطلعتها للحياة، تسيبك وتروح لأحد تاني، لو مهتم أقرأ كتاب Big Magic”

أنا مثالي، أنا رهيب.

واحد من الكوارث اللي بتصير في السوشيال ميديا، وخلينا نتكلم عن إنستجرام بالتحديد، إنها “منصة المثالية” كل أحد بيحاول يكون مثالي، وينزل أرهب صور تمثله وقاعد يشكل شخصية لنفسه بكامل تفاصيلها، في صور ما ينفع ينشرها وكلام ما ينفع يقوله لإنه ما يتماشى مع شخصيته اللي صنعها وقاعد يتعب عليها. المشكلة مو إنه الناس بتطلع حسناتها وإيجابيتها، بالعكس محد يبغى ينشر سلبياته وعيوبه، بس خلينا نتفق على شئ مخك قاعد يلف التايم لاين طول اليوم ويشوف كمية perfection مو طبيعية! وما راح يقتنع إنه اللي بيشوفه هذا جزء بسيط من حياة الناس دول، بمعنى أنت قاعد في وقت فراغك، غالباً طفشان، وقاعد تشوف التايم لاين وناس بتنزل إنجازاتهم، رحلاتهم وسفراتهم، “عاداتهم الصحية الرهيبة” مخك اللي راح يفهمه إنه أنت ما بتسوي شئ في حياتك وهدول الناس مره رهيبين وقاعدين ينجزوا وحياتهم رهيبة، المقارنة هذي اللي تحصل تجيب الهم، بينما الواقع إنه حياتهم فيها طلعات ونزلات وبيمروا بأغلب اللي أنت بتمر فيه، وأمكن حياتك أحسن من حياتهم.

Relax وركز في رحلتك ووقتك مو كل أحد عنده نفس الطريق والرحلة.

ليا فترة أحاول أطل في اللي حولي، لما أكون معاهم ويشاركوا أشياء online، هل الموقف حقيقي اللي بيشاركوه، لما يحطوا بوست رهيب وسعيد؟ هل هما فعلاً حاسيين بدا الشئ أو لا؟ أحترم جداً جداً الناس الحقيقين والعفويين على السوشيال ميديا بس من اللي بشوفه عددهم قليل وما أظن إني أصنف نفسي منهم.

قاعد أقيم نفسي كمان، ليش أنا خارج الطلعة دي؟ وليش بسوي الشئ دا! هل أنا ابغى أشاركه أون لاين؟ هل أقدر أروح اسوي sky dive أو اروح مكان رهيب وما أصور ولا صورة وأقعد أنشرها لنص العالم، أبغى أسوي أشياء أنا حقيقي أبغى أسويها مو عشان تكمل شخصية كشميري اللي بصنعها.

مسحت كل شئ

من التشبع اللي أنا فيه والحماس، قمت أتفرج TED talks وفديوهات كتير عن social media وتأثيرها وتجارب ناس وقفوا، المهم أتشجعت وقررت وقتها، ومسحت Whatsapp مع إنه ما يصنف مره كشبكة إجتماعية، بس أنا من زمان أبغى أجرب امسحه وأشوف كيف الحياة بدونه، أرسلت لناس القريبين مني عشان يعرفوا، وبعده مسحت تويتر مع أني بطلت استخدمه بس أحياناً الاقي نفسي ادخله وألفلف في أشياء مالها قيمة زي الترند، وبعدين على Instagram وطلعت من حسابي فيه، وبعدين على سناب شات شلت أبوه، اللي أصلاً ما استخدمه ولا احبه كنت أخليه عشان أتابع أصحابي القريبين مرة، وأشوف نفسي لو أحد صورني .

فجأءة لقيت نفسي منعزل عن كل شئ الحل الوحيد إنه احد يوصلي إنه يكلمني على الجوال أو يرسلي إيميل، الشعور رهيب حرية! كنت أستناها من فترة بالذات واتس اب ما قد حسيت إنه اقدر اسيبه زي دحين، مو لازم أدخل أشيك لو أحد أرسلي شئ أو اشيل هم حاجة، مو لازم أستنى أحد يرد على كلامي، ومو لازم أستنى notifications و Likes عشان يجيني شوية dopamine.

أنا حَر

هل في شئ ندمت عليه؟

هذا السؤال دائماً نفسي أعرفه من الناس اللي يوقفوا، بالذات اللي ما يستخدموا Whatsapp، ليا تقريباً عشرة أيام من يوم ما مسحت واتس اب وحفضل فترة بدونه، ما حسيت إني خسرت حاجة اللي مهم ويبغاني حيتصل عليا، احس ممكن شوية أشياء تفوتني في البداية لإنه الناس متعودين يكلموني هناك، بس مع الوقت خلاص، أصحابي كمان أتعودوا من كثر ما اسوي حركاتي دي واشرد واقفل فترات. أحياناً كثير تفوتني أشياء بتصير في المجتمع، أوامر ملكية وقرارات، أو أحداث مو مهمة مرة، الأشياء المهمة بسمع عنها بعد فترة من أحد. لاحظت كمان إنه الناس دائماً يخمنوا إنه أنت حتعرف كل شئ عن حياتهم لإنك تتابعهم اون لاين.

* وصلتني مكالمة دولية من أبعد قارة، في أحد كان محتاجني وعرف يوصلي لما مالقاني على واتس اب! هل في أشياء مهمة بتفوتني حالياً؟ ممكن!

والنهاية

الموضوع مو تعذيب أو حرمان، قد ما إنه مساحة ليا إنه أتنفس تاني كل ما أحتاج ، وقت ما أحس إنه فترة راحتي خلصت حرجع أفعل الحسابات تاني بس غالباً مو زي أول، بمعنى أبغى أكون حقيقي أكتر وعندي تحكم، وأبغى أقلل الوقت اللي أتعرض فيه لدي الأشياء زي إنه يكون في ساعة في اليوم مسموح فيها أشيك على social media غير كده شكراً.

أحس Blog هوا جوي الأنسب والي دائماً ممكن أهرب ليه، عشان أكتب أشياء وأفضي شوية، فلتبارك الـ Blog.

الشبكات الإجتماعية عرفتني على ناس رهيبة رهيبة! وقريبين مني مرة، ممكن ما كان عرفتهم بدونها، لذلك أنا ممتن جداً لها ، ولكن السؤال هل بدونها الفرص والسحر  راح يتوقف يوصل لعندي؟ ما أظن، أثق إنه الكون لو يبغى يجيب شئ لحد عندك ما راح يفرق معاه أنت على السوشيال ميديا أو لا، حيتغير الطريق بس لكيف حيوصلك الشئ. “We never miss on anything”

“هذي الصفحة ما راح أشاركها على social media”

أشياء أبغاك تشوفها:

• الشبكات الإجتماعية والواقع (Video 3:12)
• #شوبقو شي. واحد. بوقت. واحد – حاتم النجار (33:38 Audio)

قصة الغلاف: صورة وقت الغروب، في يوم رايق وهادي في الشفا، مع أمي وأخواني في واحد من أيام رمضان، ولعنا الشمع واتأملنا وقتها.زر حُب70

كتبت في: كفاية Social media - كشميري.